The Great Epic of the Bhārata dynasty 12.185

Vulgate (Nīlakaṇṭha's text) 12.185

bharadvāja uvāca |
pārthivaṃ dhātumāsādya śārīro'gniḥ kathaṃ prabho |
avakāśaviśeṣeṇa kathaṃ vartayate'nilaḥ ||

bhṛguruvāca |
vāyorgatimahaṃ brahman kathayiṣyāmi te'nagha |
prāṇināmanilo dehān yathā ceṣṭayate balī ||

śrito mūrdhānamagnistu śarīraṃ paripālayan |
prāṇo mūrdhani cāgnau ca vartamāno viceṣṭate ||

sa jantuḥ sarvabhūtātmā puruṣaḥ sa sanātanaḥ |
mano buddhirahaṅkāro bhūtāni viṣayaśca saḥ ||

evaṃ tviha sa sarvatra prāṇena paricālyate |
pṛṣṭhatastu samānena svāṃ svāṃ gatimupāśritaḥ ||

bastimūlaṃ gudaṃ caiva pāvakaṃ samupāśritaḥ |
vahanmūtraṃ purīṣaṃ cāpyapānaḥ parivartate ||

prayatne karmaṇi bale ya ekastriṣu vartate |
udāna iti taṃ prāhuradhyātmaviduṣo janāḥ ||

sandhiṣvapi ca sarveṣu sanniviṣṭastathā'nilaḥ |
śarīreṣu manuṣyāṇāṃ vyāna ityupadiśyate ||

dhātuṣvagnistu vitataḥ samānena samīritaḥ |
rasāndhātūṃśca doṣāṃśca vartayannavatiṣṭhate ||

apānaprāṇayormadhye prāṇāpānasamāhitaḥ |
samanvitastvadhiṣṭhānaṃ samyakpacati pāvakaḥ ||

āsyaṃ hi pāyuparyantamante syādgudasañjñitam |
srotastasmātprajāyante sarvasrotāṃsi dehinām ||

prāṇānāṃ sannipātācca sannipātaḥ prajāyate |
uṣmā cāgniriti jñeyo yo'nnaṃ pacati dehinām ||

agnivegavahaḥ prāṇo gudānte pratihanyate |
sa urdhvamāgamya punaḥ samutkṣipati pāvakam ||

pakvāśayastvadho nābhyāmūrdhvamāmāśayaḥ sthitaḥ |
nābhimadhye śarīrasya sarve prāṇāśca saṃsthitāḥ ||

prasthitā hṛdayātsarve tiryagūrdhvamadhastathā |
vahantyannarasānnāḍyo daśa prāṇapracoditāḥ ||

epa mārgo'tha yogānāṃ yena gacchanti tatpadam |
jitaklamāḥ samā dhīrā mūrdhanyātmānamādadhan ||

evaṃ sarveṣu vihitaḥ prāṇāpāneṣu dehinām |
tasminsamidhyate nityamagniḥ sthālyāmivāhitaḥ ||

Other recensions (1)