The Great Epic of the Bhārata dynasty 3.81
Vulgate (Nīlakaṇṭha's text) 3.81
- Language
- Sanskrit
3.81.1
vaiśampāyana uvāca |
dhanañjayotsukānāṃ tu bhrātṝṇāṃ kṛṣṇayā saha |
śrutvā vākyāni vimanā dharmarājopyajāyata ||
3.81.2
athāpaśyanmahātmānaṃ devarṣiṃ tatra nāradam |
dīpyamānaṃ śriyā brāhmyā hutārciṣamivānalam ||
3.81.3
tamāgatamabhiprekṣya bhrātṛbhiḥ saha dharmarāṭ |
pratyutthāya yathānyāyaṃ pūjāṃ cakre mahātmane ||
3.81.4
sa taiḥ parivṛtaḥ śrīmānbhrātṛbhiḥ kurusattamaḥ |
vibabhāvatidīptaujā devairiva śatakratuḥ ||
3.81.5
yathā ca vedānsāvitrī yājñasenī tathā patīn |
na jahau dharmataḥ pārthānmerumarkaprabhā yathā ||
3.81.6
pratigṛhya ca tāṃ pūjāṃ nārado bhagavānṛṣiḥ |
āśvāsayaddharmasutaṃ yuktarūpamivānagha ||
3.81.7
uvāca ca mahātmānaṃ dharmarājaṃ yudhiṣṭhiram |
brūhi dharmabhṛtāṃ śreṣṭha kenārthaḥ kiṃ dadāni te ||
3.81.8
atha dharmasuto rājā praṇamya bhrātṛbhiḥ saha |
uvāca prāñjalirbhūtvā nāradaṃ devasammitam ||
3.81.9
tvayi tuṣṭe mahābhāga sarvalokābhipūjite |
kṛtamityeva manyehaṃ prasādāttava suvrata ||
3.81.10
yadi tvahamanugrāhyo bhrātṛbhiḥ sahito'nagha |
sandehaṃ me muniśreṣṭha tattvataśchettumarhasi ||
3.81.11
pradakṣiṇāṃ yaḥ kurute pṛthivīṃ tīrthatatparaḥ |
kiṃ phalaṃ tasya kārtsnyena tadbhavānvaktumarhati ||
3.81.12
nārada uvāca |
śṛṇu rājannavahito yathā bhīṣmeṇa dhīmatā |
pulastyasya sakāśādvai sarvametadupaśrutam ||
3.81.13
purā bhāgīrathītīre bhīṣmo dharmabhṛtāṃ varaḥ |
pitryaṃ vrataṃ samāsthāya nyavasanmunibhiḥ saha ||
3.81.14
śubhe deśe tathā rājanpuṇye devarṣisevite |
gaṅgādvāre mahābhāga devagandharvasevite ||
3.81.15
sa pitṝṃstarpayāmāsa devāṃśca paramadyutiḥ |
ṛṣīṃśca tarpayāmāsa vidhidṛṣṭena karmaṇā ||
3.81.16
kasyacittvatha kālasya japanneva mahāyaśāḥ |
dadarśādbhutasaṅkāśaṃ pulastyamṛṣisattamam ||
3.81.17
sa taṃ dṛṣṭvogratapasaṃ dīpyamānamiva śriyā |
praharṣamatulaṃ lebhe vismayaṃ paramaṃ yayau ||
3.81.18
upasthitaṃ mahābhāgaṃ pūjayāmāsa bhārata |
bhīṣmo dharmabhṛtāṃ śreṣṭho vidhidṛṣṭena karmaṇā ||
3.81.19
śirasā cārghamādāya śuciḥ prayatamānasaḥ |
nāma saṅkīrtayāmāsa tasminbrahmarṣisattame ||
3.81.20
bhīṣmohamasmi bhadraṃ te dāso'smi tava suvrata |
tava sandarśanādeva mukto'haṃ sarvakilvaṣaiḥ ||
3.81.21
evamuktvā mahārāja bhīṣmo dharmabhṛtāṃ varaḥ |
vāgyataḥ prāñjalirbhūtvā tūṣṇīmāsīdyudhiṣṭhiraḥ ||
3.81.22
taṃ dṛṣṭvā niyamenātha svādhyāyāmnāyakarśitam |
bhīṣmaṃ kurukulaśreṣṭhaṃ muniḥ prītamanābhavat ||
Other recensions (1)
- Mahābhārata — Vyāsa, Sanskrit