The Great Epic of the Bhārata dynasty 2.6
Vulgate (Nīlakaṇṭha's text) 2.6
- Language
- Sanskrit
2.6.1
vaiśamāpāyana uvāca |
sampūjyāthābhyanujñāto maharṣervacanātparam |
pratyuvācānupūrvyeṇa dharmarājo yudhiṣṭhiraḥ ||
2.6.2
yudhiṣṭhira uvāca |
bhagavannyāyyamāhaitaṃ yathāvaddharmaniścayam |
yathāśakti yathānyāyaṃ kriyate'yaṃ vidhirmayā ||
2.6.3
rājabhiryadyathā kāryaṃ purā vai tanna saṃśayaḥ |
yathānyāyopanītārthaṃ kṛtaṃ hetumadarthavat ||
2.6.4
vayaṃ tu satpathaṃ teṣāṃ yātumicchāmahe prabho |
na tu śakyaṃ tathā gantuṃ yathā tairniyatātmabhiḥ ||
2.6.5
vaiśampāyana uvāca |
ekamuktvā sa dharmātmā vākyaṃ tadabhipūjya ca |
muhūrtātprāptakālaṃ ca dṛṣṭvā lokacaraṃ munim ||
2.6.6
nāradaṃ susthamāsīnamupāsīno yudhiṣṭhiraḥ |
apṛcchatpāṇḍavastatra rājamadhye māhadyutiḥ ||
2.6.7
yudhiṣṭhira uvāca |
bhavānsañcarate lokānsadā nānāvidhānbahūn |
brahmaṇā nirmitānpūrvaṃ prekṣamāṇo manojavaḥ ||
2.6.8
īdṛśī bhavitā kāciddṛṣṭapūrvā sabhā kvacit |
ito vā śreyasī brahmaṃstanmamācakṣva pṛcchataḥ ||
2.6.9
vaiśampāyana uvāca |
tacchrutvā nāradastasya dharmarājasya bhāṣitam |
pāṇḍavaṃ pratyuvācedaṃ smayanmadhurayā girā ||
2.6.10
nārada uvāca |
mānuṣeṣu na me tāta dṛṣṭapūrvā na ca śrutā |
sabhā maṇimayī rājanyatheyaṃ tava bhārata ||
2.6.11
sabhāṃ tu pitṛrājasya varuṇasya ca dhīmataḥ |
kathayiṣye tathendrasya kailāsanilayasya ca ||
2.6.12
brahmaṇaśca sabhāṃ divyāṃ kathayiṣye gataklamām |
divyādivyairabhiprāyairupetāṃ viśvarūpiṇīm ||
2.6.13
devaiḥ pitṛgaṇaiḥ sādhyairyajvabhirniyatātmabhiḥ |
juṣṭāṃ munigaṇaiḥ śāntairvedayajñaiḥ sadakṣiṇaiḥ |
yadi te śravaṇe buddhirvartate bharatarṣabha ||
2.6.14
nāradenaivamuktastu dharmarājo yudhiṣṭhiraḥ |
prāñjalirbhrātṛbhiḥ sārdhaṃ taiśca sarvairdvijottamaiḥ ||
2.6.15
nāradaṃ pratyuvācedaṃ dharmarājo mahāmanāḥ |
sabhāḥ kathaya tāḥ sarvāḥ śrotumicchāmahe vayam ||
2.6.16
kindravyāstāḥ sabhā brahmankiṃvistārāḥ kimāyatāḥ |
pitāmahaṃ ca ke tasyāṃ sabhāyāṃ paryupāsate ||
2.6.17
vāsavaṃ devarājaṃ ca yamaṃ vaivasvataṃ ca ke |
varuṇaṃ ca kuberaṃ ca sabhāyāṃ paryupāsate ||
2.6.18
etatsarvaṃ yathānyāyaṃ brahmarṣe vadatastava |
śrotumicchāma sahitāḥ paraṃ kautūhalaṃ hi naḥ ||
2.6.19
evamuktaḥ pāṇḍavena nāradaḥ pratyabhāṣata |
krameṇa rājandivyāstāḥ śrūyantāmiha naḥ sabhāḥ ||
Other recensions (1)
- Mahābhārata — Vyāsa, Sanskrit
Linked texts (1)
- Paiṭhan Plates of Ramacandra śaka 1193 — Sanskrit