The Great Epic of the Bhārata dynasty 3.104
Vulgate (Nīlakaṇṭha's text) 3.104
- Language
- Sanskrit
3.104.1
yudhiṣṭhira uvāca |
kimarthaṃ sahasā vindhyaḥ pravṛddhaḥ krodhamūrcchitaḥ |
etadicchāmyahaṃ śrotuṃ vistareṇa mahāmune ||
3.104.2
lomaśa uvāca |
adrirājaṃ mahāśailaṃ meruṃ kanakaparvatam |
udayāstamane bhānuḥ pradakṣiṇamavartata ||
3.104.3
taṃ tu dṛṣṭvā tathā vindhyaḥ śailaḥ sūryamathābravīt |
yathā hi merurbhavatā nityaśaḥ parigamyate ||
3.104.4
pradakṣiṇaśca kriyate māmevaṃ kuru bhāskara |
evamuktastataḥ sūryaḥ śailendraṃ pratyabhāṣata ||
3.104.5
nāhamātmacchayā śailaṃ karomyenaṃ pradakṣiṇam |
eṣa mārgaḥ pradiṣṭo me yairidaṃ nirmitaṃ jagat ||
3.104.6
evamuktastataḥ krodhātpravṛddhaḥ sahasācalaḥ |
sūryācandramasormārgaṃ roddhumicchanparantapa ||
3.104.7
tato devāḥ sahitāḥ sarva eva vindhyaṃ samāgamya mahādrirājam |
nivārayāmāsurupāyatastaṃ na ca sma teṣāṃ vacanaṃ cakāra ||
3.104.8
athābhijagmurmunimāśramasthaṃ tapasvinaṃ dharmabhṛtāṃ variṣṭham |
agastyamatyadbhutavīryavantaṃ taṃ cārthamūcuḥ sahitāḥ surāste ||
3.104.9
devā ūcuḥ |
sūryācandramasormārgaṃ nakṣatrāṇāṃ gatiṃ tathā |
śailarājo vṛṇotyeṣa vindhyaḥ krodhavaśānugaḥ ||
3.104.10
taṃ nivārayituṃ śakto nānyaḥ kaściddvijottama |
ṛte tvāṃ hi mahābhāga tasmādenaṃ nivāraya ||
3.104.11
tacchrutvā vacanaṃ vipraḥ surāṇāṃ śailamabhyagāt |
so'bhigamyābravīdvindhyaṃ sadāraḥ samupasthitam ||
3.104.12
mārgamicchāmyahaṃ dattaṃ bhavatā parvatottama |
dakṣiṇāmabhigantāsmi diśaṃ kāryeṇa kenacit ||
3.104.13
yāvadāgamanaṃ mahyaṃ tāvattvaṃ pratipālaya |
nivṛtte mayi śailendra tato vardhasva kāmataḥ ||
3.104.14
evaṃ sa samayaṃ kṛtvā vindhyenāmitrakarśana |
adyāpi dakṣiṇāddeśādvāruṇirna nivartate ||
3.104.15
etatte sarvamākhyātaṃ yathā vindhyo na vardhate |
agastyasya prabhāveṇa yanmāṃ tvaṃ paripṛcchasi ||
3.104.16
kāleyāstu yathā rājansuraiḥ sarvairniṣūditāḥ |
agastyādvaramāsādya tanme nigadataḥ śṛṇu ||
3.104.17
tridaśānāṃ vacaḥ śrutvā maitrāvaruṇirabravīt |
kimarthamabhiyātāḥ stha varaṃ mattaḥ kamicchatha |
evamuktāstatastena devatā munimabruvan ||
3.104.18
evaṃ tvayecchāma kṛtaṃ hi kāryaṃ mahārṇavaṃ pīyamānaṃ mahātman |
tato vadhiṣyāma sahānubandhān kāleyasañjñānsuravidviṣastān ||
3.104.19
tridaśānāṃ vacaḥ śrutvā tatheti munirabravīt |
kariṣye bhavatāṃ kāmaṃ lokānāṃ ca mahatsukham ||
3.104.20
evamuktvā tato'gacchatsamudraṃ saritāṃ patim |
ṛṣibhiśca tapaḥ siddhaiḥ sārdhaṃ devaiśca suvrata ||
3.104.21
manuṣyoragagandharvayakṣakimpuruṣāstathā |
anujagmurmahātmānaṃ draṣṭukāmāstadadbhutam ||
3.104.22
tato'bhyagacchansahitāḥ samudraṃ bhīmaniḥsvanam |
nṛtyantamiva cormībhirvalgantamiva vāyunā ||
3.104.23
hasantamiva phenaughaiḥ skhalantaṃ kandareṣu ca |
nānāgrāhasamākīrṇaṃ nānādvijagaṇānvitam ||
3.104.24
agastyasahitā devāḥ sagandharvamahoragāḥ |
ṛṣayaśca mahābhāgāḥ samāsedurmahodadhim ||
Other recensions (1)
- Mahābhārata — Vyāsa, Sanskrit
Linked texts (1)
- Padmapurāṇa — Vyāsa, Sanskrit