The Great Epic of the Bhārata dynasty 1.68

Vulgate (Nīlakaṇṭha's text) 1.68

janamejaya uvāca |
tvattaḥ śrutamidaṃ brahmandevadānavarakṣasām |
aṃśāvataraṇaṃ samyaggandharvāpsaraso tathā ||

imaṃ tu bhūya icchāmi kurūṇāṃ vaṃśamāditaḥ |
kathyamānaṃ tvayā vipra viprarṣigaṇasannidhau ||

vaiśampāyana uvāca |
yauravāṇāṃ vaṃśakaro duṣyanto nāma vīryavān |
pṛthivyāścaturantāyā goptā bharatasattama ||

caturbhāgaṃ bhuvaḥ kṛtsnaṃ yo bhuṅkte manujeśvaraḥ |
samudrāvaraṇāṃścāpi deśānsa samitiñjayaḥ ||

āmlecchāvadhikānsarvānsa bhuṅkte ripumardanaḥ |
ratnākarasamudrāṃ tāṃścāturvarṇyajanāvṛtān ||

na varṇasaṅkarakaro na kṛṣyākarakṛjjanaḥ |
na pāpakṛtkaścidāsīttasminrājani śāsati ||

dharme ratiṃ sevamānā dharmārthāvamipedire |
tadā narā naravyāghra tasmiñjanapadeśvare ||

nāsaccaurabhayaṃ tāta na kṣudhāmayamaṇvapi |
nāsīdvyādhibhayaṃ cāpi tasmiñjanapadeśvare ||

svadharme remire varṇā daive karmaṇi niḥspṛhāḥ |
tamāśritya mahīpālamāsaṃścaivākutobhayāḥ ||

kālavarṣī ca parjanyaḥ sasyāni rasavanti ca |
sarvaratnasamṛddhā ca mahī paśumatī tathā ||

svakarmaniratā viprā nānṛtaṃ teṣu vidyate |
sa cādbhutamahārvāryoṃ vajrasaṃhanano yuvā ||

udyamya mandaraṃ dorbhyāṃ vahetsavanakānanam |
catuṣpathagadayuddhe sarvapraharaṇeṣu ca ||

nāgapṛṣṭhe'śvapṛṣṭhe ca babhūva pariniṣṭhitaḥ |
bale viṣṇusamaścāsīttejasā bhāskaropamaḥ ||

akṣobhyatve'rṇavasamaḥ sahiṣṇutve dharāsamaḥ |
sammataḥ sa mahīpālaḥ prasannapurarāṣṭravān ||

bhūyo dharmaparairbhāvairmuditaṃ janamādiśat ||

Other recensions (1)