The Great Epic of the Bhārata dynasty 5.18
Vulgate (Nīlakaṇṭha's text) 5.18
- Language
- Sanskrit
5.18.1
śalya uvāca |
tataḥ śakraḥ stūyamāno gandharvāpsarasāṃ gaṇaiḥ |
airāvataṃ samāruhya dvipendraṃ lakṣaṇairyutam ||
5.18.2
pāvakaḥ sumahātejā maharṣiśca bṛhaspatiḥ |
yamaśca varuṇaścaiva kuberaśca dhaneśvaraḥ ||
5.18.3
sarvairdevaiḥ parivṛtaḥ śakro vṛtraniṣūdanaḥ |
gandharvairapsarobhiśca yātastribhuvanaṃ prabhuḥ ||
5.18.4
sa sametya mahendrāṇyā devarājaḥ śatakratuḥ |
mudā paramayā yuktaḥ pālayāmāsa devarāṭ ||
5.18.5
tataḥ sa bhagavāṃstatra aṅgirāḥ samadṛśyata |
atharvavedamantraiśca devendraṃ samapūjayat ||
5.18.6
tatastu bhagavānindraḥ saṃhṛṣṭaḥ samapadyata |
varaṃ ca pradadau tasmai atharvāṅgirase tadā ||
5.18.7
atharvāṅgiraso nāma vede'smin vai bhaviṣyati |
udāharaṇametaddhi yajñabhāgaṃ ca lapsyase ||
5.18.8
evaṃ sampūjya bhagavānatharvāṅgirasaṃ tadā |
vyasarjayanmahārāja devarājaḥ śatakratuḥ ||
5.18.9
sampūjya sarvāṃstridaśānṛṣīṃścāpi tapodhanān |
indraḥ pramudito rājan dharmeṇāpālayat prajāḥ ||
5.18.10
evaṃ duḥkhamanuprāptamindreṇa saha bhāryayā |
ajñātavāsaśca kṛtaḥ śatrūṇāṃ vadhakāṅkṣayā ||
5.18.11
nātra manyustvayā kāryo yatkliṣṭo'si mahāvane |
draupadyā saha rājendra bhrātṛbhiśca mahātmabhiḥ ||
5.18.12
evaṃ tvamapi rājendra rājyaṃ prāpsyasi bhārata |
vṛtraṃ hatvā yathā prāptaḥ śakraḥ kauravanandana ||
5.18.13
durācāraśca nahuṣo brahmadviṭ pāpacetanaḥ |
agastyaśāpābhihato vinaṣṭaḥ śāśvatīḥ samāḥ ||
5.18.14
evaṃ tava durātmānaḥ śatravaḥ śatrusūdana |
kṣipraṃ nāśaṃ gamiṣyanti karṇaduryodhanādayaḥ ||
5.18.15
tataḥ sāgaraparyantāṃ bhokṣyase medinīmimām |
bhrātṛbhiḥ sahito vīra draupadyā ca sahānayā ||
5.18.16
upākhyānamidaṃ śakravijayaṃ vedasammitam |
rājñā vyūḍheṣvanīkeṣu śrotavyaṃ jayamicchatā ||
5.18.17
tasmāt saṃśrāvayāmi tvāṃ vijayaṃ jayatāṃ vara |
saṃstūyamānā vardhante mahātmāno yudhiṣṭhira ||
5.18.18
kṣatriyāṇāmabhāvo'yaṃ yudhiṣṭhira mahātmanām |
duryodhanāparādhena bhīmārjunabalena ca ||
5.18.19
ākhyānamindravijayaṃ ya idaṃ niyataḥ paṭhet |
dhūtapāpmā jitasvargaḥ paratreha ca modate ||
5.18.20
na cārijaṃ bhayaṃ tasya nāputro vā bhavennaraḥ |
nāpadaṃ prāpnuyāt kiñciddīrghamāyuśca vindati |
sarvatra dayamāpnoti na kadācit parājayam ||
5.18.21
vaiśampāyana uvāca |
evamāśvāsito rājā śalyena bharatarṣabha |
pūjayāmāsa vidhivacchalyaṃ dharmabhṛtāṃ varaḥ ||
5.18.22
śrutvā tu śalyavacanaṃ kuntīputro yudhiṣṭhiraḥ |
pratyuvāca mahābāhurmadrarājamidaṃ vacaḥ ||
5.18.23
bhavān karṇasya sārathyaṃ kariṣyati na saṃśayaḥ |
tatra tejovadhaḥ kāryaḥ karṇasyārjunasaṃstavaḥ ||
5.18.24
śalya uvāca |
evametat kariṣyāmi yathā māṃ samprabhāṣase |
yaccānyadapi śakṣyāmi tat kariṣyāmyahaṃ tava ||
5.18.25
vaiśampāyana uvāca |
tatastvāmantrya kaunteyāñchalyo madrādhipastadā |
jagāma sabalaḥ śrīmān duryodhanamarindama ||
Other recensions (1)
- Mahābhārata — Vyāsa, Sanskrit