The Great Epic of the Bhārata dynasty 13.46
Vulgate (Nīlakaṇṭha's text) 13.46
- Language
- Sanskrit
13.46.1
bhīṣma uvāca | prācetasasya vacanaṃ kīrtayanti purāvidaḥ |
yasyāḥ kiñcinādadate jñātayo na sa vikrayaḥ ||
13.46.2
arhaṇaṃ tatkumārīṇāmānṛśaṃsyatamaṃ ca tat |
sarvaṃ ca pratideyaṃ syātkanyāyai tadaśeṣataḥ ||
13.46.3
pitṛbhirbhrātṛbhiścāpi śvaśurairatha devaraiḥ |
pūjyā bhūṣayitavyāśca bahukalyāṇamīpsubhiḥ ||
13.46.4
yadi vai strī na roceta pumāṃsaṃ na pramodayet |
apramodātpunaḥ puṃsaḥ prajano na pravardhate ||
13.46.5
pūjyā lālayitavyāśca striyo nityaṃ janādhipa |
striyo yatra ca pūjyante ramante tatra devatāḥ ||
13.46.6
apūjitāśca yatraitāḥ sarvāstatrāphalāḥ kriyāḥ |
tadā caitatkulaṃ nāsti yadā śocanti jāmayaḥ ||
13.46.7
jāmīśaptāni gehāni nikṛttānīva kṛtyayā |
naiva bhānti na vardhante śriyā hīnāni pārthiva ||
13.46.8
striyaḥ puṃsāṃ paridade manurjigamiṣurdivam |
abalāḥ svalpakaupīnāḥ suhṛdaḥ satyajiṣṇavaḥ ||
13.46.9
īrṣavo mānakāmāśca caṇḍāśca suhṛdo'budhāḥ |
striyastu mānamarhanti tā mānayata mānavāḥ ||
13.46.10
strīpratyayo hi vai dharmo ratibhogāśca kevalāḥ |
paricaryā namaskārāstadāyattā bhavantu vaḥ ||
13.46.12
utpādanamapatyasya jātasya paripālanam |
prītyarthaṃ lokayātrāyāḥ paśyata strīnibandhanam |
sammānyamānāścaitā hi sarvakāryāṇyavāpsyatha |
videharājaduhitā cātra ślokamagāyata ||
13.46.13
nāsti yajñakriyā kācinna śrāddhaṃ nopavāsakam |
dharmaḥ svabhartṛśuśrūṣā tayā svargaṃ jayantyuta ||
13.46.14
pitā rakṣati kaumāre bhartā rakṣati yauvane |
putrāśca sthāvire bhāve na strī svātantryamarhati ||
13.46.15
śriya etāḥ striyo nāma satkāryā bhūtimicchatā |
pālitā nigṛhītā ca śrīḥ strī bhavati bhārata ||
Other recensions (1)
- Mahābhārata — Vyāsa, Sanskrit
Linked texts (3)
- Mānava Dharmaśāstra — Manu & Bhṛgu, Sanskrit
- Vivādaratnākara — Caṇḍeśvara, Sanskrit
- Smṛtiratnākara (Vivādaratnākara, Kṛtyaratnākara…) — Caṇḍeśvara Ṭhakkura, Sanskrit