The Great Epic of the Bhārata dynasty 13.89
Vulgate (Nīlakaṇṭha's text) 13.89
- Language
- Sanskrit
13.89.1
bhīṣma uvāca | yamastu yāni śrāddhāni provāca śaśabindave |
tāni me śṛṇu kāmyāni nakṣatreṣu pṛthak pṛthak ||
13.89.2
śrāddhaṃ yaḥ kṛttikāyoge kurvīta satataṃ naraḥ |
agnīnādhāya sāpatyo yajeta vigatajvaraḥ ||
13.89.3
apatyakāmo rohiṇyāṃ tejaskāmo mṛgottame |
krūrakarmā dadacchrāddhamārdrāyāṃ mānavo bhavet ||
13.89.4
dhanakāmo bhavenmartyaḥ kurvañchrāddhaṃ punarvasau |
puṣṭikāmo'tha puṣyeṇa śrāddhamīheta mānavaḥ ||
13.89.5
āśleṣāyāṃ dadacchrāddhaṃ dhīrānputrānprajāyate |
jñātīnāṃ tu bhavecchreṣṭho maghāsu śrāddhamāvapan ||
13.89.6
phalgunīṣu dadacchrāddhaṃ subhagaḥ śrāddhado bhavet |
apatyabhāguttarāsu hastena phalabhāgbhavet ||
13.89.7
citrāyāṃ tu dadat śrāddhaṃ labhedrūpavataḥ sutān |
svātiyoge pitṝnarcya vāṇijyamupajīvati ||
13.89.8
bahuputro viśākhāsu putramīhanbhavennaraḥ |
anurādhāsu kurvāṇo rājacakraṃ pravartayet ||
13.89.9
ādhipatyaṃ vrajenmartyo jyeṣṭhāyāmapavarjayan |
naraḥ kurukulaśreṣṭha ṛddho damapuraḥsaraḥ ||
13.89.10
mūle tvārogyamṛccheta yaśo''ṣāḍhāsu cottamam |
uttarāsu tvaṣāḍhāsu vītaśokaścarenmahīm ||
13.89.11
śrāddhaṃ tvabhijitā kurvanbhiṣaksiddhimavāpnuyāt |
śravaṇeṣu dadacchrāddhaṃ pretya gacchetsa tadgatim ||
13.89.12
rājyabhāgī dhaniṣṭhāyāṃ bhaveta niyataṃ naraḥ |
nakṣatre vāruṇe kurvan bhiṣaksiddhimavāpnuyāt ||
13.89.13
pūrvaproṣṭhapadāḥ kurvan bahūnvindatyajāvikān |
uttarāsu prakurvāṇo vindate gāḥ sahasraśaḥ ||
13.89.14
bahukupyakṛtaṃ vittaṃ vindate revatīṃ śritaḥ |
aśvinīṣvaśvānvindeta bharaṇīṣvāyuruttamam ||
13.89.15
imaṃ śrāddhavidhiṃ śrutvā śaśabindustathākarot |
akleśenājayaccāpi mahīṃ so'nuśaśāsa ha ||
Other recensions (1)
- Mahābhārata — Vyāsa, Sanskrit