The Great Epic of the Bhārata dynasty 3.182: Mārkaṇḍeyasamāsyāparva

Vulgate (Nīlakaṇṭha's text) 3.182

vaiśampāyana uvāca |
nidāghāntakaraḥ kālaḥ sarvabhūtasukhāvahaḥ |
tatraiva vasatāṃ teṣāṃ prāvṛṭ samabhipadyata ||

chādayanto mahāghoṣāḥ khaṃ diśaśca balāhakāḥ |
pravavarṣurdivārātramasitāḥ satataṃ tadā ||

tapātyayaniketāśca śataśo'tha sahasraśaḥ |
apetārkaprabhājālāḥ savidyudvimalaprabhāḥ ||

virūḍhaśaṣpā dharaṇī mattadaṃśasarīsṛpā |
babhūva payasā siktā śāntā sarvamanoramā ||

na sma prajñāyate kiñcidambhasā samavastṛte |
samaṃ vā viṣamaṃ vā'pi nadyo vā sthāvarāṇi ca ||

kṣubdhatoyā mahāvegāḥ śvasamānā ivāśugāḥ |
sindhavaḥ śobhayāñcakruḥ kānanāni tapātyaye ||

nadatāṃ kānanānteṣu śrūyante vividhāḥ svanāḥ |
vṛṣṭibhiścchādyamānānāṃ varāhamṛgapakṣiṇām ||

stokakāḥ śikhinaścaiva puṃskokilagaṇaiḥ saha |
mattāḥ paripatanti sma dardurāścaiva darpitāḥ ||

tathā bahuvidhākārā prāvṛṇmeghānunāditā |
abhyatītā śivā teṣāṃ caratāṃ marudhanvasu ||

krauñcahaṃsasamākīrṇā śarat pramuditā'bhavat |
rūḍhakakṣavanaprasthā prasannajalanimnagā ||

vimalākāśanakṣatrā śaratteṣāṃ śivā'bhavat |
mṛgadvijasamākīrṇā pāṇḍavānāṃ mahātmanām ||

dṛśyante śāntarajasaḥ kṣapā jaladaśatilāḥ |
grahanakṣatrasaṅghaiśca somena ca virājitāḥ ||

kumudaiḥ puṇḍarīkaiśca śītavāridharāḥ śivāḥ |
nadīḥ puṣkariṇīścaiva dadṛśuḥ samalaṅkṛtāḥ ||

ākāśanīkāśataṭāṃ tīravānīrasaṅkulām |
babhūva caratāṃ harṣaḥ puṇyatīrthāṃ sarasvatīm ||

te vai mumudire vīrāḥ prasannasalilāṃ śivām |
paśyanto dṛḍhadhanvānaḥ paripūrṇāṃ sarasvatīm ||

teṣāṃ puṇyatamā rātriḥ parvasandhau sma śāradī |
tatraiva vasatāmāsīt kārtikī janamejaya ||

puṇyakṛdbhirmahāsattvaistāpasaiḥ saha pāṇḍavāḥ |
tat sarve bharataśreṣṭhāḥ samūhuryogamuttamam ||

tamistrābhyudaye tasmin dhaubhyena saha pāṇḍavāḥ |
sūtaiḥ paurogavaiścaiva kāmyakaṃ prayayurvanam ||

Other recensions (1)