The Great Epic of the Bhārata dynasty 3.264

Vulgate (Nīlakaṇṭha's text) 3.264

vaiśampāyana uvāca |
tasmin bahumṛge'raṇye aṭamānā mahārathāḥ |
kāmyake bharataśreṣṭhā vijahruste yathā'marāḥ ||

prekṣamāṇā bahuvidhān vanoddeśān samantataḥ |
yathartukālaramyāśca vanarājīḥ sapuṣpitāḥ ||

pāṇḍavā mṛgayāśīlāścarantastanmahadvanam |
vijahrurindrapratimāḥ kañcitkālamarindama ||

tataste yaugapadyena yayuḥ sarve caturdiśam |
mṛgayāṃ puruṣavyāghrā brāhmaṇārthe parantapāḥ ||

draupadīmāśrame nyasya tṛṇabindoranujñayā |
maharṣerdīptatapaso dhaumyasya ca purodhasaḥ ||

tatastu rājā sindhūnāṃ vārdhakṣatrirmahāyaśāḥ |
vivāhakāmaḥ śālveyān prayātaḥ so'bhavat tadā ||

mahatā paribarheṇa rājayogyena saṃvṛtaḥ |
rājabhirbahubhiḥ sārdhamupāyāt kāmyakaṃ ca saḥ ||

tatrāpaśyat priyāṃ bhāryāṃ pāṇḍavānāṃ yaśasvinīm |
tiṣṭhantīmāśramadvāri draupadīṃ nirjane vane ||

vibhrājamānāṃ vapuṣā bibhratīṃ rūpamuttamam |
bhrājayantīṃ vanoddeśaṃ nīlābhramiva vidyutam ||

apsarā devakanyā vā māyā vā devanirmitā |
iti kṛtvā'ñjaliṃ sarve dadṛśustāmaninditām ||

tataḥ sa rājā sindhūnāṃ vārdhakṣatrirjayadrathaḥ |
vismitastvanavadyāṅgīṃ dṛṣṭvā tāṃ duṣṭamānasaḥ ||

sa koṭikāsyaṃ rājānamabravīt kāmamohitaḥ |
kasya tveṣā'navadyāṅgī yadi vā'pi na mānuṣī ||

vivāhārtho na me kaścidimāṃ prāpyātisundarīm |
etāmevāhamādāya gamiṣyāmi svamālayam ||

yaccha jānīhi saumyemāṃ kasya vā'tra kuto'pi vā |
kimarthamāgatā subhrūridaṃ kaṇṭakitaṃ vanam ||

api nāma varārohā māmeṣā lokasundarī |
bhajedadyāyatāpāṅgī sudatī tanumadhyamā ||

apyahaṃ kṛtakāmaḥ syāmimāṃ prāpya varastriyam |
gaccha jānīhi ko nvasyā nātha ityeva koṭika ||

sa koṭikāsyastacchrutvā rathāt praskandya kuṇḍalī |
upetya papraccha tadā kroṣṭā vyāghravadhūmiva ||

Other recensions (1)