[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [Mahābhārata](https://indike.org/pramana/in.lit.mahabharata.vyasa) › [Vulgate (Nilakantha's text)](https://indike.org/pramana/in.lit.mahabharata.vyasa*vulgate) › 1.62 # The Great Epic of the Bhārata dynasty 1.62 Vulgate (Nīlakaṇṭha's text) 1.62 - **Language:** Sanskrit ### [1.62.1](https://indike.org/pramana/in.lit.mahabharata.vyasa*vulgate.1.62.1) janamejaya uvāca | kathitaṃ vai samāsena tvayā sarvaṃ dvijottama | mahābhāratamākhyānaṃ kurūṇāṃ caritaṃ mahat || ### [1.62.2](https://indike.org/pramana/in.lit.mahabharata.vyasa*vulgate.1.62.2) kathāṃ tvanagha citrārthāṃ kathayasva tapodhana | vistaraśravaṇe jātaṃ kautūhalamatīva me || ### [1.62.3](https://indike.org/pramana/in.lit.mahabharata.vyasa*vulgate.1.62.3) sa bhavānvistareṇemāṃ punarākhyātumarhati | na hi tṛpyāmi pūrveṣāṃ śṛṇvānaścaritaṃ mahat || ### [1.62.4](https://indike.org/pramana/in.lit.mahabharata.vyasa*vulgate.1.62.4) na tatkāraṇamalpaṃ vai dharmajñā yatra pāṇḍavāḥ | avadhyānsarvaśo jaghnuḥ praśasyante ca mānavaiḥ || ### [1.62.5](https://indike.org/pramana/in.lit.mahabharata.vyasa*vulgate.1.62.5) kimarthaṃ te naravyāghrāḥ śaktāḥ santo hyanāgasaḥ | prayujyamānānsaṅkleśānkṣāntavanto durātmanām || ### [1.62.6](https://indike.org/pramana/in.lit.mahabharata.vyasa*vulgate.1.62.6) kathaṃ nāgāyutaprāṇo bāhuśālī vṛkodaraḥ | parikliśyannapi krodhaṃ dhṛtavānvai dvijottama || ### [1.62.7](https://indike.org/pramana/in.lit.mahabharata.vyasa*vulgate.1.62.7) kathaṃ sā draupadī kṛṣṇā kliśyamānā durātmabhiḥ | śaktā satī dhārtarāṣṭrānnādahatkrodhacakṣuṣā || ### [1.62.8](https://indike.org/pramana/in.lit.mahabharata.vyasa*vulgate.1.62.8) kathaṃ vyasaninaṃ dyūte pārthau mādrīsutau tadā | anvayuste naravyāghrā bādhyamānā durātmabhiḥ || ### [1.62.9](https://indike.org/pramana/in.lit.mahabharata.vyasa*vulgate.1.62.9) kathaṃ dharmabhṛtāṃ śreṣṭhaḥ suto dharmasya dharmavit | anarhaḥ paramaṃ kleśaṃ soḍhavānsa yudhiṣṭhiraḥ || ### [1.62.10](https://indike.org/pramana/in.lit.mahabharata.vyasa*vulgate.1.62.10) kathaṃ ca bahulāḥ senāḥ pāṇḍavaḥ kṛṣṇasārathiḥ | asyanneko'nayatsarvāḥ pitṛlokaṃ dhanañjayaḥ || ### [1.62.11](https://indike.org/pramana/in.lit.mahabharata.vyasa*vulgate.1.62.11) etadācakṣva me sarvaṃ yathāvṛttaṃ tapodhana | yadyacca kṛtavantaste tatratatra mahārathāḥ || ### [1.62.12](https://indike.org/pramana/in.lit.mahabharata.vyasa*vulgate.1.62.12) vaiśampāyana uvāca | kṣaṇaṃ kuru mahārāja vipulo'yamanukramaḥ | puṇyākhyānasya vaktavyaḥ kṛṣṇadvaipāyaneritaḥ || ### [1.62.13](https://indike.org/pramana/in.lit.mahabharata.vyasa*vulgate.1.62.13) maharṣeḥ sarvalokeṣu pūjitasya mahātmanaḥ | pravakṣyāmi mataṃ kṛtsnaṃ vyāsasyāmitatejasaḥ || ### [1.62.14](https://indike.org/pramana/in.lit.mahabharata.vyasa*vulgate.1.62.14) idaṃ śatasahasraṃ hi ślokānāṃ puṇyakarmaṇām | satyavatyātmajeneha vyākhyātamamitaujasā || ### [1.62.15](https://indike.org/pramana/in.lit.mahabharata.vyasa*vulgate.1.62.15) ya idaṃ śrāvayedvidvānye cedaṃ śṛṇuyurnarāḥ | te brahmaṇaḥ sthānametya prāpnuyurdevatulyatām || ### [1.62.16](https://indike.org/pramana/in.lit.mahabharata.vyasa*vulgate.1.62.16) idaṃ hi vedaiḥ samitaṃ pavitramapi cottamam | śrāvyāṇāmuttamaṃ cedaṃ purāṇamṛṣisaṃstutam || ### [1.62.17](https://indike.org/pramana/in.lit.mahabharata.vyasa*vulgate.1.62.17) asminnarthaśca kāmaśca nikhilenopadekṣyate | itihāse mahāpuṇye buddhiśca parinaiṣṭhikī || ### [1.62.18](https://indike.org/pramana/in.lit.mahabharata.vyasa*vulgate.1.62.18) akṣudrāndānaśīlāṃśca satyaśīlānanāstikān | kārṣṇaṃ vedamimaṃ vidvāñchrāvayitvā'rthamaśnute || ### [1.62.19](https://indike.org/pramana/in.lit.mahabharata.vyasa*vulgate.1.62.19) bhrūṇahatyākṛtaṃ cāpi pāpaṃ jahyādasaṃśayam | itihāsamimaṃ śrutvā puruṣo'pi sudāruṇaḥ || ### [1.62.20](https://indike.org/pramana/in.lit.mahabharata.vyasa*vulgate.1.62.20) mucyate sarvapāpebhyo rāhuṇā candramā yathā | jayo nāmetihāso'yaṃ śrotavyo vijigīṣuṇā || ### [1.62.21](https://indike.org/pramana/in.lit.mahabharata.vyasa*vulgate.1.62.21) mahīṃ vijayate rājā śatrūṃścāpi parājayet | idaṃ puṃsavanaṃ śreṣṭhamidaṃ svastyayanaṃ mahat || ### [1.62.22](https://indike.org/pramana/in.lit.mahabharata.vyasa*vulgate.1.62.22) mahiṣī yuvarājābhyāṃ śrotavyaṃ bahuśastathā | vīraṃ janayate putraṃ kanyāṃ vā rājyabhāginīm || ### [1.62.23](https://indike.org/pramana/in.lit.mahabharata.vyasa*vulgate.1.62.23) dharmaśāstramidaṃ puṇyamarthaśāstramidaṃ param | mokṣaśāstramidaṃ proktaṃ vyāsenāmitabuddhinā || ### [1.62.24](https://indike.org/pramana/in.lit.mahabharata.vyasa*vulgate.1.62.24) sampratyācakṣate cedaṃ tathā śroṣyanti cāpare | putrāḥ śuśrūṣavaḥ santi preṣyāśca priyakāriṇaḥ || ### [1.62.25](https://indike.org/pramana/in.lit.mahabharata.vyasa*vulgate.1.62.25) śarīreṇa kṛtaṃ pāpaṃ vācā ca manasaiva ca | sarvaṃ santyajati kṣipraṃ ya idaṃ śṛṇuyānnaraḥ || ### [1.62.26](https://indike.org/pramana/in.lit.mahabharata.vyasa*vulgate.1.62.26) bharatānāṃ mahajjanma śṛṇvatāmanasūyatām | nāsti vyādhibhayaṃ teṣāṃ paralokabhayaṃ kutaḥ || ### [1.62.27](https://indike.org/pramana/in.lit.mahabharata.vyasa*vulgate.1.62.27) dhanyaṃ yaśasyamāyuṣyaṃ puṇyaṃ svargyaṃ tathaiva ca | kṛṣṇadvaipāyanenedaṃ kṛtaṃ puṇyacikīrṣuṇā || ### [1.62.28](https://indike.org/pramana/in.lit.mahabharata.vyasa*vulgate.1.62.28) kīrtiṃ prathayatā loke pāṇḍavānāṃ mahātmanām | anyeṣāṃ kṣatriyāṇāṃ ca bhūridraviṇatejasām || ### [1.62.29](https://indike.org/pramana/in.lit.mahabharata.vyasa*vulgate.1.62.29) sarvavidyāvadātānāṃ loke prathitakarmaṇām | ya idaṃ mānavo loke puṇyārthe brāhmaṇāñchucīn || ### [1.62.30](https://indike.org/pramana/in.lit.mahabharata.vyasa*vulgate.1.62.30) śrāvayeta mahāpuṇyaṃ tasya dharmaḥ sanātanaḥ | kurūṇāṃ prathitaṃ vaṃśaṃ kīrtayansatataṃ śuciḥ || ### [1.62.31](https://indike.org/pramana/in.lit.mahabharata.vyasa*vulgate.1.62.31) vaṃśamāpnoti vipulaṃ loke pūjyatamo bhavet | yo'dhīte bhārataṃ puṇyaṃ brāhmaṇo niyatavrataḥ || ### [1.62.32](https://indike.org/pramana/in.lit.mahabharata.vyasa*vulgate.1.62.32) caturo vārṣikānmāsānsarvapāpaiḥ pramucyate | vijñeyaḥ sa ca vedānāṃ pārago bhārataṃ paṭhan || ### [1.62.33](https://indike.org/pramana/in.lit.mahabharata.vyasa*vulgate.1.62.33) devā rājarṣayo hyatra puṇyā brahmarṣayastathā | kīrtyante dhūtapāpmānaḥ kīrtyate keśavastathā || ### [1.62.34](https://indike.org/pramana/in.lit.mahabharata.vyasa*vulgate.1.62.34) bhagavāṃścāpi deveśo yatra devī ca kīrtyate | anekajanano yatra kārtikeyasya sambhavaḥ || ### [1.62.35](https://indike.org/pramana/in.lit.mahabharata.vyasa*vulgate.1.62.35) brāhmaṇānāṃ gavāṃ caiva māhātmyaṃ yatra kīrtyate | sarvaśrutisamūho'yaṃ śrotavyo dharmabuddhibhiḥ || ### [1.62.36](https://indike.org/pramana/in.lit.mahabharata.vyasa*vulgate.1.62.36) ya idaṃ śrāvayedvidvānbrāhmaṇāniha parvasu | dhūtapāpmā jitasvargo brahma gacchati śāśvatam || ### [1.62.37](https://indike.org/pramana/in.lit.mahabharata.vyasa*vulgate.1.62.37) śrāvayedbrāhmaṇāñśrāddhe yaścemaṃ pādamantataḥ | akṣayyaṃ tasya tacchrāddhamupāvartetpitṝniha || ### [1.62.38](https://indike.org/pramana/in.lit.mahabharata.vyasa*vulgate.1.62.38) ahnā yadenaḥ kriyate indriyairmanasā'pi vā | jñānādajñānato vāpi prakaroti naraśca yat || ### [1.62.39](https://indike.org/pramana/in.lit.mahabharata.vyasa*vulgate.1.62.39) tanmahābhāratākhyānaṃ śrutvaiva pravilīyate | bharatānāṃ mahajjanma mahābhāratamucyate || ### [1.62.40](https://indike.org/pramana/in.lit.mahabharata.vyasa*vulgate.1.62.40) niruktamasya yo veda sarvapāpaiḥ pramucyate | bharatānāṃ mahajjanma mahābhāratamucyate || ### [1.62.41](https://indike.org/pramana/in.lit.mahabharata.vyasa*vulgate.1.62.41) mahato hyenaso martyānmocayedanukīrtitaḥ | tribhirvarṣairlabdhakāmaḥ kṛṣṇadvaipāyano muniḥ || ### [1.62.42](https://indike.org/pramana/in.lit.mahabharata.vyasa*vulgate.1.62.42) nityotthitaḥ śuciḥ śakto mahābhāratamāditaḥ | tapo niyamamāsthāya kṛtametanmaharṣiṇā || ### [1.62.43](https://indike.org/pramana/in.lit.mahabharata.vyasa*vulgate.1.62.43) tasmānniyamasaṃyuktaiḥ śrotavyaṃ brāhmaṇairidam | kṛṣṇaproktāmimāṃ puṇyāṃ bhāratīmuttamāṃ kathām || ### [1.62.44](https://indike.org/pramana/in.lit.mahabharata.vyasa*vulgate.1.62.44) śrāvayiṣyanti ye viprā ye ca śroṣyanti mānavāḥ | sarvathā vartamānā vai na te śocyāḥ kṛtākṛtaiḥ || ### [1.62.45](https://indike.org/pramana/in.lit.mahabharata.vyasa*vulgate.1.62.45) nareṇa dharmakāmena sarvaḥ śrotavya ityapi | nikhilenetihāso'yaṃ tataḥ siddhimavāpnuyāt || ### [1.62.46](https://indike.org/pramana/in.lit.mahabharata.vyasa*vulgate.1.62.46) na tāṃ svargagatiṃ prāpya tuṣṭiṃ prāpnoti mānavaḥ | yāṃ śrutvaivaṃ mahāpuṇyamitihāsamupāśnute || ### [1.62.47](https://indike.org/pramana/in.lit.mahabharata.vyasa*vulgate.1.62.47) śṛṇvañśrāddhaḥ puṇyaśīlaḥ śrāvayaṃścedamadbhutam | naraḥ phalamavāpnoti rājasūyāśvamedhayoḥ || ### [1.62.48](https://indike.org/pramana/in.lit.mahabharata.vyasa*vulgate.1.62.48) yathā samudro bhagavānyathā merurmahāgiriḥ | ubhau khyātau ratnanidhī tathā bhāratamucyate || ### [1.62.49](https://indike.org/pramana/in.lit.mahabharata.vyasa*vulgate.1.62.49) idaṃ hi vedaiḥ samitaṃ pavitramapi cottamam | śravyaṃ śrutisukhaṃ caiva pāvanaṃ śīlavardhanam || ### [1.62.50](https://indike.org/pramana/in.lit.mahabharata.vyasa*vulgate.1.62.50) ya idaṃ bhārataṃ rājanvācakāya prayacchati | tena sarvā mahī dattā bhavetsāgaramekhalā || ### [1.62.51](https://indike.org/pramana/in.lit.mahabharata.vyasa*vulgate.1.62.51) pārikṣitakathāṃ divyāṃ puṇyāya vijayāya ca | kathyamānāṃ mayā kṛtsnāṃ śṛṇu harṣakarīmimām || ### [1.62.52](https://indike.org/pramana/in.lit.mahabharata.vyasa*vulgate.1.62.52) tribhirvarṣaiḥ sadotthāyī kṛṣṇadvaipāyano muniḥ | mahābhāratamākhyānaṃ kṛtavānidamadbhutam || ### [1.62.53](https://indike.org/pramana/in.lit.mahabharata.vyasa*vulgate.1.62.53) dharme cārthe ca kāme ca mokṣe ca bharatarṣabha | yadihāsti tadanyatra yannehāsti na tatkvacit || ## Other recensions (1) - [Mahābhārata](https://indike.org/pramana/in.lit.mahabharata.vyasa.1.56.1) — Vyāsa, Sanskrit --- Source: [https://indike.org/pramana/in.lit.mahabharata.vyasa*vulgate.1.62](https://indike.org/pramana/in.lit.mahabharata.vyasa*vulgate.1.62) · Pramāṇa