The Great Epic of the Bhārata dynasty 3.87

Vulgate (Nīlakaṇṭha's text) 3.87

Language: Sanskrit

3.87.1

vaiśampāyana uvāca |
tānsarvānutsukāndṛṣṭvā pāṇḍavāndīnacetasaḥ |
aśvāsayaṃstathā dhaumyo bṛhaspatisamobravīt ||

3.87.2

brāhmaṇānumatānpuṇyānāśramānbharatarṣabha |
diśastīrthāni śailāṃśca śṛṇu me vadatonagha ||

3.87.3

yācchrutvā gadato rājanviśoko bhavitāsi ha |
draupadyā cānayā sārdhaṃ bhrātṛbhiśca nareśvara ||

3.87.4

śravaṇāccaiva teṣāṃ tvaṃ puṇyamāpsyasi pāṇḍava |
gatvā śataguṇaṃ caiva tebhya eva narottama ||

3.87.5

pūrvaṃ prācīṃ diśaṃ rājanrājarṣigaṇasevitām |
ramyāṃ te kathayiṣyāmi yudhiṣṭhira yathāsmṛti ||

3.87.6

tasyāṃ radevarṣijuṣṭāyāṃ naimiṣaṃ nāma bhārata |
yatra tīrthāni devānāṃ puṇyāni ca pṛthak pṛthak ||

3.87.7

yatra sā gomatī puṇyā ramyā devarṣisevitā |
yajñabhūmiśca devānāṃ śāmitraṃ ca vivasvataḥ ||

3.87.8

tasyāṃ girivaraḥ puṇyo gayo rājarṣisatkṛtaḥ |
śivaṃ brahmasaro yatra sevitaṃ tridaśarṣibhiḥ ||

3.87.9

yadarthe puruṣavyāghra kīrtayanti purātanāḥ |
eṣṭavyā bahavaḥ putrā yadyeko'pi gayāṃ vrajet ||

3.87.10

yajeta vāśvamedhena nīlaṃ vā vṛṣamutsṛjet |
uttārayati santatyā daśapūrvāndaśāvarān ||

3.87.11

mahānadī ca tatraiva tathā gayaśiro nṛpa |
yatrāsau kīrtyate viprairakṣayyakaraṇo vaṭaḥ ||

3.87.12

yatra dattaṃ pitṛbhyo'nnamakṣayyaṃ bhavati prabho |
sā ca puṇyajalā tatra phalgu nāmā mahānadī ||

3.87.13

bahumūlaphalā cāpi kauśikī bharatarṣabha |
viśvāmitro'dhyagādyatra brāhmaṇatvaṃ tapodhanaḥ ||

3.87.14

gaṅgā yatra nadī puṇyā yasyāstīre bhagīrathaḥ |
ayajattatra bahubhiḥ kratubhirbhūridakṣiṇaiḥ ||

3.87.15

pāñcāleṣu ca kauravya kathayantyutpalāvatam |
viśvāmitroyajadyatra śakreṇa saha kauśikaḥ ||

3.87.16

yatrānuvaṃśaṃ bhagavāñjāmadagnyastathā jagau |
viśvāmitrasya tāṃ dṛṣṭvā vibhūtimatimānuṣīm ||

3.87.17

kānyakubje'pibatsomamindreṇa saha kauśikaḥ |
tataḥ kṣatrādapākrāmadbrāhmaṇo'smīti cābravīt ||

3.87.18

pavitramṛṣibhirjuṣṭaṃ puṇyaṃ pāvanamuttamam |
gaṅgāyamunayorvīra saṅgamaṃ lokaviśrutam ||

3.87.19

yatrāyajata bhūtātmā pūrvameva pitāmahaḥ |
prayāgamiti vikhyātaṃ tasmādbharatasattama ||

3.87.20

agastyasya tu rājendra tatrāśramavaro nṛpa |
tattathā tāpasāraṇyaṃ tāpasairupaśobhitam ||

3.87.21

hiraṇyabinduḥ kathito girau kālañjare mahān |
āgastyaparvato ramyaḥ puṇyo girivaraḥ śivaḥ ||

3.87.22

mahendro nāma kauravya bhārgavasya mahātmanaḥ |
ayajattatra kaunteya pūrvameva pitāmahaḥ ||

3.87.23

yatra bhāgīrathī puṇyā sarasyāsīdyudhiṣṭhira |
yatra sā brahmaśāleti puṇyā khyātā viśāmpate ||

3.87.24

dhūtapāpmabhirākīrṇā puṇyaṃ tasyāśca darśanam |
pavitro maṅgalīyaśca khyāto loke mahātmanaḥ ||

3.87.25

kedāraśca mataṅgasya mahānāśrama uttamaḥ |
kuṇḍodaḥ parvato ramyo bahumūlaphalodakaḥ ||

3.87.26

naiṣadhastṛṣito yatra jalaṃ śarma ca labdhavān |
yatra devavanaṃ puṇyaṃ tāpasairupaśobhitam ||

3.87.27

bāhudā ca nadī yatra nandā ca girimūrdhani |
tīrthāni saritaḥ śailāḥ puṇyānyāyatanāni ca ||

3.87.28

prācyāṃ diśi mahārāja kīrtitāni mayā tava |
tisṛṣvanyāni puṇyāni dikṣu tīrthāni me śṛṇu |
saritaḥ parvatāṃścaiva puṇyānyāyatanāni ca ||

Other recensions (1)

Mahābhārata — Vyāsa, Sanskrit