[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [Mahābhārata](https://indike.org/pramana/in.lit.mahabharata.vyasa) › [Vulgate (Nilakantha's text)](https://indike.org/pramana/in.lit.mahabharata.vyasa*vulgate) › 6.26 # The Great Epic of the Bhārata dynasty 6.26 Vulgate (Nīlakaṇṭha's text) 6.26 - **Language:** Sanskrit ### [6.26.1](https://indike.org/pramana/in.lit.mahabharata.vyasa*vulgate.6.26.1) sañjaya uvāca — taṃ tathā kṛpayāviṣṭamaśrupūrṇākulekṣaṇam | viṣīdantamidaṃ vākyamuvāca madhusūdanaḥ || ### [6.26.2](https://indike.org/pramana/in.lit.mahabharata.vyasa*vulgate.6.26.2) śrībhagavānuvāca — kutastvā kaśmalamidaṃ viṣame samupasthitam | anāryajuṣṭamasvargyamakīrtikaramarjuna || ### [6.26.3](https://indike.org/pramana/in.lit.mahabharata.vyasa*vulgate.6.26.3) klaibyaṃ mā sma gamaḥ pārtha naitattvayyupapadyate | kṣudraṃ hṛdayadaurbalyaṃ tyaktvottiṣṭha parantapa || ### [6.26.4](https://indike.org/pramana/in.lit.mahabharata.vyasa*vulgate.6.26.4) arjuna uvāca — kathaṃ bhīṣmamahaṃ saṃ‍khye droṇaṃ ca madhusūdana | iṣubhiḥ pratiyotsyāmi pūjārhāvarisūdana || ### [6.26.5](https://indike.org/pramana/in.lit.mahabharata.vyasa*vulgate.6.26.5) gurūnahatvā hi mahānubhāvān śreyo bhoktuṃ bhaikṣamapīha loke | hatvārthakāmāṃstu gurūnihaiva bhuñjīya bhogānrudhirapradigdhān || ### [6.26.6](https://indike.org/pramana/in.lit.mahabharata.vyasa*vulgate.6.26.6) na caitadvidmaḥ kataranno garīyo yadvā jayema yadi vā no jayeyuḥ | yāneva hatvā na jijīviṣāmaste'vasthitāḥ pramukhe dhārtarāṣṭrāḥ || ### [6.26.7](https://indike.org/pramana/in.lit.mahabharata.vyasa*vulgate.6.26.7) kārpaṇyadoṣopahatasvabhāvaḥ pṛcchāmi tvāṃ dharmasammūḍhacetāḥ | yacchreyaḥ syānniścitaṃ brūhi tanme śiṣyaste'haṃ śādhi māṃ tvāṃ prapannam || ### [6.26.8](https://indike.org/pramana/in.lit.mahabharata.vyasa*vulgate.6.26.8) na hi prapaśyāmi mamāpanudyādyacchokamucchoṣaṇamindriyāṇām | avāpya bhūmāvasapatnamṛddhaṃ rājyaṃ surāṇāmapi cādhipatyam || ### [6.26.9](https://indike.org/pramana/in.lit.mahabharata.vyasa*vulgate.6.26.9) sañjaya uvāca — evamuktvā hṛṣīkeśaṃ guḍākeśaḥ parantapaḥ | na yotsya iti govindamuktvā tūṣṇīṃ babhūva ha || ### [6.26.10](https://indike.org/pramana/in.lit.mahabharata.vyasa*vulgate.6.26.10) tamuvāca hṛṣīkeśaḥ prahasanniva bhārata | senayorubhayormadhye viṣīdantamidaṃ vacaḥ || ### [6.26.11](https://indike.org/pramana/in.lit.mahabharata.vyasa*vulgate.6.26.11) aśocyānanvaśocastvaṃ prajñāvādāṃśca bhāṣase | gatāsūnagatāsūṃśca nānuśocanti paṇḍitāḥ || ### [6.26.12](https://indike.org/pramana/in.lit.mahabharata.vyasa*vulgate.6.26.12) na tvevāhaṃ jātu nāsaṃ na tvaṃ neme janādhipāḥ | na caiva na bhaviṣyāmaḥ sarve vayamataḥ param || ### [6.26.13](https://indike.org/pramana/in.lit.mahabharata.vyasa*vulgate.6.26.13) dehino'sminyathā dehe kaumāraṃ yauvanaṃ jarā | tathā dehāntaraprāptirdhīrastatra na muhyati || ### [6.26.14](https://indike.org/pramana/in.lit.mahabharata.vyasa*vulgate.6.26.14) mātrāsparśāstu kaunteya śītoṣṇasukhaduḥkhadāḥ | āgamāpāyino'nityāstāṃstitikṣasva bhārata || ### [6.26.15](https://indike.org/pramana/in.lit.mahabharata.vyasa*vulgate.6.26.15) yaṃ hi na vyathayantyete puruṣaṃ puruṣarṣabha | samaduḥkhasukhaṃ dhīraṃ so'mṛtatvāya kalpate || ### [6.26.16](https://indike.org/pramana/in.lit.mahabharata.vyasa*vulgate.6.26.16) nāsato vidyate bhāvo nābhāvo vidyate sataḥ | ubhayorapi dṛṣṭo'ntastvanayostattvadarśibhiḥ || ### [6.26.17](https://indike.org/pramana/in.lit.mahabharata.vyasa*vulgate.6.26.17) avināśi tu tadviddhi yena sarvamidaṃ tatam | vināśamavyayasyāsya na kaścitkartumarhati || ### [6.26.18](https://indike.org/pramana/in.lit.mahabharata.vyasa*vulgate.6.26.18) antavanta ime dehā nityasyoktāḥ śarīriṇaḥ | anāśino'prameyasya tasmādyudhyasva bhārata || ### [6.26.19](https://indike.org/pramana/in.lit.mahabharata.vyasa*vulgate.6.26.19) ya enaṃ vetti hantāraṃ yaścainaṃ manyate hatam | ubhau tau na vijānīto nāyaṃ hanti na hanyate || ### [6.26.20](https://indike.org/pramana/in.lit.mahabharata.vyasa*vulgate.6.26.20) na jāyate mriyate vā kadācinnāyaṃ bhūtvābhavitā vā na bhūyaḥ | ajo nityaḥ śāśvato'yaṃ purāṇo na hanyate hanyamāne śarīre || ### [6.26.21](https://indike.org/pramana/in.lit.mahabharata.vyasa*vulgate.6.26.21) vedāvināśinaṃ nityaṃ ya enamajamavyayam | kathaṃ sa puruṣaḥ pārtha kaṃ ghātayati hanti kam || ### [6.26.22](https://indike.org/pramana/in.lit.mahabharata.vyasa*vulgate.6.26.22) vāsāṃsi jīrṇāni yathā vihāya navāni gṛhṇāti naro'parāṇi | tathā śarīrāṇi vihāya jīrṇānyanyāni saṃyāti navāni dehī || ### [6.26.23](https://indike.org/pramana/in.lit.mahabharata.vyasa*vulgate.6.26.23) nainaṃ chindanti śastrāṇi nainaṃ dahati pāvakaḥ | na cainaṃ kledayantyāpo na śoṣayati mārutaḥ || ### [6.26.24](https://indike.org/pramana/in.lit.mahabharata.vyasa*vulgate.6.26.24) acchedyo'yamadāhyo'yamakledyo'śoṣya eva ca | nityaḥ sarvagataḥ sthāṇuracalo'yaṃ sanātanaḥ || ### [6.26.25](https://indike.org/pramana/in.lit.mahabharata.vyasa*vulgate.6.26.25) avyakto'yamacintyo'yamavikāryo'yamucyate | tasmādevaṃ viditvainaṃ nānuśocitumarhasi || ### [6.26.26](https://indike.org/pramana/in.lit.mahabharata.vyasa*vulgate.6.26.26) atha cainaṃ nityajātaṃ nityaṃ vā manyase mṛtam | tathāpi tvaṃ mahābāho naivaṃ śocitumarhasi || ### [6.26.27](https://indike.org/pramana/in.lit.mahabharata.vyasa*vulgate.6.26.27) jātasya hi dhruvo mṛtyurdhruvaṃ janma mṛtasya ca | tasmādaparihārye'rthe na tvaṃ śocitumarhasi || ### [6.26.28](https://indike.org/pramana/in.lit.mahabharata.vyasa*vulgate.6.26.28) avyaktādīni bhūtāni vyaktamadhyāni bhārata | avyaktanidhanānyeva tatra kā paridevanā || ### [6.26.29](https://indike.org/pramana/in.lit.mahabharata.vyasa*vulgate.6.26.29) āścaryavatpaśyati kaścidenamāścaryavadvadati tathaiva cānyaḥ | āścaryavaccainamanyaḥ śṛṇoti śrutvāpyenaṃ veda na caiva kaścit || ### [6.26.30](https://indike.org/pramana/in.lit.mahabharata.vyasa*vulgate.6.26.30) dehī nityamavadhyo'yaṃ dehe sarvasya bhārata | tasmātsarvāṇi bhūtāni na tvaṃ śocitumarhasi || ### [6.26.31](https://indike.org/pramana/in.lit.mahabharata.vyasa*vulgate.6.26.31) svadharmamapi cāvekṣya na vikampitumarhasi | dharmyāddhi yuddhācchreyo'nyatkṣattriyasya na vidyate || ### [6.26.32](https://indike.org/pramana/in.lit.mahabharata.vyasa*vulgate.6.26.32) yadṛcchayā copapannaṃ svargadvāramapāvṛtam | sukhinaḥ kṣatriyāḥ pārtha labhante yuddhamīdṛśam || ### [6.26.33](https://indike.org/pramana/in.lit.mahabharata.vyasa*vulgate.6.26.33) atha cettvamimaṃ dharmyaṃ saṅgrāmaṃ na kariṣyasi | tataḥ svadharmaṃ kīrtiṃ ca hitvā pāpamavāpsyasi || ### [6.26.34](https://indike.org/pramana/in.lit.mahabharata.vyasa*vulgate.6.26.34) akīrtiṃ cāpi bhūtāni kathayiṣyanti te'vyayām | sambhāvitasya cākīrtirmaraṇādatiricyate || ### [6.26.35](https://indike.org/pramana/in.lit.mahabharata.vyasa*vulgate.6.26.35) bhayādraṇāduparataṃ maṃsyante tvāṃ mahārathāḥ | yeṣāṃ ca tvaṃ bahumato bhūtvā yāsyasi lāghavam || ### [6.26.36](https://indike.org/pramana/in.lit.mahabharata.vyasa*vulgate.6.26.36) avācyavādāṃśca bahūnvadiṣyanti tavāhitāḥ | nindantastava sāmarthyaṃ tato duḥkhataraṃ nu kim || ### [6.26.37](https://indike.org/pramana/in.lit.mahabharata.vyasa*vulgate.6.26.37) hato vā prāpsyasi svargaṃ jitvā vā bhokṣyase mahīm | tasmāduttiṣṭha kaunteya yuddhāya kṛtaniścayaḥ || ### [6.26.38](https://indike.org/pramana/in.lit.mahabharata.vyasa*vulgate.6.26.38) sukhaduḥkhe same kṛtvā lābhālābhau jayājayau | tato yuddhāya yujyasva naivaṃ pāpamavāpsyasi || ### [6.26.39](https://indike.org/pramana/in.lit.mahabharata.vyasa*vulgate.6.26.39) eṣā te'bhihitā sāṅ‍khye buddhiryoge tvimāṃ śṛṇu | buddhyā yukto yayā pārtha karmabandhaṃ prahāsyasi || ### [6.26.40](https://indike.org/pramana/in.lit.mahabharata.vyasa*vulgate.6.26.40) nehābhikramanāśo'sti pratyavāyo na vidyate | svalpamapyasya dharmasya trāyate mahato bhayāt || ### [6.26.41](https://indike.org/pramana/in.lit.mahabharata.vyasa*vulgate.6.26.41) vyavasāyātmikā buddhirekeha kurunandana | bahuśākhā hyanantāśca buddhayo'vyavasāyinām || ### [6.26.42](https://indike.org/pramana/in.lit.mahabharata.vyasa*vulgate.6.26.42) yāmimāṃ puṣpitāṃ vācaṃ pravadantyavipaścitaḥ | vedavādaratāḥ pārtha nānyadastīti vādinaḥ || ### [6.26.43](https://indike.org/pramana/in.lit.mahabharata.vyasa*vulgate.6.26.43) kāmātmānaḥ svargaparā janmakarmaphalapradām | kriyāviśeṣabahulāṃ bhogaiśvaryagatiṃ prati || ### [6.26.44](https://indike.org/pramana/in.lit.mahabharata.vyasa*vulgate.6.26.44) bhogaiśvaryaprasaktānāṃ tayāpahṛtacetasām | vyavasāyātmikā buddhiḥ samādhau na vidhīyate || ### [6.26.45](https://indike.org/pramana/in.lit.mahabharata.vyasa*vulgate.6.26.45) traiguṇyaviṣayā vedā nistraiguṇyo bhavārjuna | nirdvandvo nityasattvastho niryogakṣema ātmavān || ### [6.26.46](https://indike.org/pramana/in.lit.mahabharata.vyasa*vulgate.6.26.46) yāvānartha udapāne sarvataḥsamplutodake | tāvān sarveṣu vedeṣu brāhmaṇasya vijānataḥ || ### [6.26.47](https://indike.org/pramana/in.lit.mahabharata.vyasa*vulgate.6.26.47) karmaṇyevādhikāraste mā phaleṣu kadācana | mā karmaphalaheturbhūrmā te saṅgo'stvakarmaṇi || ### [6.26.48](https://indike.org/pramana/in.lit.mahabharata.vyasa*vulgate.6.26.48) yogasthaḥ kuru karmāṇi saṅgaṃ tyaktvā dhanañjaya | siddhyasiddhyoḥ samo bhūtvā samatvaṃ yoga ucyate || ### [6.26.49](https://indike.org/pramana/in.lit.mahabharata.vyasa*vulgate.6.26.49) dūreṇa hyavaraṃ karma buddhiyogāddhanañjaya | buddhau śaraṇamanviccha kṛpaṇāḥ phalahetavaḥ || ### [6.26.50](https://indike.org/pramana/in.lit.mahabharata.vyasa*vulgate.6.26.50) buddhiyukto jahātīha ubhe sukṛtaduṣkṛte | tasmādyogāya yujyasva yogaḥ karmasu kauśalam || ### [6.26.51](https://indike.org/pramana/in.lit.mahabharata.vyasa*vulgate.6.26.51) karmajaṃ buddhiyuktā hi phalaṃ tyaktvā manīṣiṇaḥ | janmabandhavinirmuktāḥ padaṃ gacchantyanāmayam || ### [6.26.52](https://indike.org/pramana/in.lit.mahabharata.vyasa*vulgate.6.26.52) yadā te mohakalilaṃ buddhirvyatitariṣyati | tadā gantāsi nirvedaṃ śrotavyasya śrutasya ca || ### [6.26.53](https://indike.org/pramana/in.lit.mahabharata.vyasa*vulgate.6.26.53) śrutivipratipannā te yadā sthāsyati niścalā | samādhāvacalā buddhistadā yogamavāpsyasi || ### [6.26.54](https://indike.org/pramana/in.lit.mahabharata.vyasa*vulgate.6.26.54) arjuna uvāca — sthitaprajñasya kā bhāṣā samādhisthasya keśava | sthitadhīḥ kiṃ pṛbhāṣeta kimāsīta vrajeta kim || ### [6.26.55](https://indike.org/pramana/in.lit.mahabharata.vyasa*vulgate.6.26.55) śrībhagavānuvāca — prajahāti yadā kāmānsarvānpārtha manogatān | ātmanyevātmanā tuṣṭaḥ sthitaprajñastadocyate || ### [6.26.56](https://indike.org/pramana/in.lit.mahabharata.vyasa*vulgate.6.26.56) duḥkheṣvanudvignamanāḥ sukheṣu vigataspṛhaḥ | vītarāgabhayakrodhaḥ sthitadhīrmunirucyate || ### [6.26.57](https://indike.org/pramana/in.lit.mahabharata.vyasa*vulgate.6.26.57) yaḥ sarvatrānabhisnehastattatprāpya śubhāśubham | nābhinandati na dveṣṭi tasya prajñā pratiṣṭhitā || ### [6.26.58](https://indike.org/pramana/in.lit.mahabharata.vyasa*vulgate.6.26.58) yadā saṃharate cāyaṃ kūrmo'ṅgānīva sarvaśaḥ | indriyāṇīndriyārthebhyastasya prajñā pratiṣṭhitā || ### [6.26.59](https://indike.org/pramana/in.lit.mahabharata.vyasa*vulgate.6.26.59) viṣayā vinivartante nirāhārasya dehinaḥ | rasavarjaṃ raso'pyasya paraṃ dṛṣṭvā nivartate || ### [6.26.60](https://indike.org/pramana/in.lit.mahabharata.vyasa*vulgate.6.26.60) yatato hyapi kaunteya puruṣasya vipaścitaḥ | indriyāṇi pramāthīni haranti prasabhaṃ manaḥ || ### [6.26.61](https://indike.org/pramana/in.lit.mahabharata.vyasa*vulgate.6.26.61) tāni sarvāṇi saṃyamya yukta āsīta matparaḥ | vaśe hi yasyendriyāṇi tasya prajñā pratiṣṭhitā || ### [6.26.62](https://indike.org/pramana/in.lit.mahabharata.vyasa*vulgate.6.26.62) dhyāyato viṣayānpuṃsaḥ saṅgasteṣūpajāyate | saṅgātsañjāyate kāmaḥ kāmātkrodho'bhijāyate || ### [6.26.63](https://indike.org/pramana/in.lit.mahabharata.vyasa*vulgate.6.26.63) krodhādbhavati sammohaḥ sammohātsmṛtivibhramaḥ | smṛtibhraṃśādbuddhināśo buddhināśātpraṇaśyati || ### [6.26.64](https://indike.org/pramana/in.lit.mahabharata.vyasa*vulgate.6.26.64) rāgadveṣaviyuktaistu viṣayānindriyaiścaran | ātmavaśyairvidheyātmā prasādamadhigacchati || ### [6.26.65](https://indike.org/pramana/in.lit.mahabharata.vyasa*vulgate.6.26.65) prasāde sarvaduḥkhānāṃ hānirasyopajāyate | prasannacetaso hyāśu buddhiḥ paryavatiṣṭhate || ### [6.26.66](https://indike.org/pramana/in.lit.mahabharata.vyasa*vulgate.6.26.66) nāsti buddhirayuktasya na cāyuktasya bhāvanā | na cābhāvayataḥ śāntiraśāntasya kutaḥ sukham || ### [6.26.67](https://indike.org/pramana/in.lit.mahabharata.vyasa*vulgate.6.26.67) indriyāṇāṃ hi caratāṃ yanmano'nuvidhīyate | tadasya harati prajñāṃ vāyurnāvamivāmbhasi || ### [6.26.68](https://indike.org/pramana/in.lit.mahabharata.vyasa*vulgate.6.26.68) tasmādyasya mahābāho nigṛhītāni sarvaśaḥ | indriyāṇīndriyārthebhyastasya prajñā pratiṣṭhitā || ### [6.26.69](https://indike.org/pramana/in.lit.mahabharata.vyasa*vulgate.6.26.69) yā niśā sarvabhūtānāṃ tasyāṃ jāgarti saṃyamī | yasyāṃ jāgrati bhūtāni sā niśā paśyato muneḥ || ### [6.26.70](https://indike.org/pramana/in.lit.mahabharata.vyasa*vulgate.6.26.70) āpūryamāṇamacalapratiṣṭhaṃ samudramāpaḥ praviśanti yadvat | tadvatkāmā yaṃ praviśanti sarve sa śāntimāpnoti na kāmakāmī || ### [6.26.71](https://indike.org/pramana/in.lit.mahabharata.vyasa*vulgate.6.26.71) vihāya kāmānyaḥ sarvānpumāṃścarati niḥspṛhaḥ | nirmamo nirahaṅkāraḥ sa śāntimadhigacchati || ### [6.26.72](https://indike.org/pramana/in.lit.mahabharata.vyasa*vulgate.6.26.72) eṣā brāhmī sthitiḥ pārtha naināṃ prāpya vimuhyati | sthitvāsyāmantakāle'pi brahmanirvāṇamṛcchati || ## Other recensions (1) - [Mahābhārata](https://indike.org/pramana/in.lit.mahabharata.vyasa.6.24.1) — Vyāsa, Sanskrit ## Linked texts (9) - [Critical edition (BORI, Bhīṣmaparvan 23–40)](https://indike.org/pramana/in.darsana.all.gita*crit.2.1) — Sanskrit - [Jīvanmuktiviveka](https://indike.org/pramana/in.darsana.advaita.sastra.jivanmuktiviveka.2.17_2.p14) — Mādhava, Sanskrit - [Mokṣopāya (Kashmiri text, Śāradā transmission)](https://indike.org/pramana/in.darsana.advaita.moksopaya*kashmiri.6.58.2) — Sanskrit - [Agnipurāṇa](https://indike.org/pramana/in.purana.agni.380.3) — Vyāsa, Sanskrit - [Nyāyamañjarī](https://indike.org/pramana/in.darsana.nyaya.nyayamanjari.1.1.229) — Jayanta Bhaṭṭa, Sanskrit - [Śaktisaṅgamatantra](https://indike.org/pramana/in.sampradaya.general.sakta.saktisangama.2.23.27) — Sanskrit - [Svātantryadīpikā](https://indike.org/pramana/in.sampradaya.saiva.trika.darsana.general.svatantryadipika.79) — Sanskrit - [Hāyanaratna](https://indike.org/pramana/in.astro.tajika.varsaphala.hayanaratna.9.22.2) — Balabhadra 1604, Sanskrit - [Ajñānadhvāntacaṇḍabhāskara](https://indike.org/pramana/in.darsana.advaita.vada.amaresvara.ajnanadhvantacandabhaskara.3.129.p1) — Amareśvara Śāstrin 1825, Sanskrit --- Source: [https://indike.org/pramana/in.lit.mahabharata.vyasa*vulgate.6.26](https://indike.org/pramana/in.lit.mahabharata.vyasa*vulgate.6.26) · Pramāṇa