The Great Epic of the Bhārata dynasty 3.103

Vulgate (Nīlakaṇṭha's text) 3.103

devā ūcuḥ |
tava prasādādvardhante prajāḥ sarvāścaturvidhāḥ |
tā bhāvitā bhāvayanti havyakavyairdivaukasaḥ ||

lokā hyevaṃ vivardhante hyanyo'nyaṃ samupāśritāḥ |
tvatprasādānnirudvignāstvayaiva parirakṣitāḥ ||

idaṃ ca samanuprāptaṃ lokānāṃ bhayamuttamam |
na ca jānīma keneme rātrau vadhyanti brāhmaṇāḥ ||

kṣīṇeṣu ca brāhmaṇeṣu pṛthivī kṣayameṣyati |
tataḥ pṛthivyāṃ kṣīṇāyāṃ tridivaṃ kṣayameṣyati ||

tvatprasādānmahābāho lokāḥ sarve jagatpate |
vināśaṃ nādhigaccheyustvayā vai parirakṣitāḥ ||

viṣṇuruvāca |
viditaṃ me surāḥ sarvaṃ prajānāṃ kṣayakāraṇam |
bhavatāṃ cāpi vakṣyāmi śṛṇudhvaṃ vigatajvarāḥ ||

kāleya iti vikhyāto gaṇaḥ paramadāruṇaḥ |
taiśca vṛtraṃ samāśritya jagatsarvaṃ pramāthitam ||

te vṛtraṃ nihataṃ dṛṣṭvā sahasrākṣeṇa dhīmatā |
jīvitaṃ parirakṣantaḥ praviṣṭā varuṇālayam ||

te praviśyodadhiṃ ghoraṃ nakragrāhasamākulam |
utsādanārthaṃ lokānāṃ rātrau ghnanti ṛṣīniha ||

na tu śakyāḥ kṣayaṃ netuṃ samudrāśrayagā hi te |
samudrasya kṣaye buddhirbhavadbhiḥ sampradhāryatām ||

agastyena vinā ko hi śakto'nyorṇavaśoṣaṇe |
anyathā hi na śakyāste vinā sāgaraśoṣaṇam ||

etacchrutvā tadā devā viṣṇunā samudāhṛtam |
parameṣṭhinamājñāpya agastyasyāśramaṃ yayuḥ ||

tatrāpaśyanmahātmānaṃ vāruṇiṃ dīptatejasam |
upāsyamānamṛṣibhirdevairiva pitāmaham ||

te'bhigamya mahātmānaṃ maitrāvaruṇimacyutam |
āśramasthaṃ taporāśiṃ karmabhiḥ svairabhiṣṭuvan ||

devā ūcuḥ |
nāhuṣeṇābhitaptānāṃ tvaṃ lokānāṃ gatiḥ purā |
bhraṃśitaśca suraiśvaryātsvarlokāllokakaṇṭakaḥ ||

krodhātpravṛddhaḥ sahasā bhāskarasya nagottamaḥ |
vacastavānatikrāmanvindhyaḥ śailo na vardhate ||

tamasā cāvṛte loke mṛtyunābhyarditāḥ prajāḥ |
tvāmeva nāthamāsādya nirvṛtiṃ paramāṃ gatāḥ ||

asmākaṃ bhayabhītānāṃ nityaśo bhagavāngatiḥ |
tatastvārtāḥ prayācāmo varaṃ tvāṃ varado hyasi ||

Other recensions (1)