[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [Mahābhārata](https://indike.org/pramana/in.lit.mahabharata.vyasa) › [Vulgate (Nilakantha's text)](https://indike.org/pramana/in.lit.mahabharata.vyasa*vulgate) › 12.211 # The Great Epic of the Bhārata dynasty 12.211 Vulgate (Nīlakaṇṭha's text) 12.211 - **Language:** Sanskrit ### [12.211.1](https://indike.org/pramana/in.lit.mahabharata.vyasa*vulgate.12.211.1) bhīṣma uvāca | caturvidhāni bhūtāni sthāvarāṇi carāṇi ca | avyaktaprabhavānyāhuravyaktanidhanāni ca | avyaktalakṣaṇaṃ vidyādavyaktātmātmakaṃ manaḥ || ### [12.211.2](https://indike.org/pramana/in.lit.mahabharata.vyasa*vulgate.12.211.2) yathā'śvatthakaṇīkāyāmantarbhūto mahādrumaḥ | niṣpanno dṛśyate vyaktamavyaktātsambhavastathā || ### [12.211.3](https://indike.org/pramana/in.lit.mahabharata.vyasa*vulgate.12.211.3) abhidravatyayaskāntamayo niścetanaṃ yathā | svabhāvahetujā bhāvā yadvadanyadapīdṛśam || ### [12.211.4](https://indike.org/pramana/in.lit.mahabharata.vyasa*vulgate.12.211.4) tadvadavyaktajā bhāvāḥ kartuḥ kāraṇalakṣaṇāḥ | acetanāścetayituḥ kāraṇādabhisaṃhatā || ### [12.211.5](https://indike.org/pramana/in.lit.mahabharata.vyasa*vulgate.12.211.5) na bhūrna khaṃ dyaurbhūtāni narṣayo na surāsurāḥ | nānyadāsīdṛte jīvamāsedurna tu saṃhatam || ### [12.211.6](https://indike.org/pramana/in.lit.mahabharata.vyasa*vulgate.12.211.6) pūrvaṃ nityaṃ sarvagataṃ manohetumalakṣaṇam | ajñānakarmanirdiṣṭametatkāraṇalakṣaṇam || ### [12.211.7](https://indike.org/pramana/in.lit.mahabharata.vyasa*vulgate.12.211.7) tatkāraṇairhi saṃyuktaṃ kāryasaṅgrahakārakam | yenaitadvartate cakramanādinidhanaṃ mahat || ### [12.211.8](https://indike.org/pramana/in.lit.mahabharata.vyasa*vulgate.12.211.8) avyaktanābhaṃ vyaktāraṃ vikāraparimaṇḍalam | śretrajñādhiṣṭhitaṃ cakraṃ snigdhākṣaṃ vartate dhruvam || ### [12.211.9](https://indike.org/pramana/in.lit.mahabharata.vyasa*vulgate.12.211.9) snigdhatvāttilavatsarvaṃ cakre'sminpīḍyate jagat | tilapīḍairivākramya bhogairajñānasambhavaiḥ || ### [12.211.10](https://indike.org/pramana/in.lit.mahabharata.vyasa*vulgate.12.211.10) karma tatkurute tarṣādahaṅkāraparigrahāt | kāryakāraṇasaṃyoge sa heturupapāditaḥ || ### [12.211.11](https://indike.org/pramana/in.lit.mahabharata.vyasa*vulgate.12.211.11) nābhyeti kāraṇaṃ kāryaṃ na kāryaṃ kāraṇaṃ tathā | kāryavyaktena karaṇe kālo bhavati hetumān || ### [12.211.12](https://indike.org/pramana/in.lit.mahabharata.vyasa*vulgate.12.211.12) hetuyuktāḥ prakṛtayo vikārāśca parasparam | anyonyamabhivartante puruṣādhiṣṭhitāḥ sadā || ### [12.211.13](https://indike.org/pramana/in.lit.mahabharata.vyasa*vulgate.12.211.13) rājasaistāmasairbhāvaiścyuto hetubalānvitaḥ | kṣetrajñamevānuyāti pāṃsurvāterito yathā || ### [12.211.14](https://indike.org/pramana/in.lit.mahabharata.vyasa*vulgate.12.211.14) na ca taiḥ spṛśyate bhāvairna te tena mahātmanā | sarajasko'rajaskaśca naiva vāyurbhavedyathā || ### [12.211.15](https://indike.org/pramana/in.lit.mahabharata.vyasa*vulgate.12.211.15) tathaitadantaraṃ vidyātsattvakṣetrajñayorbudhaḥ | abhyāsātsa tathā yukto na gacchetprakṛtiṃ punaḥ || ### [12.211.16](https://indike.org/pramana/in.lit.mahabharata.vyasa*vulgate.12.211.16) sandehametamutpannamacchinadbhagavānṛṣiḥ | tathā vārtāṃ samīkṣeta kṛtalakṣaṇasammitām || ### [12.211.17](https://indike.org/pramana/in.lit.mahabharata.vyasa*vulgate.12.211.17) bījānyagnyupadagdhāni na rohanti yathā punaḥ | jñānadagdhaistathā kleśairnātmā sampadyate punaḥ || ## Other recensions (1) - [Mahābhārata](https://indike.org/pramana/in.lit.mahabharata.vyasa.12.204.1) — Vyāsa, Sanskrit ## Linked texts (1) - [Nyāyamañjarī](https://indike.org/pramana/in.darsana.nyaya.nyayamanjari.2.1.390) — Jayanta Bhaṭṭa, Sanskrit --- Source: [https://indike.org/pramana/in.lit.mahabharata.vyasa*vulgate.12.211](https://indike.org/pramana/in.lit.mahabharata.vyasa*vulgate.12.211) · Pramāṇa