Pramāṇa · Search · About · API

The Great Epic of the Bhārata dynasty 3.295

Vulgate (Nīlakaṇṭha's text) 3.295

Language
Sanskrit

3.295.1

mārkaṇḍeya uvāca |
atha kanyāpradāne sa tamevārthaṃ vicintayan |
samāninye ca tat sarvaṃ bhāṇḍaṃ vaivāhikaṃ nṛpaḥ ||

3.295.2

tato vṛddhān dvijān sarvānṛtvijaḥ sapurohitān |
samāhūya dine puṇye prayayau saha kanyayā ||

3.295.3

medhyāraṇyaṃ sa gatvā ca dyumatsenāśramaṃ nṛpaḥ |
padbhyāmeva dvijaiḥ sārdhaṃ rājarṣiṃ tamupāgamat ||

3.295.4

satrāpaśyanmahābhāgaṃ śālavṛkṣamupāśritam |
kauśyāṃ vṛsyāṃ samāsīnaṃ cakṣurhīnaṃ nṛpaṃ tadā ||

3.295.5

sa rājā tasya rājarṣeḥ kṛtvā pūjāṃ yathā'rhataḥ |
vācā suniyato bhūtvā cakārātmanivedanam ||

3.295.6

tasyārdhyamāsanaṃ caiva gāṃ cāvedya sa dharmavit |
kimāgamanamityevaṃ rājā rājānamabravīt ||

3.295.7

tasya sarvamabhiprāyamitikartavyatāṃ ca tām |
satyavantaṃ samuddiśya sarvameva nyavedayat ||

3.295.8

aśvapatiruvāca |
sāvitrī nāma rājarṣe kanyeyaṃ mama śobhanā |
tāṃ svadharmeṇa dharmajña snuṣārthe tvaṃ gṛhāṇa me ||

3.295.9

dyumatsena uvāca |
cyutāḥ sma rājyādvanavāsamāśritāścarāma dharmaṃ niyatāstapasvinaḥ |
kathaṃ tvanarhā vanavāsamāśrame nivatsyate kleśamimaṃ sutā tava ||

3.295.10

aśvapatiruvāca |
sukhaṃ ca duḥkhaṃ ca bhavābhavātmakaṃ yadā vijānāti sutā'hameva ca |
na madvidhe yujyati vākyamīdṛśaṃ viniścayenābhigato'smi te nṛpa ||

3.295.11

āśāṃ nārhasi me hantuṃ sauhṛdāt praṇatasya ca |
abhitaścāgataṃ premṇā pratyākhyātuṃ na mā'rhasi ||

3.295.12

anurūpo hi yuktaśca tvaṃ mamāhaṃ tavāpi ca |
snuṣāṃ pratīccha me kanyāṃ bhāryāṃ satyavataḥ sutaḥ ||

3.295.13

dyumatsena uvāca |
pūrvamevābhilaṣitaḥ sambandho me tvayā saha |
bhraṣṭarājyastvahamiti tata etadvicāritam ||

3.295.14

abhiprāyastvayaṃ yo me pūrvamevābhikāṅkṣitaḥ |
sa nirvartatu me'dyaiva kāṅkṣito hyasi me'tithiḥ ||

3.295.15

tataḥ sarvān samānāyya dvijānāśramavāsinaḥ |
yathāvidhisamudvāhaṃ kārayāmāsaturnṛpau ||

3.295.16

dattvā so'śvapatiḥ kanyāṃ yathārhaṃ saparicchadam |
yayau svameva bhavanaṃ yuktaḥ paramayā mudā ||

3.295.17

satyavānapi tāṃ bhāryāṃ labdhvā sarvaguṇānvitām |
mumude sā ca taṃ labdhvā bhartāraṃ manasepsitam ||

3.295.18

gate pitari sarvāṇi sannyasyābharaṇāni sā |
jagṛhe valkalānyeva vasraṃ kāṣāyameva ca ||

3.295.19

paricārairguṇaiścaiva praśrayeṇa damena ca |
sarvakāmakriyābhiśca sarveṣāṃ tuṣṭimādadhe ||

3.295.20

śvaśrūṃ śarīrasatkāraiḥ sarvairācchādanādibhiḥ |
śvaśuraṃ devasatkārairvācaḥ saṃyamanena ca ||

3.295.21

tathaiva priyavādena naipuṇena śamena ca |
rahaścaivopacāreṇa bhartāraṃ paryatoṣayat ||

3.295.22

evaṃ tatrāśrame teṣāṃ tadā nivasatāṃ satām |
kālastapasyatāṃ kaścidapākrāmata bhārata ||

3.295.23

sāvitryā glāyamānāyāstiṣṭhantyāstu divāniśam |
nāradena yaduktaṃ tadvākyaṃ manasi vartate ||

Other recensions (1)

Linked texts (2)