Pramāṇa · Search · About · API

The Great Epic of the Bhārata dynasty 3.263

Vulgate (Nīlakaṇṭha's text) 3.263

Language
Sanskrit

3.263.1

vaiśampāyana uvāca |
tataḥ kadāciddurvāsāḥ sukhāsīnāṃstu pāṇḍavān |
bhuktvā cāvasthitāṃ kṛṣṇāṃ jñātvā tasmin vane muniḥ ||

3.263.2

abhyāgacchat parivṛtaḥ śiṣyairayutasammitaiḥ |
dṛṣṭvā yāntaṃ tamatithiṃ sa ca rājā yudhiṣṭhiraḥ ||

3.263.3

jagāmābhimukhaḥ śrīmān saha bhrātṛbhiracyutaḥ |
tasmai baddhāñjaliṃ samyagupaveśya varāsane ||

3.263.4

vidhivat pūjayitvā tamātithyena nyamantrayat |
āhnikaṃ bhagavan kṛtvā śīghramehīti cābravīt ||

3.263.5

jagāma ca muniḥ so'pi snātuṃ śiṣyaiḥ sahānaghaḥ |
bhojayet sahaśiṣyaṃ māṃ kathamityavicintayan ||

3.263.6

nyamajjat salile cāpi munisaṅghaḥ samāhitaḥ |
etasminnantare rājan draupadī yoṣitāṃ varā ||

3.263.7

cintāmavāpa paramāmannahetoḥ pativratā |
sā cintayantī ca yadā nānnahetumavindata ||

3.263.8

manasā cintayāmāsa kṛṣṇaṃ kaṃsaniṣūdanam |
kṛṣṇa kṛṣṇa mahābāho devakīnandanāvyaya ||

3.263.9

vāsudeva jagannātha praṇatārtivināśana |
viśvātman viśvajanaka viśvahartaḥ prabho'vyaya ||

3.263.10

prapannapāla gopāla prajāpāla parātpara |
ākūtīnāṃ ca cittīnāṃ pravartaka natā'smi te ||

3.263.11

vareṇya varadānanta agatīnāṃ gatirbhava |
purāṇapuruṣa prāṇamanovṛtyādyagocara ||

3.263.12

sarvādhyakṣa parādhyakṣa tvāmahaṃ śaraṇaṃ gatā |
pāhi māṃ kṛpayā deva śaraṇāgatavatsala ||

3.263.13

nīlotpaladalaśyāma padmagarbhāruṇekṣaṇa |
pītāmbaraparīdhāna lasatkaustubhabhūṣaṇa ||

3.263.14

tvamādiranto bhūtānāṃ tvameva ca parāyaṇam |
parātparataraṃ jyotirviśvātmā sarvatomukhaḥ ||

3.263.15

tvāmevāhuḥ paraṃ bījaṃ nidhānaṃ sarvasampadām |
tvayā nāthena deveśa sarvāpadbhyo bhayaṃ na hi ||

3.263.16

duḥśāsanādahaṃ pūrvaṃ sabhāyāṃ mocitā yathā |
tathaiva saṅkaṭādasmānmāmuddhartumihārhasi ||

3.263.17

vaiśampāyana uvāca |
evaṃ stutastadā devaḥ kṛṣṇayā bhaktavatsalaḥ |
draupadyāḥ saṅkaṭaṃ jñātvā devadevo jagatpatiḥ ||

3.263.18

pārśvasthāṃ śayane tyaktvā rukmiṇīṃ keśavaḥ prabhuḥ |
tatrājagāma tvarito hyacintyagatirīśvaraḥ ||

3.263.19

tatastaṃ draupadī dṛṣṭvā praṇamya parayā mudā |
abravīdvāsudevāya munerāgamanādikam ||

3.263.20

tatastāmabravīt kṛṣṇaḥ kṣudhito'smi bhṛśāturaḥ |
śīghraṃ bhojaya māṃ kṛṣṇe paścāt sarvaṃ kariṣyasi ||

3.263.21

niśamya tadvacaḥ kṛṣṇā lajjitā vākyamabravīt |
sthālyāṃ bhāskaradattāyāmannaṃ madbhojanāvadhi ||

3.263.22

bhuktavatyasmyahaṃ deva tasmādannaṃ na vidyate |
tataḥ provāca bhagavān kṛṣṇāṃ kamalalocanaḥ ||

3.263.23

kṛṣṇe na narmakālo'yaṃ kṣucchrameṇāture mayi |
śīghraṃ gaccha mama sthālīmānayitvā pradarśaya ||

3.263.24

iti nirbandhataḥ sthālīmānāyya sa yadūdvahaḥ |
sthālyāḥ kaṇṭhe'tha saṃlagnaṃ śākānnaṃ vīkṣya keśavaḥ ||

3.263.25

upayujyābravīdenāmanena harirīśvaraḥ |
viśvātmā prīyatāṃ devastuṣṭaścāstviti yajñabhuk ||

3.263.26

ākāraya munīn śīghraṃ bhojanāyeti cābravīt |
sahadevaṃ mahābāhuḥ kṛṣṇaḥ kleśavināśanaḥ ||

3.263.27

tato jagāma tvaritaḥ sahadevo mahāyaśāḥ |
ākārituṃ tu tān sarvān bhojanārthaṃ nṛpottama ||

3.263.28

snātuṃ gatān devanadyāṃ durvāsaḥprabhṛtīn munīn |
te cāvatīrṇāḥ salile kṛtavanto'ghamarṣaṇam ||

3.263.29

dṛṣṭodgārān sānnarasāṃstṛptyā paramayā yutāḥ |
uttīrya salilāt tasmāddṛṣṭavantaḥ parasparam ||

3.263.30

durvāsasamabhiprekṣya te sarve munayo'bruvan |
rājñā hi kārayitvā'nnaṃ vayaṃ snātuṃ samāgatāḥ ||

3.263.31

ākaṇṭhatṛptā viprarṣe kiṃsvidbhuñjāmahe vayam |
vṛthā pākaḥ kṛto'smābhistatra kiṃ karavāmahe ||

3.263.32

durvāsā uvāca |
vṛthā pākena rājarṣeraparādhaḥ kṛto mahān |
mā'smānadhākṣurdṛṣṭvaiva pāṇḍavāḥ krūracakṣuṣā ||

3.263.33

smṛtvā'nubhāvaṃ rājarṣerambarīṣasya dhīmataḥ |
bibhemi sutarāṃ viprā haripādāśrayājjanāt ||

3.263.34

pāṇḍavāśca mahātmānaḥ sarve dharmaparāyaṇāḥ |
śūrāśca kṛtavidyāśca vratinastapasi sthitāḥ ||

3.263.35

sadācāraratā nityaṃ vāsudevaparāyaṇāḥ |
kruddhāste nirdaheyurvai tūlarāśimivānalaḥ |
tata etānapṛṣṭvaiva śiṣyāḥ śīghraṃ palāyata ||

3.263.36

vaiśampāyana uvāca |
ityuktāste dvijāḥ sarve muninā guruṇā tadā |
pāṇḍavebhyo bhṛśaṃ bhītā dudruvuste diśo daśa ||

3.263.37

sahadevo devanadyāmapaśyanmunisattamān |
tīrtheṣvitastatastasyā vicacāra gaveṣayan ||

3.263.38

tatrasthebhyastāpasebhyaḥ śrutvā tāṃścaiva vidrutān |
yudhiṣṭhiramathābhyetya taṃ vṛttāntaṃ nyavedayat ||

3.263.39

tataste pāṇḍavāḥ sarve pratyāgamanakāṅkṣiṇaḥ |
pratīkṣantaḥ kiyatkālaṃ jitātmāno'vatasthire ||

3.263.40

niśīthe'bhyetya cākasmādasmān sa chalayiṣyati |
kathaṃ ca nistaremāsmāt kṛcchrāddaivopasāditāt ||

3.263.41

iti cintāparān dṛṣṭvā niḥśvasanto muhurmuhuḥ |
uvāca vacanaṃ śrīmān kṛṣṇaḥ pratyakṣatāṃ gataḥ ||

3.263.42

śrīkṛṣṇa uvāca |
bhavatāmāpadaṃ jñātvā ṛṣeḥ paramakopanāt |
draupadyā cintitaḥ pārthā ahaṃ satvaramāgataḥ ||

3.263.43

na bhayaṃ vidyate tasmādṛṣerdurvāsaso'lpakam |
tejasā bhavatāṃ bhītaḥ pūrvameva palāyitaḥ ||

3.263.44

dharmanityāstu ye kecinna te sīdanti karhicit |
āpṛcche vo gamiṣyāmi niyataṃ bhadramastu vaḥ ||

3.263.45

vaiśampāyana uvāca |
śrutveritaṃ keśavasya babhūvuḥ svasthamānasāḥ |
draupadyā sahitāḥ pārthāstamūcurvigatajvarāḥ ||

3.263.46

tvayā nāthena govinda dustarāmāpadaṃ vibho |
tīrṇāḥ plavamivāsādya majjamānā mahārṇave ||

3.263.47

svasti sādhaya bhadraṃ te ityājñāto yayau purīm |
pāṇḍavāśca mahābhāga draupadyā sahitāḥ prabho ||

3.263.48

ūṣuḥ prahṛṣṭamanaso viharanto vanādvanam |
iti te'bhihitaṃ rājan yat pṛṣṭo'hamiha tvayā ||

3.263.49

evaṃvidhānyalīkāni dhārtarāṣṭrairdurātmabhiḥ |
pāṇḍaveṣu vanastheṣu prayuktāni vṛthā'bhavan ||

Linked texts (2)