The Great Epic of the Bhārata dynasty 5.20: Sanjayayānaparva
Vulgate (Nīlakaṇṭha's text) 5.20
- Language
- Sanskrit
Sanjayayānaparva
5.20.1
vaiśampāyana uvāca |
sa ca kauravyamāsādya drupadasya purohitaḥ |
satkṛto dhṛtarāṣṭreṇa bhīṣmeṇa vidureṇa ca ||
5.20.2
sarvaṃ kauśalyamuktvā''dau pṛṣṭvā caivamanāmayam |
sarvasenāpraṇetṝṇāṃ madhye vākyamuvāca ha ||
5.20.3
sarvairbhavadbhirvidito rājadharmaḥ sanātanaḥ |
vākyopādānahetostu vakṣyāmi vidite sati ||
5.20.4
dhṛtarāṣṭraśca pāṇḍuśca sutāvekasya viśrutau |
tayoḥ samānaṃ draviṇaṃ paitṛkaṃ nātra saṃśayaḥ ||
5.20.5
dhṛtarāṣṭrasya ye putrāḥ prāptaṃ taiḥ paitṛkaṃ vasu |
pāṇḍuputrāḥ kathaṃ nāma na prāptāḥ paitṛkaṃ vasu ||
5.20.6
evaṅgate pāṇḍaveyairviditaṃ vaḥ purā yathā |
na prāptaṃ paitṛkaṃ dravyaṃ dhṛtarāṣṭreṇa saṃvṛtam ||
5.20.7
prāṇāntikairapyupāyaiḥ prayatadbhiranekaśaḥ |
śeṣavanto na śakitā netuṃ vai yamasādanam ||
5.20.8
punaśca vardhitaṃ rājyaṃ svabalena mahātmabhiḥ |
chadmanā'pahṛtaṃ kṣudrairdhārtarāṣṭraiḥ sasaubalaiḥ ||
5.20.9
tadapyanumataṃ karma yathāyuktamanena vai |
vāsitāśca mahāraṇye varṣāṇīha trayodaśa ||
5.20.10
sabhāyāṃ kleśitairvīraiḥ sahabhāryaistathā bhṛśam |
araṇye vividhāḥ kleśāḥ samprāptāstaiḥ sudāruṇāḥ ||
5.20.11
tathā virāṭanagare yonyantaragatairiva |
prāptaḥ paramasaṅkleśo yathā pāpairmahātmabhiḥ ||
5.20.12
te sarvaṃ pṛṣṭhataḥ kṛtvā tat sarvaṃ pūrvakilbiṣam |
sāmaiva kurubhiḥ sardhamicchanti kurupuṅgavāḥ ||
5.20.13
teṣāṃ ca vṛttamājñāya vṛttaṃ duryodhanasya ca |
anunetumihārhanti dhārtarāṣṭraṃ suhṛjjanāḥ ||
5.20.14
na hi te vigrahaṃ vīrāḥ kurvanti kurubhiḥ saha |
avināśena lokasya kāṅkṣante pāṇḍavāḥ svakam ||
5.20.15
yaścāpi dhārtarāṣṭrasya hetuḥ syādvigrahaṃ prati |
sa ca heturna mantavyo balīyāṃsastathā hi te ||
5.20.16
akṣauhiṇyaśca saptaiva dharmaputrasya saṅgatāḥ |
yuyutsamānāḥ kurubhiḥ pratīkṣante'sya śāsanam ||
5.20.17
apare puruṣavyāghrāḥ sahasrākṣauhiṇīsamāḥ |
sātyakirbhīmasenaśca yamau ca sumahābalau ||
5.20.18
ekādaśaitāḥ pṛtanā ekataśca samāgatāḥ |
ekataśca mahābāhurbahurūpī dhanañjayaḥ ||
5.20.19
yathā kirīṭī sarvābhyaḥ senābhyo vyatiricyate |
evameva mahābāhurvāsudevo mahādyutiḥ ||
5.20.20
bahulatvaṃ ca senānāṃ vikramaṃ ca kirīṭinaḥ |
buddhimattvaṃ ca kṛṣṇasya buddhvā yudhyeta ko naraḥ ||
5.20.21
te bhavanto yathādharmaṃ yathāsamayameva ca |
prayacchantu pradātavyaṃ mā vaḥ kālo'tyagādayam ||
Other recensions (1)
- Mahābhārata — Vyāsa, Sanskrit