The Great Epic of the Bhārata dynasty 3.86
Vulgate (Nīlakaṇṭha's text) 3.86
- Language
- Sanskrit
3.86.1
vaiśampāyana uvāca |
bhrātṝṇāṃ matamājñāya nāradasya ca dhīmataḥ |
pitāmahasamaṃ dhaumyaṃ prāha rājā yudhiṣṭhiraḥ ||
3.86.2
mayā sa puruṣavyāghro jiṣṇuḥ satyaparākramaḥ |
astrahetormahābāhuramitātmā vivāsitaḥ ||
3.86.3
sa hi vīronuraktaśca samarthaśca tapodhanaḥ |
kṛtī ca bhṛśamapyastre vāsudeva iva prabhuḥ ||
3.86.4
ahaṃ hyetāvubhau brahmankṛṣṇāvarivighātinau |
abhijānāmi vikrāntau tathā vyāsaḥ pratāpavān ||
3.86.5
triyugau puṇḍarīkākṣau vāsudevadhanañjayau |
nārado'pi tathā veda yo'pyaśaṃsatsadā mama ||
3.86.6
tathāhamapi jānāmi naranārāyaṇāvṛṣī |
śakto'yamityato matvā mayā sa preṣitorjunaḥ ||
3.86.7
indrādanavaraḥ śakraṃ surasūnuḥ surādhipam |
draṣṭumastrāṇi cādātumindrāditi vivāsitaḥ ||
3.86.8
bhīṣmadroṇāvatirathau kṛpo drauṇiśca durjayaḥ |
dhṛtarāṣṭrasya putreṇa vṛtā yudhi mahārathāḥ ||
3.86.9
sarve vedavidaḥ śūrāḥ sarvāstraviduṣastathā |
yoddhukāmāśca pārthena satataṃ ye mahābalāḥ |
sa ca divyāstravitkarṇaḥ sūtaputro mahārathaḥ ||
3.86.10
yostravegānilabalaḥ śarārcistalaniḥsvanaḥ |
rajodhūmostrasampāto dhārtarāṣṭrāniloddhataḥ ||
3.86.11
nisṛṣṭa iva kālena yugānte jvalano mahān |
mama sainyamayaṃ kakṣaṃ pradhakṣyati na saṃśayaḥ ||
3.86.12
taṃ sa kṛṣṇāniloddhūto divyāstrajvalano mahān |
śvetavājibalākābhṛdgāṇḍīvendrāyudholbaṇaḥ ||
3.86.13
saṃrabdhaḥ śaradhārābhiḥ sudīptaṃ karṇapāvakam |
arjunodīrito meghaḥ śamayiṣyati saṃyuge ||
3.86.14
sa sākṣādeva sarvāṇi śakrātparapurañjayaḥ |
divyānyastrāṇi bībhatsustataśca pratipatsyate ||
3.86.15
alaṃ sa teṣāṃ sarveṣāmiti me dhīyate matiḥ |
nāsti tvanikṛtārthānāṃ raṇe'rīṇāṃ pratikriyā ||
3.86.16
te vayaṃ pāṇḍavaṃ sarve gṛhītāstramarindamam |
draṣṭāro na hi bībhatsurbhāramudyamya sīdati ||
3.86.17
vayaṃ tu tamṛte vīraṃ vane'smindvipadāṃ vara |
avadhānaṃ na gacchāmaḥ kāmyake saha kṛṣṇayā ||
3.86.18
bhavānanyadvanaṃ sādhu bahvannaṃ phalavacchuci |
ākhyātu ramaṇīyaṃ ca sevitaṃ puṇyakarmabhiḥ ||
3.86.19
yatra kañcidvayaṃ kālaṃ vasantaḥ satyavikramam |
pratīkṣāmo'rjunaṃ vīraṃ vṛṣṭikāmā ivāmbudam ||
3.86.20
vividhānāśramānkāṃściddvijātibhyaḥ pratiśrutān |
sarāṃsi saritaścaiva ramaṇīyāṃśca parvatān ||
3.86.21
ācakṣva na hi me brahmanrocate tamṛte'rjunam |
vane'sminkāmyake vāso gacchāmo'nyāṃ diśaṃ prati ||
Other recensions (1)
- Mahābhārata — Vyāsa, Sanskrit