The Great Epic of the Bhārata dynasty 6.22
Vulgate (Nīlakaṇṭha's text) 6.22
- Language
- Sanskrit
6.22.1
sañjaya uvāca |
tato yudhiṣṭhiro rājā svāṃ senāṃ samanodayat |
prativyūhannanīkāni bhīṣmasya bharatarṣabha ||
6.22.2
yathoddiṣṭānyanīkāni pratyavyūhanta pāṇḍavāḥ |
svargaṃ paramamicchantaḥ suyuddhena kurūdvahāḥ ||
6.22.3
madhye śikhaṇḍino'nīkaṃ rakṣitaṃ savyasācinā |
dhṛṣṭadyumnaścarannagre bhīmasenena pālitaḥ ||
6.22.4
anīkaṃ dakṣiṇaṃ rājanyuyudhānena pālitam |
śrīmatā sātvatāgryeṇa śakreṇeva dhanuṣmatā ||
6.22.5
mahendrayānapratimaṃ rathaṃ tu sopaskaraṃ hāṭakaratnacitram |
yudhiṣṭhiraḥ kāñcanabhāṇḍayoktraṃ samāsthito nāgapurasya madhye ||
6.22.6
samucchritaṃ dantaśalākamasya supāṇḍuraṃ chatramatīva bhāti |
pradakṣiṇaṃ cainamupācaranta maharṣayaḥ saṃstutibhirmahendram ||
6.22.7
purohitāḥ śatruvadhaṃ vadanto brahmarṣisiddhāḥ śrutavanta enam |
japyaiśca mantraiśca mahauṣadhībhiḥ samantataḥ svastyayanaṃ bruvantaḥ ||
6.22.8
tataḥ sa vastrāṇi tathaiva gāśca phalāni puṣpāṇi tathaiva niṣkān |
kurūttamo brāhmaṇasānmahātmā kurvanyayau śakra ivāmareśaḥ ||
6.22.9
sahasrasūryaḥ śatakiṅkiṇīkaḥ parārdhyajāmbūnadahemacitraḥ |
ratho'rjunasyāgnirivārcimālī vibhrājate śvetahayaḥ sucakraḥ ||
6.22.10
tamāsthitaḥ keśavasaṅgṛhītaṃ kapidhvajo gāṇḍivabāṇapāṇiḥ |
dhanurdharo yasya samaḥ pṛthivyāṃ na vidyate no bhavitā kadācit ||
6.22.11
uddhartayiṣyaṃstava putrasenām atīva raudraṃ sa bibharti rūpam |
anāyudho yaḥ subhujo bhujābhyāṃ narāśvanāgānyudhi bhasma kuryāt ||
6.22.12
sa bhīmasenaḥ sahito yamābhyāṃ vṛkodaro vīrarathasya goptā |
taṃ tatra siṃharṣabhamattakhelaṃ loke mahendrapratimānakalpam ||
6.22.13
samīkṣya senāgragataṃ durāsadaṃ saṃvivyathuḥ paṅkagatā yathā dvipāḥ |
vṛkodaraṃ vāraṇājadarpaṃ yodhāstvadīyā bhayavignasattvāḥ ||
6.22.14
anīkamadhye tiṣṭhantaṃ rājaputraṃ durāsadam |
abravīdbharataśreṣṭhaṃ guḍākeśaṃ janārdanaḥ ||
6.22.15
vāsudeva uvāca |
ya eṣa roṣātpratapanbalastho yo naḥ senāṃ siṃha ivekṣate ca |
sa eṣa bhīṣmaḥ kuruvaṃśaketuḥ yenāhṛtāstriśataṃ vājimedhāḥ ||
6.22.16
etānyanīkāni mahānubhāvaṃ gūhanti meghā iva raśmimantam |
etāni hatvā puruṣapravīra kāṅkṣasva yuddhaṃ bharatarṣabheṇa ||
Other recensions (1)
- Mahābhārata — Vyāsa, Sanskrit