The Great Epic of the Bhārata dynasty 1.86
Vulgate (Nīlakaṇṭha's text) 1.86
- Language
- Sanskrit
1.86.1
vaiśampāyana uvāca |
evaṃ sa nāhuṣo rājā yayātiḥ putramīpsitam |
rājye'bhiṣicya mudito vānaprastho'bhavanmuniḥ ||
1.86.2
uṣitvā ca vane vāsaṃ brāhmaṇaiḥ saṃśitavrataḥ |
phalamūlāśano dāntastataḥ svargamito gataḥ ||
1.86.3
sa gataḥ svarnivāsaṃ taṃ nivasanmuditaḥ sukhī |
kālena nātimahatā punaḥ śakreṇa pātitaḥ ||
1.86.4
nipatanpracyutaḥ svargādaprāpto medinītalam |
sthita āsīdantarikṣe sa tadeti śrutaṃ mayā ||
1.86.5
tata eva punaścāpi gataḥ svargamiti śrutam |
rājñā vasumatā sārdhamaṣṭakena ca vīryavān ||
1.86.6
pratardanena śivinā sametya kila saṃsadi |
janamejaya uvāca |
karmaṇā kena sa divaṃ punaḥ prāpto mahīpatiḥ ||
1.86.7
sarvametadaśeṣeṇa śrotumicchāmi tattvataḥ |
kathyamānaṃ tvayā vipra viprarṣigaṇasannidhau ||
1.86.8
devarājasamo hyāsīdyayātiḥ pṛthivīpatiḥ |
vardhanaḥ kuruvaṃśasya vibhāvasusamadyutiḥ ||
1.86.9
tasya vistīrṇayaśasaḥ satyakīrtermahātmanaḥ |
caritaṃ śrotumicchāmi divi ceha ca sarvaśaḥ ||
1.86.10
vaiśampāyana uvāca |
hanta te kathayiṣyāmi yayāteruttarāṃ kathām |
divi ceha ca puṇyārthāṃ sarvapāpapraṇāśinīm ||
1.86.11
yayātirnāhuṣo rājā pūruṃ putraṃ kanīyasam |
rājye'bhiṣicya muditaḥ prāvavrāja vanaṃ tadā ||
1.86.12
antyuṣe sa vinikṣipya putrānyadupurogamān |
phalamūlāśano rājā vane sannyavasacciram ||
1.86.13
śaṃsitātmā jitakrodhastarpayanpitṛdevatāḥ |
agnīṃśca vidhivajjuhvanvānaprasthavidhānataḥ ||
1.86.14
athitīnpūjayāmāsa vanyena haviṣā vibhuḥ |
śiloñchavṛttimāsthāya śeṣānnakṛtabhojanaḥ ||
1.86.15
pūrṇaṃ varṣasahasraṃ ca evaṃ vṛttirabhūnnṛpaḥ |
abbhakṣaḥ śaradastriṃśadāsīnniyatavāṅmanāḥ ||
1.86.16
tataśca vāyubhakṣo'bhūtsaṃvatsaramatandritaḥ |
tathā pañcāgnimadhye ca tapastepe sa vatsaram ||
1.86.17
ekapādaḥ stitaścāsītṣaṇmāsānanilāśanaḥ |
puṇyakīrtistataḥ svarge jagāmāvṛtya rodasī ||
Other recensions (1)
- Mahābhārata — Vyāsa, Sanskrit