The Great Epic of the Bhārata dynasty 5.24

Vulgate (Nīlakaṇṭha's text) 5.24

Language: Sanskrit

5.24.1

sañjaya uvāca |
yathā''ttha me pāṇḍava tattathaiva kurūn kuruśreṣṭha janaṃ ca pṛcchasi |
anāmayāstāta manasvinaste kuruśreṣṭhān pṛcchasi pārtha yāṃstvam ||

5.24.2

santyeva vṛddhāḥ sādhavo dhārtarāṣṭre santyeva pāpāḥ pāṇḍava tasya viddhi |
dadyādripubhyo'pi hi dhārtarāṣṭraḥ kuto dāyāṃllopayedbrāhmaṇānām ||

5.24.3

yadyuṣmākaṃ vartate saunadharmyamadrugdheṣu drugdhavattanna sādhu |
mitradhruk syāt dhṛtarāṣṭrasya putro yuṣmān dviṣan sādhuvṛttānasādhuḥ ||

5.24.4

sa cānujānāti bhṛśaṃ ca tapyate śocatyantaḥ sthaviro'jātaśatro |
śṛṇoti hi brāhmaṇānāṃ sametya mitradrohaḥ pātakebhyo garīyān ||

5.24.5

smaranti tubhyaṃ naradeva saṃyuge yuddhe ca jiṣṇośca yudhāṃ praṇetuḥ |
samutkṛṣṭe dundubhiśaṅkhaśabde gadāpāṇiṃ bhīmasenaṃ smaranti ||

5.24.6

mādrīsutau cāpi raṇājimadhye sarvā diśaḥ sampatantau smaranti |
senāṃ varṣantau śaravarṣairajasraṃ mahārathau samare duṣprakampau ||

natveva manye puruṣasya rājannanāgataṃ jñayate yadbhaviṣyam |
tvaṃ cettathā sarvadharmopapannaḥ prāptaḥ kleśaṃ pāṇḍava kṛcchrarūpam |
tvamevaitat kṛcchragataśca bhūyaḥ samīkuryāḥ prajñayā'jātaśatro ||

5.24.8

na kāmārthaṃ santyajeyurhi dharmaṃ pāṇḍoḥ sutāḥ sarva evendrakalpāḥ |
tvamevaitat prajñayā'jātaśatro samīkuryā yena śarmāpnuyuste ||

5.24.9

dhārtarāṣṭrāḥ pāṇḍavāḥ sṛñjayāśca ye cāpyante sanniviṣṭā narendrāḥ |
yanmāṃ bravīddhṛtarāṣṭro niśāyāmajātaśatro vacanaṃ pitā te ||

5.24.10

sahāmātyaḥ sahaputraśca rājan sametya tāṃ vācamimāṃ nibodha ||

Commentaries (5)

Jñānadīpikā — Devabodha, Sanskrit
Bhāratabhāvadīpa — Nīlakaṇṭha Caturdhara, Sanskrit
Lakṣaślokālaṅkāra — Vādirāja, Sanskrit
Mahābhārataṭīkā — Nīlakaṇṭha Dīkṣita, Sanskrit
Lakṣābharaṇa — Vādirāja Sūri, Sanskrit

Other recensions (1)

Mahābhārata — Vyāsa, Sanskrit