Pramāṇa · Search · About · API

The Great Epic of the Bhārata dynasty 13.45

Vulgate (Nīlakaṇṭha's text) 13.45

Language
Sanskrit

13.45.1

yudhiṣṭhira uvāca | kanyāyāḥ prāptaśulkāyāḥ patiścennāsti kaścana |
tatra kā pratipattiḥ syāttanme brūhi pitāmaha ||

13.45.2

bhīṣma uvāca | yā'putrakasya ṛddhasya pratipālyā tadā bhavet |
atha cennāharecchulkaṃ krītā śulkapradasya sā ||

13.45.3

tasyārthe'patyamīheta yena nyāyena śaknuyāt |
na tasmānmantravatkāryaṃ kaścitkurvīta kiñcana ||

13.45.4

svayaṃvṛtena sā''jñaptā pitrā vai pratyapadyata |
tattasyānye praśaṃsanti dharmajñā netare dvijāḥ ||

13.45.5

etattu nāpare cakrurapare jātu sādhavaḥ |
sādhūnāṃ punarācāro garīyāndharmalakṣaṇaḥ ||

13.45.6

asminneva prakaraṇe sukraturvākyamabravīt |
naptā videharājasya janakasya mahātmanaḥ ||

13.45.7

asadācarite mārge kathaṃ syāda‌nukīrtanam |
atra praśnaḥ saṃśayo vā satāmevamupālabhet ||

13.45.8

asadeva hi dharmasya pradānaṃ dharma āsuraḥ |
nānuśuśruma jātvetāmimāṃ pūrveṣu karmasu ||

13.45.9

bhāryāpatyorhi sambandhaḥ strīpuṃsoḥ svalpa eva tu |
ratiḥ sādhāraṇo dharma iti cāha sa pārthivaḥ ||

13.45.10

yudhiṣṭhira uvāca | atha kena pramāṇena puṃsāmādīyate dhanam |
putravaddhi pitustasya kanyā bhavitumarhati ||

13.45.11

bhīṣma uvāca | yathaivātmā tathā putraḥ putreṇa duhitā samā |
tasyāmātmani tiṣṭhantyāṃ kathamanyo dhanaṃ haret ||

13.45.12

mātuśca yautakaṃ yatsyātkumārībhāga eva saḥ |
dauhitra eva tadrikthamaputrasya piturharet ||

13.45.13

dadāti hi sapiṇḍānvai piturmātāmahasya ca |
putradauhitrayoreva viśeṣo nāsti dharmataḥ ||

13.45.14

anyatra jāmayā sārdhaṃ prajānāṃ putra īhate |
duhitā'nyatra jātena putreṇāpi viśiṣyate ||

13.45.15

dauhitrakeṇa dharmeṇa nātra paśyāmi kāraṇam |
vikrītāsu hi ye putrā bhavanti pitureva te ||

13.45.16

asūyavastvadharmiṣṭhāḥ parasvādāyinaḥ śaṭhāḥ |
āsurādadhisambhūtā dharmādviṣamavṛttayaḥ ||

13.45.17

atra gāthā yamodgītāḥ kīrtayanti purāvidaḥ |
dharmajñā dharmaśāstreṣu nibaddhā dharmasetuṣu ||

13.45.18

yo manuṣyaḥ svakaṃ putraṃ vikrīya dhanamicchati |
kanyāṃ vā jīvitārthāya yaḥ śulkena prayacchati ||

13.45.19

saptāvare mahāghore niraye kālasāhvaye |
svedaṃ mūtraṃ purīṣaṃ ca tasminmūḍhaḥ samaśrute ||

13.45.20

ārṣe gomithunaṃ śulkaṃ kecidāhurmṛṣaiva tat |
alpo vā bahu vā rājan vikrayastāvadeva saḥ ||

13.45.21

yadyapyācaritaḥ kaiścinnaiṣa dharmaḥ sanātanaḥ |
anyeṣāmapi dṛśyante lokataḥ sampravṛttayaḥ ||

13.45.22

vaśyāṃ kumārīṃ balato ye tāṃ samupabhuñjate |
ete pāpasya kartārastamasyandhe ca śerate ||

13.45.23

anyo'pyatha na vikreyo manuṣyaḥ kiṃ punaḥ prajāḥ |
adharmamūlairhi dhanaistairna dharmo'tha kaścana ||

Other recensions (1)

Linked texts (2)