The Great Epic of the Bhārata dynasty 3.273: Rāmopākhyānaparva
Vulgate (Nīlakaṇṭha's text) 3.273
- Language
- Sanskrit
Rāmopākhyānaparva
3.273.1
janamejaya uvāca |
evaṃ hṛtāyāṃ kṛṣṇāyāṃ prāpya kleśamanuttamam |
ata ūrdhvaṃ naravyāghrāḥ kimakurvata pāṇḍavāḥ ||
3.273.2
vaiśampāyana uvāca |
evaṃ kṛṣṇāṃ mokṣayitvā vinirjitya jayadratham |
āsāñcakre munigaṇairdharmarājo yudhiṣṭhiraḥ ||
3.273.3
teṣāṃ madhye maharṣīṇāṃ śṛṇvatāmanuśocatām |
mārkaṇḍeyamidaṃ vākyamabravīt pāṇḍunandanaḥ ||
3.273.4
yudhiṣṭhira uvāca |
bhagavan devarṣīṇāṃ tvaṃ khyāto bhūtabhaviṣyavit |
saṃśayaṃ paripṛcchāmi chindhi me hṛdi saṃsthitam ||
3.273.5
drupadasya sutā hyeṣā vedimadhyāt samutthitā |
ayonijā mahābhāgā snuṣā pāṇḍormahātmanaḥ ||
3.273.6
manye kālaśca bhagavān daivaṃ ca vidhinirmitam |
bhavitavyaṃ ca bhūtānāṃ yasya nāsti vyatikramaḥ ||
3.273.7
imāṃ hi patnīmasmākaṃ dharmajñāṃ dharmacāriṇīm |
saṃspṛśedīdṛśo bhāvaḥ śuciṃ stainyamivānṛtam ||
3.273.8
na hi pāpaṃ kṛtaṃ kiñcit karma vā ninditaṃ kvacit |
draupadyā brāhmaṇeṣveva dharmaḥ sucarito mahān ||
3.273.9
tāṃ jahāra balādrājā mūḍhabuddhirjayadrathaḥ |
tasyāḥ saṃharaṇāt pāpaḥ śirasaḥ keśapātanam ||
3.273.10
parājayaṃ ca saṅgrāme sasahāyaḥ samāptavān |
pratyāhṛtā tathā'smābhirhatvā tat saindhavaṃ balam ||
3.273.11
taddāraharaṇaṃ prāptamasmābhiravitarkitam |
duḥkhaścāyaṃ vane vāso mṛgayāyāṃ ca jīvikā ||
3.273.12
hiṃsā ca mṛgajātīnāṃ vanaukobhirvanaukasām |
jñātibhirvipravāsaśca mithyāvyavasitairiyam ||
3.273.13
asti nūnaṃ mayā kaścidalpabhāgyataro naraḥ |
bhavatā dṛṣṭapūrvo vā śrutapūrvo'pi vā bhavet ||
Other recensions (1)
- Mahābhārata — Vyāsa, Sanskrit