The Great Epic of the Bhārata dynasty 12.211

Vulgate (Nīlakaṇṭha's text) 12.211

bhīṣma uvāca |
caturvidhāni bhūtāni sthāvarāṇi carāṇi ca |
avyaktaprabhavānyāhuravyaktanidhanāni ca |
avyaktalakṣaṇaṃ vidyādavyaktātmātmakaṃ manaḥ ||

yathā'śvatthakaṇīkāyāmantarbhūto mahādrumaḥ |
niṣpanno dṛśyate vyaktamavyaktātsambhavastathā ||

abhidravatyayaskāntamayo niścetanaṃ yathā |
svabhāvahetujā bhāvā yadvadanyadapīdṛśam ||

tadvadavyaktajā bhāvāḥ kartuḥ kāraṇalakṣaṇāḥ |
acetanāścetayituḥ kāraṇādabhisaṃhatā ||

na bhūrna khaṃ dyaurbhūtāni narṣayo na surāsurāḥ |
nānyadāsīdṛte jīvamāsedurna tu saṃhatam ||

pūrvaṃ nityaṃ sarvagataṃ manohetumalakṣaṇam |
ajñānakarmanirdiṣṭametatkāraṇalakṣaṇam ||

tatkāraṇairhi saṃyuktaṃ kāryasaṅgrahakārakam |
yenaitadvartate cakramanādinidhanaṃ mahat ||

avyaktanābhaṃ vyaktāraṃ vikāraparimaṇḍalam |
śretrajñādhiṣṭhitaṃ cakraṃ snigdhākṣaṃ vartate dhruvam ||

snigdhatvāttilavatsarvaṃ cakre'sminpīḍyate jagat |
tilapīḍairivākramya bhogairajñānasambhavaiḥ ||

karma tatkurute tarṣādahaṅkāraparigrahāt |
kāryakāraṇasaṃyoge sa heturupapāditaḥ ||

nābhyeti kāraṇaṃ kāryaṃ na kāryaṃ kāraṇaṃ tathā |
kāryavyaktena karaṇe kālo bhavati hetumān ||

hetuyuktāḥ prakṛtayo vikārāśca parasparam |
anyonyamabhivartante puruṣādhiṣṭhitāḥ sadā ||

rājasaistāmasairbhāvaiścyuto hetubalānvitaḥ |
kṣetrajñamevānuyāti pāṃsurvāterito yathā ||

na ca taiḥ spṛśyate bhāvairna te tena mahātmanā |
sarajasko'rajaskaśca naiva vāyurbhavedyathā ||

tathaitadantaraṃ vidyātsattvakṣetrajñayorbudhaḥ |
abhyāsātsa tathā yukto na gacchetprakṛtiṃ punaḥ ||

sandehametamutpannamacchinadbhagavānṛṣiḥ |
tathā vārtāṃ samīkṣeta kṛtalakṣaṇasammitām ||

bījānyagnyupadagdhāni na rohanti yathā punaḥ |
jñānadagdhaistathā kleśairnātmā sampadyate punaḥ ||

Other recensions (1)