The Great Epic of the Bhārata dynasty 3.292

Vulgate (Nīlakaṇṭha's text) 3.292

mārkaṇḍeya uvāca |
evametanmahābāho rāmeṇāmitatejasā |
prāptaṃ vyasanamatyugraṃ vanavāsakṛtaṃ purā ||

mā śucaḥ puruṣavyāghra kṣatriyo'si parantapa |
bāhuvīryāśrite mārge vartase dīptanirṇaye ||

na hi te vṛjinaṃ kiñcidvartate paramaṇvapi |
asminmārge niṣīdeyuḥ sendrā'pi sasurāsurāḥ ||

saṃhatya nihato vṛtro marudbhirvajrapāṇinā |
namuciścaiva durdharṣo dīrghajihvā ca rākṣasī ||

sahāyavati sarvārthāḥ santiṣṭhantīha sarvaśaḥ |
kiṃ nu tasyājitaṃ saṅkhye yasya bhrātā dhanañjayaḥ ||

ayaṃ ca balināṃ śreṣṭho bhīmo bhīmaparākramaḥ |
yuvānau ca maheṣvāsau vīrau mādravatī sutau ||

ebhiḥ sahāyaiḥ kasmāt tvaṃ viṣīdasi parantapa |
ya ime vajriṇaḥ senāṃ jayeyuḥ samarudgaṇām ||

tvamapyebhirmaheṣvāsaiḥ sahāyairdevarūpibhiḥ |
vijeṣyasi raṇe sarvānamitrān bharatarṣabha ||

itaśca tvamimāṃ paśya saindhavena durātmanā |
balinā vīryamattena hṛtāmebhirmahātmabhiḥ ||

ānītāṃ draupadīṃ kṛṣṇāṃ kṛttvā karma suduṣkaram |
jayadrathaṃ ca rājānaṃ vijitaṃ vaśamāgatam ||

asahāyena rāmeṇa vaidehī punarāhṛtā |
hatvā saṅkhye daśagrīvaṃ rākṣasaṃ bhīmavikramam ||

yasya śākhāmṛgā mitrāṇyṛkṣāḥ kālamukhāstathā |
jātyantaragatā rājannetadbuddhyā'nucintaya ||

tasmāt sa tvaṃ kuruśreṣṭha mā śuco bharatarṣabha |
tvadvidhā hi mahātmāno na śocanti parantapa ||

vaiśampāyana uvāca |
evamāśvāsito rājā mārkaṇḍeyena dhīmatā |
tyaktvā duḥkhamadīnātmā punarapyenamabravīt ||

Commentaries (5)