The Great Epic of the Bhārata dynasty 3.262: Draupadīharaṇaparva
Vulgate (Nīlakaṇṭha's text) 3.262
- Language
- Sanskrit
Draupadīharaṇaparva
3.262.1
janamejaya uvāca |
vasatsvevaṃ vane teṣu pāṇḍaveṣu mahātmasu |
ramamāṇeṣu citrābhiḥ kathābhirmunibhiḥ saha ||
3.262.2
sūryadattākṣayānnena kṛṣṇāyā bhojanāvadhi |
brāhmaṇāṃstarpamāṇeṣu ye cānnārthamupāgatāḥ ||
3.262.3
āraṇyānāṃ mṛgāṇāṃ ca māṃsairnānāvidhairapi |
dhārtarāṣṭrā durātmānaḥ sarve duryodhanādayaḥ ||
3.262.4
kathaṃ teṣvanvavartanta pāpācārā mahāmune |
duḥśāsanasya karṇasya śakuneśca mate sthitāḥ ||
3.262.5
etadācakṣva bhagavan vaiśampāyana pṛcchataḥ |
vaiśampāyana uvāca |
śrutvā teṣāṃ tathā vṛttiṃ nagare vasatāmiva ||
3.262.6
duryodhano mahārāja teṣu pāpamarocayat |
tathā tairnikṛtiprajñaiḥ karṇaduḥśāsanādibhiḥ ||
3.262.7
nānopāyairaghaṃ teṣu cintayatsu durātmasu |
abhyāgacchat sa dharmātmā tapasvī sumahāyaśāḥ ||
3.262.8
śiṣyāyutasamopeto durvāsā nāma kāmataḥ |
tamāgatamabhiprekṣya muniṃ paramakopanam ||
3.262.9
duryodhano vinītātmā praśrayeṇa damena ca |
sahito bhrātṛbhiḥ śrīmānātithyena nyamantrayat ||
3.262.10
vidhivat pūjayāmāsa svayaṃ kiṅkaravat sthitaḥ |
ahāni katicit tatra tasthau sa munisattamaḥ ||
3.262.11
taṃ ca paryacaradrājā divārātramatandritaḥ |
duryodhano mahārāja śāpāt tasya viśaṅkitaḥ ||
3.262.12
kṣudhito'smi dadasvānnaṃ śīghraṃ mama narādhipa |
ityuktvā gacchati snātuṃ pratyāgacchati vai cirāt |
na bhokṣyāmyadya me nāsti kṣudhetyuktvaityadarśanam ||
3.262.13
akasmādetya ca brūte bhojayāsmāṃstvarānvitaḥ |
kadācicca niśīthe sa utthāya nikṛtau sthitaḥ ||
3.262.14
pūrvavat kārayittvā'nnaṃ na bhuṅkte garhayan sma saḥ |
vartamāne tathā tasmin yadā duryodhano nṛpaḥ ||
3.262.15
vikṛtiṃ naiti na krodhaṃ tadā tuṣṭo'bhavanmuniḥ |
āha cainaṃ durādharṣo varado'smīti bhārata ||
3.262.16
durvāsā uvāca |
varaṃ varaya bhadraṃ te yat te manasi vartate |
mayi prīte tu yaddharmyaṃ nālabhyaṃ vidyate tava ||
3.262.17
vaiśampāyana uvāca |
etacchrutvā vacastasya maharṣerbhāvitātmanaḥ |
amanyata punarjātamātmānaṃ sa suyodhanaḥ ||
3.262.18
prāgeva mantritaṃ cāsīt karṇaduḥśāsanādibhiḥ |
yācanīyaṃ munestuṣṭāditi niścitya durmatiḥ ||
3.262.19
atiharṣānvito rājan varamenamayācata |
śiṣyaiḥ saha mama brahman yathā jāto'tithirbhavān ||
3.262.20
asmatkule mahārājo jyeṣṭhaḥ śreṣṭho yudhiṣṭhiraḥ |
vane vasati dharmātmā bhrātṛbhiḥ parivāritaḥ ||
3.262.21
guṇavān śīlasampannastasya tvamatithirbhava |
yadā ca rājaputrī sā sukumārī yaśasvinī ||
3.262.22
bhojayitvā dvijān sarvān patīṃśca varavārṇanī |
viśrāntā ca svayaṃ bhuktvā sukhāsīnā bhavedyadā ||
3.262.23
tadā tvaṃ tatra gacchethā yadyanugrāhyatā mayi |
tathā kariṣye tvatprītyetyevamuktvā suyodhanam ||
3.262.24
durvāsā api viprendro yathāgatamagāt tataḥ |
kṛtārthamapi cātmānaṃ tadā mene suyodhanaḥ ||
3.262.25
kareṇa ca karaṃ gṛhya karṇasya mudito bhṛśam |
karṇo'pi bhrātṛsahitamityuvāca nṛpaṃ mudā ||
3.262.26
karṇa uvāca |
diṣṭyā kāmaḥ susaṃvṛtto diṣṭyā kaurava vardhase |
diṣṭyā te śatravo magnā dustare vyasanārṇave ||
3.262.27
durvāsaḥkrodhaje vahnau patitāḥ pāṇḍunandanāḥ |
svaireva te mahāpāpairgatā vai dustaraṃ tamaḥ ||
3.262.28
vaiśampāyana uvāca |
itthaṃ te nikṛtiprajñā rājan duryodhanādayaḥ |
hasantaḥ prītamanaso jagmuḥ svaṃ svaṃ niketanam ||