[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [Mahābhārata](https://indike.org/pramana/in.lit.mahabharata.vyasa) › [Vulgate (Nilakantha's text)](https://indike.org/pramana/in.lit.mahabharata.vyasa*vulgate) › 1.63 # The Great Epic of the Bhārata dynasty 1.63 Vulgate (Nīlakaṇṭha's text) 1.63 - **Language:** Sanskrit ### [1.63.1](https://indike.org/pramana/in.lit.mahabharata.vyasa*vulgate.1.63.1) vaiśampāyana uvāca | rājoparicaro nāma dharmanityo mahīpatiḥ | babhūva mṛgayāṃ gantuṃ sadā kila dhṛtavrataḥ || ### [1.63.2](https://indike.org/pramana/in.lit.mahabharata.vyasa*vulgate.1.63.2) sa cediviṣayaṃ ramyaṃ vasuḥ pauravanandanaḥ | indropadeśājjagrāha ramaṇīyaṃ mahīpatiḥ || ### [1.63.3](https://indike.org/pramana/in.lit.mahabharata.vyasa*vulgate.1.63.3) tamāśrame nyastaśastraṃ nivasantaṃ taponidhim | devāḥ śakrapurogā vai rājānamupatasthire || ### [1.63.4](https://indike.org/pramana/in.lit.mahabharata.vyasa*vulgate.1.63.4) indratvamarho rājā'yaṃ tapasetyanucintya vai | taṃ sāntvena nṛpaṃ sākṣāttapasaḥ sannyavartayan || ### [1.63.5](https://indike.org/pramana/in.lit.mahabharata.vyasa*vulgate.1.63.5) devā ūcuḥ | na saṅkīryeta dharmo'yaṃ pṛthivyāṃ pṛthivīpate | tvayā hi dharmo vidhṛtaḥ kṛtsnaṃ dhārayate jagat || ### [1.63.6](https://indike.org/pramana/in.lit.mahabharata.vyasa*vulgate.1.63.6) indra uvāca | loke dharmaṃ pālaya tvaṃ nityayuktaḥ samāhitaḥ | dharmayuktastato lokānpuṇyānprāpsyasi śāśvatān || ### [1.63.7](https://indike.org/pramana/in.lit.mahabharata.vyasa*vulgate.1.63.7) diviṣṭhasya bhuviṣṭhastvaṃ sakhā bhūto mama priyaḥ | ramya pṛthivyāṃ yo deśastamāvasa narādhipa || ### [1.63.8](https://indike.org/pramana/in.lit.mahabharata.vyasa*vulgate.1.63.8) paśavyaścaiva puṇyaśca prabhūtadhanadhānyavān | svā rakṣyaścaiva saumyaśca bhogyairbhūmiguṇairyutaḥ || ### [1.63.9](https://indike.org/pramana/in.lit.mahabharata.vyasa*vulgate.1.63.9) arthavāneṣa deśo hi dhanaratnādibhiryutaḥ | vasupūrṇā ca vasudhā vasa cediṣu cedipa || ### [1.63.10](https://indike.org/pramana/in.lit.mahabharata.vyasa*vulgate.1.63.10) dharmaśīlā janapadāḥ susantoṣāśca sādhavaḥ | na ca mithyāpralāpo'tra svaireṣvapi kuto'nyathā || ### [1.63.11](https://indike.org/pramana/in.lit.mahabharata.vyasa*vulgate.1.63.11) na ca pitrā vibhajyante putrā guruhite ratāḥ | yuñjate dhuri no gāśca kṛśānsandhukṣayanti ca || ### [1.63.12](https://indike.org/pramana/in.lit.mahabharata.vyasa*vulgate.1.63.12) sarve varṇāḥ svadharmasthāḥ sadā cediṣu mānada | na te'styaviditaṃ kiñcittriṣu lokeṣu yadbhavet || ### [1.63.13](https://indike.org/pramana/in.lit.mahabharata.vyasa*vulgate.1.63.13) daivopabhogyaṃ divyaṃ tvāmākāśe sphāṭikaṃ mahat | ākāśagaṃ tvāṃ maddattaṃ vimānamupapatsyate || ### [1.63.14](https://indike.org/pramana/in.lit.mahabharata.vyasa*vulgate.1.63.14) tvamekaḥ sarvamartyeṣu vimānavaramāsthitaḥ | cariṣyasyuparistho hi devo vigrahavāniva || ### [1.63.15](https://indike.org/pramana/in.lit.mahabharata.vyasa*vulgate.1.63.15) dadāmi te vaijayantīṃ mālāmamlānapaṅkajām | dhārayiṣyati saṅgrāme yā tvāṃ śastrairavikṣatam || ### [1.63.16](https://indike.org/pramana/in.lit.mahabharata.vyasa*vulgate.1.63.16) lakṣaṇaṃ caitadeveha bhavitā te narādhipa | indramāleti vikhyātaṃ dhanyamapratimaṃ mahat || ### [1.63.17](https://indike.org/pramana/in.lit.mahabharata.vyasa*vulgate.1.63.17) yaṣṭiṃ ca vaiṇavīṃ tasmai dadau vṛtraniṣūdanaḥ | iṣṭapradānamuddiśya śiṣṭānāṃ pratipālinīm || ### [1.63.18](https://indike.org/pramana/in.lit.mahabharata.vyasa*vulgate.1.63.18) tasyāḥ śakrasya pūjārthaṃ bhūmau bhūmipatistadā | praveśaṃ kārayāmāsa sarvotsavavaraṃ tadā || ### [1.63.19](https://indike.org/pramana/in.lit.mahabharata.vyasa*vulgate.1.63.19) tataḥprabhṛti cādyāpi yaṣṭeḥ kṣitipasattamaiḥ | praveśaḥ kriyate rājanyathā tena pravartitaḥ || ### [1.63.20](https://indike.org/pramana/in.lit.mahabharata.vyasa*vulgate.1.63.20) aparedyustatastasyāḥ kriyate'tyucchrayo nṛpaiḥ | alaṅkṛtāyā piṭakairgandhamālyaiśca bhūṣaṇaiḥ || ### [1.63.21](https://indike.org/pramana/in.lit.mahabharata.vyasa*vulgate.1.63.21) mālyadāmaparikṣiptā vidhivatkriyate'pi ca | bhagavānpūjyate cātra haṃsarūpeṇa ceśvaraḥ || ### [1.63.22](https://indike.org/pramana/in.lit.mahabharata.vyasa*vulgate.1.63.22) svayameva gṛhītena vasoḥ prītyā mahātmanaḥ | sa tāṃ pūjāṃ mahendrastu dṛṣṭvā devaḥ kṛtāṃ śubhām || ### [1.63.23](https://indike.org/pramana/in.lit.mahabharata.vyasa*vulgate.1.63.23) vasunā rājamukhyena prītimānabravītprabhuḥ | ye pūjayiṣyanti narā rājānaśca mahaṃ mama || ### [1.63.24](https://indike.org/pramana/in.lit.mahabharata.vyasa*vulgate.1.63.24) kārayiṣyanti ca mudā yathā cedipatirnṛpaḥ | teṣāṃ śrīrvijayaścaiva sarāṣṭrāṇāṃ bhaviṣyati || ### [1.63.25](https://indike.org/pramana/in.lit.mahabharata.vyasa*vulgate.1.63.25) tathā sphīto janapado muditaśca bhaviṣyati | evaṃ mahātmanā tena mahendreṇa narādhipa || ### [1.63.26](https://indike.org/pramana/in.lit.mahabharata.vyasa*vulgate.1.63.26) vasuḥ prītyā maghavatā mahārājo'bhisatkṛtaḥ | utsavaṃ kārayiṣyanti sadā śakrasya ye narāḥ || ### [1.63.27](https://indike.org/pramana/in.lit.mahabharata.vyasa*vulgate.1.63.27) bhūmiratnādibhirdānaistathā pūjyā bhavanti te | varadānamahāyajñaistathā śakrotsavena ca || ### [1.63.28](https://indike.org/pramana/in.lit.mahabharata.vyasa*vulgate.1.63.28) sampūjito maghavatā vasuścedīśvaro nṛpaḥ | pālayāmāsa dharmeṇa cedisthaḥ pṛthivīmimām || ### [1.63.29](https://indike.org/pramana/in.lit.mahabharata.vyasa*vulgate.1.63.29) indrapītyā cedipatiścakārendramahaṃ vasuḥ | putrāścāsya mahāvīryāḥ pañcāsannamitaujasaḥ || ### [1.63.30](https://indike.org/pramana/in.lit.mahabharata.vyasa*vulgate.1.63.30) nānārājyeṣu ca sutānsa samrāḍabhyaṣecayat | mahāratho māgadhānāṃ viśruto yo bṛhadrathaḥ || ### [1.63.31](https://indike.org/pramana/in.lit.mahabharata.vyasa*vulgate.1.63.31) pratyagrahaḥ kuśāmbaśca yamāhurmaṇivāhanam | māvellaśca yaduścaiva rājanyaścāparājitaḥ || ### [1.63.32](https://indike.org/pramana/in.lit.mahabharata.vyasa*vulgate.1.63.32) ete tasya sutā rājanrājarṣerbhūritejasaḥ | nyaveśayannāmabhiḥ svaiste deśāṃśca purāṇi ca || ### [1.63.33](https://indike.org/pramana/in.lit.mahabharata.vyasa*vulgate.1.63.33) vāsavāḥ pañca rājānaḥ pṛthagvaṃśāśca śāśvatāḥ | vasantamindraprāsāde ākāśe sphāṭike ca tam || ### [1.63.34](https://indike.org/pramana/in.lit.mahabharata.vyasa*vulgate.1.63.34) upatasthurmahātmānaṃ gandharvāpsaraso nṛpam | rājoparicaretyevaṃ nāma tasyātha viśrutam || ### [1.63.35](https://indike.org/pramana/in.lit.mahabharata.vyasa*vulgate.1.63.35) puropavāhinīṃ tasya nadīṃ śuktamatīṃ giriḥ | arautsīccetanāyuktaḥ kāmātkolāhalaḥ kila || ### [1.63.36](https://indike.org/pramana/in.lit.mahabharata.vyasa*vulgate.1.63.36) giriṃ kolāhalaṃ taṃ tu padā vasuratāḍayat | niścakrāma tatastena prahāravivareṇa sā || ### [1.63.37](https://indike.org/pramana/in.lit.mahabharata.vyasa*vulgate.1.63.37) tasyāṃ nadyāṃ sa janayanmithunaṃ parvataḥ svayam | tasmādvimokṣaṇātprītā nadī rājñe nyavedayat || ### [1.63.38](https://indike.org/pramana/in.lit.mahabharata.vyasa*vulgate.1.63.38) yaḥ pumānabhavattatra taṃ sa rājarṣisattamaḥ | vasurvasupradaścakre senāpatimarindamaḥ || ### [1.63.39](https://indike.org/pramana/in.lit.mahabharata.vyasa*vulgate.1.63.39) cakāra patnīṃ kanyāṃ tu tathā tāṃ girikāṃ nṛpaḥ | vasoḥ patnī tu girikā kāmakālaṃ nyavedayat || ### [1.63.40](https://indike.org/pramana/in.lit.mahabharata.vyasa*vulgate.1.63.40) ṛtukālamanuprāptā snātā puṃsavane śuciḥ | tadahaḥ pitaraścainamūcurjahi mṛgāniti || ### [1.63.41](https://indike.org/pramana/in.lit.mahabharata.vyasa*vulgate.1.63.41) taṃ rājasattamaṃ prītāstadā matimatāṃ varaḥ | sa pitṝṇāṃ niyogena tamanatikramya pārthivaḥ || ### [1.63.42](https://indike.org/pramana/in.lit.mahabharata.vyasa*vulgate.1.63.42) cakāra mṛgayāṃ kāmī girikāmeva saṃsmaran | atīvarūpasampannāṃ sākṣācchriyamivāparām || ### [1.63.43](https://indike.org/pramana/in.lit.mahabharata.vyasa*vulgate.1.63.43) aśokaiścampakaiścūtairanekairatimuktakaiḥ | punnāgaiḥ karṇikāraiśca bakulairdivyapāṭalaiḥ || ### [1.63.44](https://indike.org/pramana/in.lit.mahabharata.vyasa*vulgate.1.63.44) pāṭasairnārikelaiśca candanaiścārjunaistathā | etai ramyairmahāvṛkṣaiḥ puṇyaiḥ svāduphalairyutam || ### [1.63.45](https://indike.org/pramana/in.lit.mahabharata.vyasa*vulgate.1.63.45) kokilākulasannādaṃ mattabhramaranāditam | vasantakāle tattasya vanaṃ caitrarathopamam || ### [1.63.46](https://indike.org/pramana/in.lit.mahabharata.vyasa*vulgate.1.63.46) mathābhiparītātmā nāpaśyadgirikāṃ tadā | apaśyankāmasantaptaścaramāṇo yadṛcchayā || ### [1.63.47](https://indike.org/pramana/in.lit.mahabharata.vyasa*vulgate.1.63.47) puṣpasañchannaśākhāgraṃ pallavairupaśobhitam | aśokaṃ stabakaiśchannaṃ ramaṇīyamapaśyata || ### [1.63.48](https://indike.org/pramana/in.lit.mahabharata.vyasa*vulgate.1.63.48) adhastāttasya cchāyāyāṃ sukhāsīno narādhipaḥ | madhugandhaśca saṃyuktaṃ puṣpagandhamanoharam || ### [1.63.49](https://indike.org/pramana/in.lit.mahabharata.vyasa*vulgate.1.63.49) vāyunā preryamāṇastu dhūmrāya mudamanvagāt | tasya retaḥ pracaskanda carato gahane vane || ### [1.63.50](https://indike.org/pramana/in.lit.mahabharata.vyasa*vulgate.1.63.50) skannamātraṃ ca tadreto vṛkṣapatreṇa bhūmipaḥ | pratijagrāha mithyā me na patedreta ityuta || ### [1.63.51](https://indike.org/pramana/in.lit.mahabharata.vyasa*vulgate.1.63.51) idaṃ mithyā pariskannaṃ reto me na bhavediti | ṛtuśca tasyāḥ patnyā me na moghaḥ syāditi prabhuḥ || ### [1.63.52](https://indike.org/pramana/in.lit.mahabharata.vyasa*vulgate.1.63.52) sañcintyaivaṃ tadā rājā vicārya ca punaḥpunaḥ | amoghatvaṃ ca vijñāya retaso rājasattamaḥ || ### [1.63.53](https://indike.org/pramana/in.lit.mahabharata.vyasa*vulgate.1.63.53) śukraprasthāpane kālaṃ mahiṣyā prasamīkṣya vai | abhimantryātha tacchukramārāttiṣṭhantamāśugam || ### [1.63.54](https://indike.org/pramana/in.lit.mahabharata.vyasa*vulgate.1.63.54) sūkṣmadharmārthatattvajño gatvā śyenaṃ tato'bravīt | matpriyārthamidaṃ saumya śukraṃ mama gṛhaṃ naya || ### [1.63.55](https://indike.org/pramana/in.lit.mahabharata.vyasa*vulgate.1.63.55) girikāyāḥ prayacchāśu tasyā hyārtavamadya vai | gṛhītvā tattadā śyenastūrṇamutpatya vegavān || ### [1.63.56](https://indike.org/pramana/in.lit.mahabharata.vyasa*vulgate.1.63.56) javaṃ paramamāsthāya pradudrāva vihaṅgamaḥ | tamapaśyadathāyāntaṃ śyenaṃ śyenastathā'paraḥ || ### [1.63.57](https://indike.org/pramana/in.lit.mahabharata.vyasa*vulgate.1.63.57) abhyadravacca taṃ sadyo dṛṣṭvaivāmiṣaśaṅkayā | tuṇḍayuddhamathākāśe tāvubhau sampracakratuḥ || ### [1.63.58](https://indike.org/pramana/in.lit.mahabharata.vyasa*vulgate.1.63.58) yuddhyatorapatadretastaccāpi yamunāmbhasi | tatrādriketi vikhyātā brahmaśāpādvarāpsarā || ### [1.63.59](https://indike.org/pramana/in.lit.mahabharata.vyasa*vulgate.1.63.59) mīnabhāvamanuprāptā babhūva yamunācarī | śyenapādaparibhraṣṭaṃ tadvīryamatha vāsavam || ### [1.63.60](https://indike.org/pramana/in.lit.mahabharata.vyasa*vulgate.1.63.60) jagrāha tarasopetya sā'drikā matsyarūpiṇī | kadācidapi matsīṃ tāṃ babandhurmatsyajīvinaḥ || ### [1.63.61](https://indike.org/pramana/in.lit.mahabharata.vyasa*vulgate.1.63.61) māse ca daśame prāpte tadā bharatasattama | ujjahrurudarāttasyāḥ strīṃ pumāṃsaṃ ca mānuṣam || ### [1.63.62](https://indike.org/pramana/in.lit.mahabharata.vyasa*vulgate.1.63.62) āścaryabhūtaṃ tadgatvā rājñe'tha pratyavedayan | kāye matsyā imau rājansambhūtau mānuṣāviti || ### [1.63.63](https://indike.org/pramana/in.lit.mahabharata.vyasa*vulgate.1.63.63) tayoḥ pumāṃsaṃ jagrāha rājoparicarastadā | sa matsyo nāma rājāsīddhārmikaḥ satyasaṅgaraḥ || ### [1.63.64](https://indike.org/pramana/in.lit.mahabharata.vyasa*vulgate.1.63.64) sā'psarā muktaśāpā ca kṣaṇena samapadyata | yā puroktā bhagavatā tiryagyonigatā śubhā || ### [1.63.65](https://indike.org/pramana/in.lit.mahabharata.vyasa*vulgate.1.63.65) mānuṣau janayitvā tvaṃ śāpamokṣamavāpsyasi | tataḥ sā janayitvā tau viśastā matsyaghātibhiḥ || ### [1.63.66](https://indike.org/pramana/in.lit.mahabharata.vyasa*vulgate.1.63.66) santyajya matsyarūpaṃ sā divyaṃ rūpamavāpya ca | siddharṣicāraṇapathaṃ jagāmātha varāpsarāḥ || ### [1.63.67](https://indike.org/pramana/in.lit.mahabharata.vyasa*vulgate.1.63.67) sā kanyā duhitā tasyā matsyā matsyasagandhinī | rājñā dattā ca dāśāya kanyeyaṃ te bhavatviti || ### [1.63.68](https://indike.org/pramana/in.lit.mahabharata.vyasa*vulgate.1.63.68) rūpasatvasamāyuktā sarvaiḥ samuditā guṇaiḥ | sā tu satyavatī nāma matsyaghātyabhisaṃśrayāt || ### [1.63.69](https://indike.org/pramana/in.lit.mahabharata.vyasa*vulgate.1.63.69) āsītsā matsyagandhaiva kañcitkālaṃ śucismitā | śuśrūṣārthaṃ piturnāvaṃ vāhayantīṃ jale ca tām || ### [1.63.70](https://indike.org/pramana/in.lit.mahabharata.vyasa*vulgate.1.63.70) tīrthayātrāṃ parikrāmannapaśyadvai parāśaraḥ | atīvarūpasampannāṃ siddhānāmapi kāṅkṣitām || ### [1.63.71](https://indike.org/pramana/in.lit.mahabharata.vyasa*vulgate.1.63.71) dṛṣṭvaiva sa ca tāṃ dhīmāṃścakame cāruhāsinīm | divyāṃ tāṃ vāsavīṃ kanyāṃ rambhorūṃ munipuṅgavaḥ || ### [1.63.72](https://indike.org/pramana/in.lit.mahabharata.vyasa*vulgate.1.63.72) saṅgamaṃ mama kalyāṇi kuruṣvetyabhyabhāṣata | sābravītpaśya bhagavanparapāre sthitānṛṣīn || ### [1.63.73](https://indike.org/pramana/in.lit.mahabharata.vyasa*vulgate.1.63.73) āvayordṛṣṭayorebhiḥ kathaṃ nu syātsamāgamaḥ | evaṃ tayokto bhagavānnīhāramasṛjatprabhuḥ || ### [1.63.74](https://indike.org/pramana/in.lit.mahabharata.vyasa*vulgate.1.63.74) yena deśaḥ sa sarvastu tamobhūta ivābhavat | dṛṣṭvā sṛṣṭaṃ tu nīhāraṃ tatastaṃ paramarṣiṇā || ### [1.63.75](https://indike.org/pramana/in.lit.mahabharata.vyasa*vulgate.1.63.75) vismitā sābhavatkanyā vrīḍitā ca tapasvinī | satyavatyuvāca | viddhi māṃ bhagavankanyāṃ sadā pitṛvaśānugām || ### [1.63.76](https://indike.org/pramana/in.lit.mahabharata.vyasa*vulgate.1.63.76) tvatsaṃyogācca duṣyeta kanyābhāvo mamā'nagha | kanyātve dūṣite vāpi kathaṃ śakṣye dvijottama || ### [1.63.77](https://indike.org/pramana/in.lit.mahabharata.vyasa*vulgate.1.63.77) gṛhaṃ gantumṛṣe cāhaṃ dhīmanna sthātumutsahe | etatsañcintya bhagavanvidhatsva yadanantaram || ### [1.63.78](https://indike.org/pramana/in.lit.mahabharata.vyasa*vulgate.1.63.78) evamuktavatīṃ tāṃ tu prītimānṛṣisattamaḥ | uvāca matpriyaṃ kṛtvā kanyaiva tvaṃ bhaviṣyati || ### [1.63.79](https://indike.org/pramana/in.lit.mahabharata.vyasa*vulgate.1.63.79) vṛṇīṣva ca varaṃ bhīru yaṃ tvamicchasi bhāmini | vṛthā hi na prasādo me bhūtapūrvaḥ śucismite || ### [1.63.80](https://indike.org/pramana/in.lit.mahabharata.vyasa*vulgate.1.63.80) evamuktā varaṃ vavre gātrasaugandhyamuttamam | sa cāsyai bhagavānprādānmanaḥ kāṅkṣitaṃ bhuvi || ### [1.63.81](https://indike.org/pramana/in.lit.mahabharata.vyasa*vulgate.1.63.81) tato labdhavarā prītā strībhāvaguṇabhūṣitā | jagāma saha saṃsargamṛṣiṇā'dbhutakarmaṇā || ### [1.63.82](https://indike.org/pramana/in.lit.mahabharata.vyasa*vulgate.1.63.82) tasyāstu yojanādgandhamājighranta narā bhuvi || ### [1.63.83](https://indike.org/pramana/in.lit.mahabharata.vyasa*vulgate.1.63.83) tasyā yojanagandheti tato nāmāparaṃ smṛtam | iti satyavatī hṛṣṭā labdhvā varamanuttamam || ### [1.63.84](https://indike.org/pramana/in.lit.mahabharata.vyasa*vulgate.1.63.84) parāśareṇa saṃyuktā sadyo garbhaṃ suṣāva sā | jajñe ca yamunādvīpe pārāśaryaḥ sa vīryavān || ### [1.63.85](https://indike.org/pramana/in.lit.mahabharata.vyasa*vulgate.1.63.85) sa mātaramanujñāpya tapasyeva mano dadhe | smṛto'haṃ darśayiṣyāmi kṛtyeṣviti ca so'bravīt || ### [1.63.86](https://indike.org/pramana/in.lit.mahabharata.vyasa*vulgate.1.63.86) evaṃ dvaipāyano jajñe satyavatyāṃ parāśarāt | nyasto dvīpe yadbālastasmāddvaipāyanaḥ smṛtaḥ || ### [1.63.87](https://indike.org/pramana/in.lit.mahabharata.vyasa*vulgate.1.63.87) pādāpasāriṇaṃ dharmaṃ sa tu vidvānyuge yuge | āyuḥ śaktiṃ ca martyānāṃ yugāvasthāmavekṣyaca || ### [1.63.88](https://indike.org/pramana/in.lit.mahabharata.vyasa*vulgate.1.63.88) brahmaṇo brāhmaṇānāṃ ca tathānugrahakāṅkṣayā | vivyāsa vedānyasmatsa tasmādvyāsa iti smṛtaḥ || ### [1.63.89](https://indike.org/pramana/in.lit.mahabharata.vyasa*vulgate.1.63.89) vedānadhyāpayāmāsa mahābhāratapañcamān | sumantuṃ jaiminiṃ pailaṃ śukaṃ caiva svamātmajam || ### [1.63.90](https://indike.org/pramana/in.lit.mahabharata.vyasa*vulgate.1.63.90) prabhurvariṣṭho varado vaiśampāyanameva ca | saṃhitāstaiḥ pṛthaktvena bhāratasya prakāśitāḥ || ### [1.63.91](https://indike.org/pramana/in.lit.mahabharata.vyasa*vulgate.1.63.91) tathā bhīṣmaḥ śāntanavo gaṅgāyāmamitadyutiḥ | vasuvīryātsamabhavanmahāvīryo mahāyaśāḥ || ### [1.63.92](https://indike.org/pramana/in.lit.mahabharata.vyasa*vulgate.1.63.92) vaidārthavicca bhagavānṛṣirvipro mahāyaśāḥ | śūle protaḥ purāṇarṣiracauraścoraśaṅkayā || ### [1.63.93](https://indike.org/pramana/in.lit.mahabharata.vyasa*vulgate.1.63.93) aṇīmāṇḍavya ityevaṃ vikhyātaḥ sa mahāyaśāḥ | sa dharmamāhūya purā maharṣiridamuktavān || ### [1.63.94](https://indike.org/pramana/in.lit.mahabharata.vyasa*vulgate.1.63.94) iṣīkayā mayā bālyādviddhā hyekā śakuntikā | tatkilbiṣaṃ smare dharma nānyatpāpamahaṃ smare || ### [1.63.95](https://indike.org/pramana/in.lit.mahabharata.vyasa*vulgate.1.63.95) tanme sahasramamitaṃ kasmānnehājayattapaḥ | garīyānbrāhmaṇavadhaḥ sarvabhūtavadhādyataḥ || ### [1.63.96](https://indike.org/pramana/in.lit.mahabharata.vyasa*vulgate.1.63.96) tasmāttvaṃ kilbiṣī dhārma śūdrayonau janiṣyasi | tena śāpena dharmo'pi śūdrayonāvajāyata || ### [1.63.97](https://indike.org/pramana/in.lit.mahabharata.vyasa*vulgate.1.63.97) vidvānvidurarūpeṇa dhārmī tanurakilbiṣī | sañjayo munikalpastu jajñe sūto gavalgaṇāt || ### [1.63.98](https://indike.org/pramana/in.lit.mahabharata.vyasa*vulgate.1.63.98) sūryācca kuntikanyāyā jajñe karṇo mahābalaḥ | sahajaṃ kavacaṃ bibhratkuṇḍalo dyotitānanaḥ || ### [1.63.99](https://indike.org/pramana/in.lit.mahabharata.vyasa*vulgate.1.63.99) anugrahārthaṃ lokānāṃ viṣṇurlokanamaskṛtaḥ | vasudevāttu devakyāṃ prādurbhūto mahāyaśāḥ || ### [1.63.100](https://indike.org/pramana/in.lit.mahabharata.vyasa*vulgate.1.63.100) anādinidhano devaḥ sa kartā jagataḥ prabhuḥ | avyaktamakṣaraṃ brahma pradhānaṃ triguṇātmakam || ### [1.63.101](https://indike.org/pramana/in.lit.mahabharata.vyasa*vulgate.1.63.101) ātmānamavyayaṃ caiva prakṛtiṃ prabhavaṃ prabhum | puruṣaṃ viśvakarmāṇaṃ satvayogaṃ dhruvākṣaram || ### [1.63.102](https://indike.org/pramana/in.lit.mahabharata.vyasa*vulgate.1.63.102) anantamacalaṃ devaṃ haṃsaṃ nārāyaṇaṃ prabhum | dhātāramajamavyaktaṃ yamāhuḥ paramavyayam || ### [1.63.103](https://indike.org/pramana/in.lit.mahabharata.vyasa*vulgate.1.63.103) kaivalyaṃ nirguṇaṃ viśvamanādimajamavyayam | puruṣaḥ sa vibhuḥ kartā sarvabhūtapitāmahaḥ || ### [1.63.104](https://indike.org/pramana/in.lit.mahabharata.vyasa*vulgate.1.63.104) dharmasaṃvardhanārthāya prajajñe'ndhakavṛṣṇiṣu | astrajñau tu mahāvīryau sarvaśāstraviśāradau || ### [1.63.105](https://indike.org/pramana/in.lit.mahabharata.vyasa*vulgate.1.63.105) sātyakiḥ kṛtavarmā ca nārāyaṇamanuvratau | satyakāddhṛdikāccaiva jajñāte'stra viśāradau || ### [1.63.106](https://indike.org/pramana/in.lit.mahabharata.vyasa*vulgate.1.63.106) bharadvājasya ca skannaṃ droṇyāṃ śukramavardhata | maharṣerugratapasastasmāddroṇo vyajāyata || ### [1.63.107](https://indike.org/pramana/in.lit.mahabharata.vyasa*vulgate.1.63.107) gautamānmithunaṃ jajñe śarastambāccharadvataḥ | aśvatthāmnaśca jananī kṛpaścaiva mahābalaḥ || ### [1.63.108](https://indike.org/pramana/in.lit.mahabharata.vyasa*vulgate.1.63.108) aśvatthāmā tato jajñe droṇādeva mahābalaḥ | tathaiva dhṛṣṭadyumno'pi sākṣādagnisamadyutiḥ || ### [1.63.109](https://indike.org/pramana/in.lit.mahabharata.vyasa*vulgate.1.63.109) vaitāne karmaṇi tate pāvakātsamajāyata | vīro droṇavināśāya dhanurādāya vīryavān || ### [1.63.110](https://indike.org/pramana/in.lit.mahabharata.vyasa*vulgate.1.63.110) tathaiva vedyāṃ kṛṣṇāpi jajñe tejasvinī śubhā | vibhrājamānā vapuṣā bibhratī rūpamuttamam || ### [1.63.111](https://indike.org/pramana/in.lit.mahabharata.vyasa*vulgate.1.63.111) prahrādaśiṣyo nagnajitsubalaścābhavattataḥ | tasya prajā dharmahantrī jajñe devaprakopanāt || ### [1.63.112](https://indike.org/pramana/in.lit.mahabharata.vyasa*vulgate.1.63.112) gāndhārarājaputro'bhūcchakuniḥ saubalastathā | duryodhanasya jananī jajñāte'rthaviśāradau || ### [1.63.113](https://indike.org/pramana/in.lit.mahabharata.vyasa*vulgate.1.63.113) kṛṣṇadvaipāyanājjajñe dhṛtarāṣṭro janeśvaraḥ | kṣetre vicitravīryasya pāṇḍuścaiva mahābalaḥ || ### [1.63.114](https://indike.org/pramana/in.lit.mahabharata.vyasa*vulgate.1.63.114) dharmārthakuśalo dhīmānmedhāvī dhūtakalmaṣaḥ | viduraḥ śūdrayonau tu jajñe dvaipāyanādapi || ### [1.63.115](https://indike.org/pramana/in.lit.mahabharata.vyasa*vulgate.1.63.115) pāṇḍostu jajñire pañca putrā devasamāḥ pṛthak | dvayoḥ striyorguṇajyeṣṭhasteṣāmāsīdyudhiṣṭhiraḥ || ### [1.63.116](https://indike.org/pramana/in.lit.mahabharata.vyasa*vulgate.1.63.116) dharmādyudhiṣṭhiro jajñe mārutācca vṛkodaraḥ | indrāddhanañjayaḥ śrīmānsarvaśastrabhṛtāṃ varaḥ || ### [1.63.117](https://indike.org/pramana/in.lit.mahabharata.vyasa*vulgate.1.63.117) jajñāte rūpasampannāvaśvibhyāṃ ca yamāvapi | nakulaḥ sahadevaśca guruśuśrūṣaṇe ratau || ### [1.63.118](https://indike.org/pramana/in.lit.mahabharata.vyasa*vulgate.1.63.118) tathā putraśataṃ jajñe dhṛtarāṣṭrasya dhīmataḥ | duryodhanaprabhṛtayo yuyutsuḥ karaṇastathā || ### [1.63.119](https://indike.org/pramana/in.lit.mahabharata.vyasa*vulgate.1.63.119) tato duḥśāsanaścaiva duḥsahaścāpi bhārata | durmarṣaṇo vikarṇaśca citraseno viviṃśatiḥ || ### [1.63.120](https://indike.org/pramana/in.lit.mahabharata.vyasa*vulgate.1.63.120) jayaḥ satyavrataścaiva purumitraśca bhārata | vaiśyāputro yuyutsuśca ekādaśa mahārathāḥ || ### [1.63.121](https://indike.org/pramana/in.lit.mahabharata.vyasa*vulgate.1.63.121) abhimanyuḥ subhadrāyāmarjunādabhyajāyata | svasrīyo vāsudevasya pautraḥ pāṇḍormahātmanaḥ || ### [1.63.122](https://indike.org/pramana/in.lit.mahabharata.vyasa*vulgate.1.63.122) pāṇḍavebhyo hi pāñcālyāṃ draupadyāṃ pañca jajñire | kumārā rūpasampannāḥ sarvaśāstraviśāradāḥ || ### [1.63.123](https://indike.org/pramana/in.lit.mahabharata.vyasa*vulgate.1.63.123) prativindhyo yudhiṣṭhirātsutasomo vṛkodarāt | arjunācchrutakīrtistu śatānīkastu nākuliḥ || ### [1.63.124](https://indike.org/pramana/in.lit.mahabharata.vyasa*vulgate.1.63.124) tathaiva sahadevācca śrutasenaḥ pratāpavān | hiḍimbāyāṃ ca bhīmena vane jajñe ghaṭotkacaḥ || ### [1.63.125](https://indike.org/pramana/in.lit.mahabharata.vyasa*vulgate.1.63.125) śikhaṇḍī drupadājjajñe kanyā putratvamāgatā | yāṃ yakṣaḥ puruṣaṃ cakre sthūṇaḥ priyacikīrṣayā || ### [1.63.126](https://indike.org/pramana/in.lit.mahabharata.vyasa*vulgate.1.63.126) kurūṇāṃ vigrahe tasminsamāgacchanbahūnyathā | rājñāṃ śatasahasrāṇi yotsyamānāni saṃyuge || ### [1.63.127](https://indike.org/pramana/in.lit.mahabharata.vyasa*vulgate.1.63.127) teṣāmaparimeyānāṃ nāmadheyāni sarvaśaḥ | na śakyāni samākhyātuṃ varṣāṇāmayutairapi | ete tu kīrtitā mukhyā yairākhyānamidaṃ tatam || ## Other recensions (1) - [Mahābhārata](https://indike.org/pramana/in.lit.mahabharata.vyasa.1.57.1) — Vyāsa, Sanskrit --- Source: [https://indike.org/pramana/in.lit.mahabharata.vyasa*vulgate.1.63](https://indike.org/pramana/in.lit.mahabharata.vyasa*vulgate.1.63) · Pramāṇa