The Great Epic of the Bhārata dynasty 3.77

Vulgate (Nīlakaṇṭha's text) 3.77

bṛhadaśva uvāca |
atha tāṃ vyuṣito rātriṃ nalo rājā svalaṅkṛtaḥ |
vaidarbhyā sahitaḥ kāle dadarśa vasudhādhipam ||

tato'bhivādayāmāsa prayataḥ śvaśuraṃ nalaḥ |
tato nu damayantī ca vavande pitaraṃ śubhā ||

taṃ bhīmaḥ pratijagrāha putravatparayā mudā |
yathārhaṃ pūjayitvā ca samāśvāsayata prabhuḥ ||

nalena sahitāṃ tatra damayantīṃ pativratām |
tāmarhaṇāṃ nalo rājā pratigṛhya yathāvidhi ||

paricaryāṃ svakāṃ tasmai yathāvatpratyavedayat |
tato babhūva nagare sumahānharṣajaḥ svanaḥ ||

janasya samprahṛṣṭasya nalaṃ dṛṣṭvā tathāgatam |
aśobhayacca nagaraṃ patākādhvajamālinīm ||

siktāḥ sumṛṣṭapuṣpāḍhyā rājamārgāḥ svalaṅkṛtāḥ |
dvāri dvāri ca paurāṇāṃ puṣpabhṛṅgopakalpitāḥ ||

arcitāni ca sarvāṇi devatāyatanāni ca |
ṛtuparṇo'pi śuśrāva bāhukacchadminaṃ nalam ||

damayantyā samāyuktaṃ jahṛṣe ca narādhipaḥ |
tamānāyya nalaṃ rājā kṣamayāmāsa pārthivam ||

sa ca taṃ kṣamayāmāsa hetubhirbuddhisammitaḥ |
sa satkṛto mahīpālo naiṣadhaṃ vismitānanaḥ ||

uvāca vākyaṃ tattvajño naiṣadhaṃ vadatāṃ varaḥ |
diṣṭyā sameto dāraiḥ svairbhavānityabhyanandata ||

kiñcittu nāparādhaṃ te kṛtavānasmi naiṣadha |
ajñātavāse vasato madgṛhe vasudhādhipa ||

yadi vā'buddhipūrvāṇi yadi buddhyāpi kānicit |
mayā kṛtānyakāryāṇi tāni tvaṃ kṣantumarhasi ||

nala uvāca |
na me'parādhaṃ kṛtavāṃstvaṃ svalpamapi pārthiva |
kṛte'pi ca na me kopaḥ kṣantavyaṃ hi mayā tava ||

pūrvaṃ hyapi sakhā me'si sambandhī ca janādhipa |
ata ūrdhvaṃ tu bhūyastvaṃ prītimāhartumarhasi ||

sarvakāmaiḥ suvihitaiḥ sukhamasmyuṣitastvayi |
na tathā svagṛhe rājanyathā tava gṛhe sadā ||

idaṃ caiva hayajñānaṃ tvadīyaṃ mayi tiṣṭhati |
tadupākartumicchāmi manyase yadi pārthiva |
evamuktvā dadau vidyāmṛtuparṇāya naiṣadhaḥ ||

sa ca tāṃ pratijagrāha vidhidṛṣṭena kramaṇā |
gṛhītvā cāśvahṛdayaṃ rājānbhāṅgāsurirnṛpaḥ ||

niṣadhādhipateścāpi dattvākṣahṛdayaṃ nṛpaḥ |
sūtamanyamupādāya yayau svapurameva ha ||

ṛtuparṇe gate rājannalo rājā viśāmpate |
nagare kuṇḍine kālaṃ nātidīrghamivāvasat ||

Commentaries (5)