Pramāṇa · Search · About · API

The Great Epic of the Bhārata dynasty 3.101

Vulgate (Nīlakaṇṭha's text) 3.101

Language
Sanskrit

3.101.1

lomaśa uvāca |
tataḥ sa vajrī balibhirdaivatairabhirakṣitaḥ |
āsasāda tato vṛtraṃ sthitamāvṛtya rodasī ||

3.101.2

kālakeyairmahākāyaiḥ samantādabhirakṣitam |
samudyatapraharaṇaiḥ saśṛṅgairiva parvataiḥ ||

3.101.3

tato yuddhaṃ samabhavaddevānāṃ dānavaiḥ saha |
muhūrtaṃ bharataśreṣṭha lokatrāsakaraṃ mahat ||

3.101.4

udyatapratipiṣṭānāṃ khaḍgānāṃ vīrabāhubhiḥ |
āsītsutumulaḥ śabdaḥ śarīreṣvabhipātyatām ||

3.101.5

śirobhiḥ prapatadbhiścāpyantarikṣānmahītalam |
tālairiva mahārāja vṛntādbhraṣṭairadṛśyata ||

3.101.6

te hemakavacā bhūtvā kāleyāḥ parighāyudhāḥ |
tridaśānabhyavartanta dāvadagdhā ivādrayaḥ ||

3.101.7

teṣāṃ vegavatāṃ vegaṃ sābhimānaṃ pradhāvatām |
na śekustridaśāḥ soḍhuṃ te bhagnāḥ prādravanbhayāt ||

3.101.8

tāndṛṣṭvā dravato bhītānsahasrākṣaḥ purandaraḥ |
vṛtre vivardhamāne ca kaśmalaṃ mahadāviśat ||

3.101.9

kāleyabhayasantrasto devaḥ sākṣātpurandaraḥ |
jagāma śaraṇaṃ śīghraṃ taṃ tu nārāyaṇaṃ prabhum ||

3.101.10

taṃ śakraṃ kaśmalāviṣṭaṃ dṛṣṭvā viṣṇuḥ sanātanaḥ |
svatejo vyadadhacchakre balamasya vivardhayan ||

3.101.11

viṣṇunā gopitaṃ śakraṃ dṛṣṭvā devagaṇāstataḥ |
sarve tejaḥ samādadhyustathā brahmarṣayo'malāḥ ||

3.101.12

sa samāpyāyitaḥ śakro viṣṇunā daivataiḥ saha |
ṛṣibhiśca mahābhāgairbalavānsamapadyata ||

3.101.13

jñātvā balasthaṃ tridaśādhipaṃ tu nanāda vṛtro mahato ninādān |
tasya praṇādena dharā diśaśca khaṃ dyaurnagāścāpi cacāla sarvam ||

3.101.14

tato mahendraḥ paramābhitaptaḥ śrutvā ravaṃ ghorarūpaṃ mahāntam |
bhaye nimagnastvarito mumoca vajraṃ mahattasya vadhāya rājan ||

3.101.15

sa śakravajrābhihataḥ papāta mahāsuraḥ kāñcanamālyadhārī |
yathā mahāśailavaraḥ purastātsa mando viṣṇukarādvimuktaḥ ||

3.101.16

tasminhate daityavare bhayārtaḥ śakraḥ pradudrāva saraḥ praveṣṭum |
vajraṃ sa mene na karādvimuktaṃ vṛtraṃ bhayāccāpi hataṃ na mene ||

3.101.17

sarve ca devā muditāḥ prahṛṣṭā maharṣayaścendramabhiṣṭuvantaḥ |
sarvāṃśca daityāṃstvaritāḥ sametya jaghnuḥ surā vṛtravadhābhitaptān ||

3.101.18

taistrāsyamānāstridaśaiḥ sametaiḥ samudramevāviviśurbhayārtāḥ |
praviśya caivodadhimaprameyaṃ jhaṣākulaṃ nakrasamākulaṃ ca ||

3.101.19

tadā sma mantraṃ sahitāḥ pracakrustrailokyanāśārthamabhismayantaḥ |
tatra sma kecinmatiniścayajñāstāṃstānupāyānupavarṇayanti ||

3.101.20

teṣāṃ tu tatra kramakālayogāddhorā matiścintayatāṃ babhūva |
ye santi vidyātapasopapannāsteṣāṃ vināśaḥ prathamaṃ tu kāryaḥ ||

3.101.21

lokā hi sarve tapasā dhriyante tasmāttvaradhvaṃ tapasaḥ kṣayāya |
ye santi kecicca vasundharāyāṃ tapasvino dharmavidaśca tajjñāḥ ||

3.101.22

teṣāṃ vadhaḥ kriyatāṃ kṣiprameva teṣu pranaṣṭeṣu jagatpranaṣṭam |
evaṃ hi sarve gatabuddhibhāvā jagadvināśe paramaprahṛṣṭāḥ ||

3.101.23

durgaṃ samāśritya mahormimantaṃ ratnākaraṃ varuṇasyālayaṃ sma ||

Commentaries (5)

Other recensions (1)

Linked texts (1)