The Great Epic of the Bhārata dynasty 12.186

Vulgate (Nīlakaṇṭha's text) 12.186

bharadvāja uvāca |
yadi prāṇayate vāyurvāyureva viceṣṭate |
śvasityābhāṣate caiva tasmājjīvo nirarthakaḥ ||

yadūṣmabhāva āgneyo vahninā pacyate yadi |
agnirjarayate caitattasmājjīvo nirarthakaḥ ||

jantoḥ pramīyamāṇasya jīvo naivopalabhyate |
vāyureva jahātyenamūṣmabhāvaśca naśyati ||

yadi vāyumayo jīvaḥ saṃśleṣo yadi vāyunā |
vāyumaṇḍalavaddṛśyo gacchetsaha marudgaṇaiḥ ||

saṃśleṣo yadi vā tena yadi tasmātpraṇaśyati |
mahārṇavavimuktatvādanyatsalilabhājanam ||

kūpe vā salilaṃ dadyātpradīpaṃ vā hutāśane |
kṣipraṃ praviśya naśyeta yathā naśyatyasau tathā ||

pañcadhāraṇake hyasmin śarīre jīvitaṃ kutaḥ |
teṣāmanyatarābhāvāccaturṇāṃ nāsti saṃśayaḥ ||

naśyantyāpo hyanāhārādvāyurucchvāsanigrahāt |
naśyate koṣṭhabhedātkhamagnirnaśyatyabhojanāt ||

vyādhivarṇaparikleśairmedinī caiva śīryate |
pīḍite'nyatare hyeṣāṃ saṅghāto yāti pañcadhā ||

tasminpañcatvamāpanne jīvaḥ kimanudhāvati |
kiṃ vedayati vā jīvaḥ kiṃ śṛṇoti bravīti ca ||

eṣā gauḥ paralokasthaṃ tārayiṣyati māmiti |
yo dattvā mriyate jantuḥ sā gauḥ kaṃ tārayiṣyati ||

gauśca pratigrahītā ca dātā caiva samaṃ yadā |
ihaiva vilayaṃ yānti kutasteṣāṃ samāgamaḥ ||

vihagairupabhuktasya śailāgrātpatitasya ca |
agninā copayuktasya kutaḥ sañjīvanaṃ punaḥ ||

chinnasya yadi vṛkṣasya na mūlaṃ pratirohati |
bījānyasya pravartante mṛtaḥ kva punareṣyati ||

bījamātraṃ purā sṛṣṭaṃ yadetatparivartate |
mṛtāmṛtāḥ praṇaśyanti bījādbījaṃ pravartate ||

Other recensions (1)