The Great Epic of the Bhārata dynasty 13.3

Vulgate (Nīlakaṇṭha's text) 13.3

yudhiṣṭhira uvāca | brāhmaṇyaṃ yadi duṣprāpyaṃ tribhirvaṇairnarādhipa |
kathaṃ prāptaṃ mahārāja kṣatriyeṇa mahātmanā ||

viśvāmitreṇa dharmātman brāhmaṇatvaṃ nararṣabha |
śrotumicchāmi tattvena tanme brūhi pitāmaha ||

tena hyamitavīryeṇa vasiṣṭhasya mahātmanaḥ |
hataṃ putraśataṃ sadyastapasā'pi pitāmaha ||

yātudhānāśca bahavo rākṣasāstigmatejasaḥ |
manyunā''viṣṭadehena sṛṣṭāḥ kālāntakopamāḥ ||

mahānkuśikavaṃśaśca brahmarṣiśatasaṅkulaḥ |
sthāpito naraloke'sminvidvadbrāhmaṇa saṃstutaḥ ||

ṛcīkasyātmajaścaiva śunaḥśepo mahātapāḥ |
vimokṣito mahāsatrātpaśutāmapyupāgataḥ ||

hariścandrakratau devāṃstoṣayitvā''tmatejasā |
putratāmanusamprāpto viśvāmitrasya dhīmataḥ ||

nābhivādayate jyeṣṭhaṃ devarātaṃ narādhipa |
putrāḥ pañcāśadevāpi śaptāḥ śvapacatāṃ gatāḥ ||

triśaṅkurbandhubhirmukta aikṣvākaḥ prītipūrvakam |
avākśirā divaṃ nīto dakṣiṇāmāśrito diśam ||

viśvāmitrasya vipulā nadī devarṣisevitā |
kauśikī ca śivā puṇyā brahmarṣisurasevitā ||

tapovighnakarī caiva pañcacūḍā susammatā |
rambhā nāmāpsarāḥ śāpādyasya śailatvamāgatā ||

tathaivāsya bhayādvadhvā vasiṣṭhaḥ salile purā |
ātmānaṃ majjayan śrīmān vipāśaḥ punarutthitaḥ ||

tadāprabhṛti puṇyā hi vipāśā'bhūnmahānadī |
vikhyātā karmaṇā tena vasiṣṭhasya mahātmanaḥ ||

vāgbhiśca bhagavānyena devasenāgragaḥ prabhuḥ |
stutaḥ prītamanāścāsīcchāpāccainamamuñcata ||

dhruvasyauttānapādasya brahmarṣīṇāṃ tathaiva ca |
madhye jvalati yo nityamudīcīmāśrito diśam ||

tasyaitāni ca karmāṇi tathānyāni ca kaurava |
kṣatriyasyetyato jātamidaṃ kautūhalaṃ mama ||

kimetaditi tattvena prabūhi bharatarṣama |
dehāntaramanāsādya kathaṃ sa brāhmaṇo'bhavat ||

etattatvena me tāta sarvamākhyātumarhasi |
mataṅgasya yathātattvaṃ tathaivaitadvadasva me ||

sthāne mataṅgā brāhmaṇyaṃ nālabhadbharatarṣabha |
caṇḍālayonau jāto hi kathaṃ brāhmaṇyamāptavān ||

Other recensions (1)