The Great Epic of the Bhārata dynasty 3.102
Vulgate (Nīlakaṇṭha's text) 3.102
- Language
- Sanskrit
3.102.1
lomaśa uvāca |
samudraṃ te samāśritya varuṇaṃ nidhimambhasaḥ |
kāleyāḥ sampravartanta trailokyasya vināśane ||
3.102.2
te rātrau samabhikruddhā bhakṣayanti sadā munīn |
āśrameṣu ca ye santi puṇyeṣvāyataneṣu ca ||
3.102.3
vasiṣṭhasyāśrame viprā bhakṣitāstairdurātmabhiḥ |
aśītiḥ śatamaṣṭau ca nava cānye tapakhinaḥ ||
3.102.4
cyavanasyāśrame gatvā puṇyaṃ dvijaniṣevitam |
phalamūlāśanānāṃ hi munīnāṃ bhakṣitaṃ śatam ||
3.102.5
evaṃ rātrau sma kurvanti viviśuścārṇavaṃ divā |
bharadvājāśrame caiva niyatā brahmacāriṇaḥ ||
3.102.6
vāyvāhārāmbubhakṣāśca viṃśatiḥ sanniṣūditāḥ |
evaṃ krameṇa sarvāṃstānāśramāndānavāstadā ||
3.102.7
niśāyāṃ paribādhante mattā bhujabalāśrayāt |
kālopasṛṣṭāḥ kāleyā ghnanto dvija gaṇānbahūn ||
3.102.8
na cainānanvabudhyanta manujā manujottama |
evaṃ pravṛttāndaityāṃstāṃstāpaseṣu tapasviṣu ||
3.102.9
prabhāte samadṛśyanta niyatāhārakarśitāḥ |
mahītalasthā munayaḥ śarīrairgatajīvitaiḥ ||
3.102.10
kṣīṇamāṃsairvirudhirairvimajjāntrairvisandhibhiḥ |
ākīrṇairābabhau bhūmiḥ śaṅkhānāmiva rāśibhiḥ ||
3.102.11
kalaśairvipraviddheśca sruvairbhagnaistathaiva ca |
vikīrṇairagnihotraiśca bhūrbabhūva samāvṛtā ||
3.102.12
niḥsvādhyāyavaṣaṭkāraṃ naṣṭayajñotsavakriyam |
jagadāsīnnirutsāhaṃ kāleyabhayapīḍitam ||
3.102.13
evaṃ saṅkṣīyamāṇāśca mānavā manujeśvara |
ātmatrāṇaparābhītāḥ prādravanta diśo bhayāt ||
3.102.14
kecidguhāḥ praviviśurnirjharāṃścāpare tathā |
apare maraṇodvignā bhayātprāṇānsamutsṛjan ||
3.102.15
kecidatra maheṣvāsāḥ śūrāḥ paramaharṣitāḥ |
mārgamāṇāḥ paraṃ yatnaṃ dānavānāṃ pracakrire ||
3.102.16
na caitānadhijagmuste samudraṃ samupāśritān |
śramaṃ jagmuśca paramamājagmuḥ kṣayameva ca ||
3.102.17
jagatyupaśamaṃ yāte naṣṭayajñotsavakriye |
ājagmuḥ paramāmārtiṃ tridaśā manujeśvara ||
3.102.18
sametya samahendrāśca bhayānmantraṃ pracakrire |
śaraṇyaṃ śaraṇaṃ devaṃ nārāyaṇamajaṃ vibhum ||
3.102.19
te'bhigamya namaskṛtya vaikuṇṭhamaparājitam |
tato devāḥ samastāste tadocurmadhusūdanam ||
3.102.20
tvaṃ naḥ sraṣṭā ca bhartā ca hartā ca jagataḥ prabho |
tvayā sṛṣṭamidaṃ viśvaṃ yacceṅgaṃ yacca neṅgati ||
3.102.21
tvayā bhūmiḥ purā naṣṭā samudrātpuṣkarekṣaṇa |
vārāhaṃ vapurāśritya jagadarthe samuddhatā ||
3.102.22
ādidaityo mahāvīryo hiraṇyakaśipuḥ purā |
nārasiṃhaṃ vapuḥ kṛtvā sūditaḥ puruṣottama ||
3.102.23
avadhyaḥ sarvabhūtānāṃ baliścāpi mahāsuraḥ |
vāmanaṃ vapurāśritya trailokyādbhraṃśitastvayā ||
3.102.24
asuraśca maheṣvāso jambha ityabhiviśrutaḥ |
yajñakṣobhakaraḥ krūrastvayaiva vinipātitaḥ ||
3.102.25
evamādīni karmāṇi yeṣāṃ saṅkhyā na vidyate |
asmākaṃ bhayabhītānāṃ tvaṃ gatirmadhusūdana ||
3.102.26
tasmāttvāṃ devadeveśa lokārthaṃ śāpayāmahe |
rakṣa lokāṃśca devāṃśca śakraṃ ca mahato bhayāt ||
Other recensions (1)
- Mahābhārata — Vyāsa, Sanskrit
Linked texts (1)
- Padmapurāṇa — Vyāsa, Sanskrit