Pramāṇa · Search · About · API

The Great Epic of the Bhārata dynasty 3.281

Vulgate (Nīlakaṇṭha's text) 3.281

Language
Sanskrit

3.281.1

mārkaṇḍeya uvāca |
tatastāṃ bhartṛśokārtāṃ dīnāṃ malinavāsasam |
maṇiśeṣābhyalaṅkārāṃ rudatīṃ ca pativratām ||

3.281.2

rākṣasībhirupāsyantīṃ samāsīnāṃ śilātale |
rāvaṇaḥ kāmabāṇārtho dadarśopasasarpa ca ||

3.281.3

devadānavagandharvayakṣakimpuruṣairyudhi |
ajito'śokavanikāṃ yayau kandarpapīḍitaḥ ||

3.281.4

divyāmbaradharaḥ śrīmān sumṛṣṭamāṇakuṇḍalaḥ |
vicitramālyamukuṭo vasanta iva mūrtimān ||

3.281.5

na kalpavṛkṣasadṛśo yatnādapi vibhūṣitaḥ |
smaśānacaityadrumavadbhūṣito'pi bhayaṅkaraḥ ||

3.281.6

sa tasyāstanumadhyāyāḥ samīpe rajanīcaraḥ |
dadṛśe rohiṇīmetya śanaiścara iva grahaḥ ||

3.281.7

sa tāmāmantrya suśroṇīṃ puṣpaketuśarāhataḥ |
idamityabravīdvākyaṃ trastāṃ rauhīmivābalām ||

3.281.8

sīte paryāptametāvatkṛto bharturanugrahaḥ |
prasādaṃ kuru tanvaṅgi kriyatāṃ parikarma te ||

3.281.9

bhajasva māṃ varārohe mahārhābharaṇāmbarā |
bhava me sarvanārīṇāmuttamā varavarṇinī ||

3.281.10

santi me devakanyāśca gandharvāṇāṃ ca yoṣitaḥ |
santi dānavakanyāśca daityānāṃ cāpi yoṣitaḥ ||

3.281.11

caturdaśa piśācānāṃ koṭyo me vacane sthitāḥ |
dvistāvat puruṣādānāṃ rakṣasāṃ bhīmakarmaṇām ||

3.281.12

tato me triguṇā yakṣā ye madvacanakāriṇaḥ |
kecideva dhanādhyakṣaṃ bhrātaraṃ me samāśritāḥ ||

3.281.13

gandharvāpsaraso bhadre māmāpānagataṃ sadā |
upatiṣṭhanti vāmoru yathaiva bhrātaraṃ mama ||

3.281.14

putro'hamapi viprarṣeḥ sākṣādviśravaso muneḥ |
pañcamo lokapālānāmiti me prathitaṃ yaśaḥ ||

3.281.15

divyāni bhakṣyabhojyāni pānāni vividhāni ca |
yathaiva tridaśeśasya tathaiva mama bhāvini ||

3.281.16

kṣīyatāṃ duṣkṛtaṃ karma vanavāsakṛtaṃ tava |
bhāryā me bhava suśroṇi yathā mandodarī tathā ||

3.281.17

ityuktā tena vaidehī parivṛtya śubhānanā |
tṛṇamantarataḥ kṛtvā tamuvāca niśācaram ||

3.281.18

āśivenātivāmorūrajasraṃ netravāriṇā |
stanāvapatitau bālā saṃhatāvabhivarṣatī ||

3.281.19

uvāca vākyaṃ taṃ kṣudraṃ vaidehī patidevatā |
asakṛdvadato vākyamīdṛśaṃ rākṣaseśvara ||

3.281.20

viṣādayuktametat te mayā śrutamabhāgyayā |
tadbhadrasukha bhadraṃ te mānasaṃ vinivartyatām ||

3.281.21

paradārā'smyalabhyā ca satataṃ ca pativratā |
na caivopayikī bhāryā mānuṣī kṛpaṇā tava ||

3.281.22

vivaśāṃ dharṣayitvā ca kāṃ tvaṃ prītimavāpsyasi |
prajāpatisamo vipro brahmayoniḥ pitā tava ||

3.281.23

na ca pālayase dharmaṃ lokapālasamaḥ katham |
bhrātaraṃ rājarājānaṃ maheśvarasakhaṃ prabhum ||

3.281.24

dhaneśvaraṃ vyapadiśan kathaṃ tviha na lajjase |
ityuktvā prārudat sītā kampayantī payodharau ||

3.281.25

śirodharāṃ ca tanvaṅgī mukhaṃ pracchādya vāsasā |
tasyā rudatyā bhāvinyā dīrghā veṇī susaṃyatā ||

3.281.26

dadṛśe svasitā snigdhā kālī vyālīva mūrdhani |
śrutvā tadrāvaṇo vākyaṃ sītayoktaṃ suniṣṭhuram ||

3.281.27

pratyākhyāto'pi durmedhāḥ punarevābravīdvacaḥ |
kāmamaṅgāni me sīte dunotu makaradhvajaḥ ||

3.281.28

na tvāmakāmāṃ suśroṇīṃ sameṣye cāruhāsinīm |
kiṃ nu śakyaṃ mayā kartuṃ yattvamadyāpi mānuṣam ||

3.281.29

āhārabhūtamasmākaṃ rāmamevānurudhyase ||

3.281.30

ityuktvā tāmanindyāṅgīṃ sa rākṣasamaheśvaraḥ |
tatraivāntarhito bhūtvā jagāmābhimatāṃ diśam ||

3.281.31

rākṣasībhiḥ parivṛtā vaidehī śokakarśitā |
sevyamānā trijaṭayā tatraiva nyavasat tadā ||

Commentaries (5)

Other recensions (1)

Linked texts (2)