The Great Epic of the Bhārata dynasty 1.59: Aṃśāvataraṇaparva
Vulgate (Nīlakaṇṭha's text) 1.59
- Language
- Sanskrit
Aṃśāvataraṇaparva
1.59.1
śaunaka uvāca |
bhṛguvaṃśātprabhṛtyeva tvayā me kīrtitaṃ mahat |
ākhyānamakhilaṃ tāta saute prīto'smitena te ||
1.59.2
vakṣyāmi caiva bhūyastvāṃ yathāvatsūtanandana |
yāḥ kathā vyāsasampannāstāśca bhūyo vicakṣva me ||
1.59.3
tasminparamaduṣpāre sarpasatre mahātmanām |
karmāntareṣu yajñasya sadasyānāṃ tathā'dhvare ||
1.59.4
yā babhūvuḥ kathāścitrā yeṣvartheṣu yathātatham |
tvatta icchāmahe śrotuṃ saute tvaṃ vai pracakṣva naḥ ||
1.59.5
sautiruvāca |
karmāntareṣvakathayandvijā vedāśrayāḥ kathāḥ |
vyāsastvakathayaccitramākhyānaṃ bhārataṃ mahat ||
1.59.6
śaunaka uvāca |
mahābhāratamākhyānaṃ pāṇḍavānāṃ yaśaskaram |
janamejayena pṛṣṭaḥ sankṛṣṇadvaipāyanastadā ||
1.59.7
śrāvayāmāsa vidhivattadā karmāntare tu saḥ |
tāmahaṃ vidhivatpuṇyāṃ śrotumicchāmi vai kathām ||
1.59.8
manaḥsāgarasambhūtāṃ maharṣerbhāvitātmanaḥ |
kathayasva satāṃ śreṣṭha sarvaratnamayīmimām ||
1.59.9
sautiruvāca |
hanta te kathayiṣyāmi mahadākhyānamuttamam |
kṛṣṇadvaipāyanamataṃ mahābhāratamāditaḥ ||
1.59.10
śṛṇu sarvamaśeṣeṇa kathyamānaṃ mayā dvija |
śaṃsituṃ tanmahānharṣo mamāpīha pravartate ||
Other recensions (1)
- Mahābhārata — Vyāsa, Sanskrit