Pramāṇa · Search · About · API

The Great Epic of the Bhārata dynasty 6.7

Vulgate (Nīlakaṇṭha's text) 6.7

Language
Sanskrit

6.7.1

dhṛtarāṣṭra uvāca |
merorathottaraṃ pārśvaṃ pūrvaṃ cācakṣva sañjaya |
nikhilena mahābuddhe mālyavantaṃ ca parvatam ||

6.7.2

sañjaya uvāca |
dakṣiṇena tu nīlasya meroḥ pārśve tathottare |
uttarāḥ kuravo rājanpuṇyāḥ siddhaniṣevitāḥ ||

6.7.3

tatra vṛkṣā madhuphalā nityapuṣpaphalopagāḥ |
puṣpāṇi ca sugandhīni rasavanti phalāni ca ||

6.7.4

sarvakāmaphalāstatra kecidvṛkṣā janādhipa |
apare kṣīriṇo nāma vṛkṣāstatra narādhipa ||

6.7.5

ye kṣaranti sadā kṣīraṃ ṣaḍrasaṃ cāmṛpotamam |
vastrāṇi ca prasūyante phaleṣvābharaṇāni ca ||

6.7.6

sarvā maṇimayī bhūmiḥ sūkṣmakāñcanavālukā |
sarvartusukhasaṃsparśā niṣpaṅkā ca janādhipa |
puṣkariṇyaḥ śubhāstatra sukhasparśā manoramāḥ ||

6.7.7

devalokacyutāḥ sarve jāyante tatra mānavāḥ |
śuklābhijanasampannāḥ sarve supriyadarśanāḥ ||

6.7.8

mithunāni ca jāyante striyaścāpsarasopamāḥ |
teṣāṃ te kṣīriṇāṃ kṣīraṃ pibantyamṛtasannibham ||

6.7.9

mithunaṃ jāyate kāle samaṃ tacca pravardhate |
tulyarūpaguṇopetaṃ samaveṣaṃ tathaiva ca ||

6.7.10

evamevānurūpaṃ ca cakravākasamaṃ vibho |
nirāmayāśca te lokā nityaṃ muditamānasāḥ ||

6.7.11

daśa varṣasahasrāṇi daśa varṣaśatāni ca |
jīvanti te mahārāja na cānyo'nyaṃ jahatyuta ||

6.7.12

bhāruṇḍā nāma śakunāstīkṣṇatuṇḍā mahābalāḥ |
tānnirharantīha mṛtāndarīṣu prakṣipanti ca ||

6.7.13

uttarāḥ kuravo rājanvyākhyātāste samāsataḥ |
meroḥ pārśvamahaṃ pūrvaṃ vakṣyāmyatha yathātatham ||

6.7.14

tasya mūrdhābhiṣekastu bhadrāśvasya viśāmpate |
bhadrasālavanaṃ yatra kālāmraśca mahādrumaḥ ||

6.7.15

kālāmrastu mahārāja nityapuṣpaphalaḥ śubhaḥ |
drumaśca yojanotsedhaḥ siddhacāraṇasevitaḥ ||

6.7.16

tatra te puruṣāḥ śvetāstejoyuktā mahābalāḥ |
striyaḥ kumudavarṇāśca sundaryaḥ priyadarśanāḥ ||

6.7.17

candraprabhāścandravarṇāḥ pūrvacandranibhānanāḥ |
candraśītalagātryaśca nṛtyagītaviśāradāḥ ||

6.7.18

daśa varṣasahasrāṇi tatrāyurbharatarṣabha |
kālāmrarasapītāste nityaṃ saṃsthitayauvanāḥ ||

6.7.19

dakṣiṇena tu nīlasya niṣadhasyottareṇa tu |
sudarśano nāma mahāñjambūvṛkṣaḥ sanātanaḥ ||

6.7.20

sarvakāmaphalaḥ puṇyaḥ siddhacāraṇasevitaḥ |
tasya nāmnā samākhyāto jambūdvīpaḥ sanātanaḥ ||

6.7.21

yojanānāṃ sahastraṃ ca śataṃ ca bharatarṣabha |
utsedho vṛkṣarājasya divaspṛṅmanujeśvara ||

6.7.22

aratnīnāṃ sahasraṃ ca śatāni daśa pañca ca |
pariṇāhastu vṛkṣasya phalānāṃ rasabhedinām ||

6.7.23

patamānāni tānyurvīṃ kurvanti vipulaṃ svanam |
muñcanti ca rasaṃ rājaṃstasminrajatasannibham ||

6.7.24

tasyā jambvāḥ phalaraso nadī bhūtvā janādhipa |
meruṃ pradakṣiṇaṃ kṛtvā samprayātyuttarānkurūn ||

6.7.25

tatra teṣāṃ manaḥśāntirna pipāsā janādhipa |
tasminphalarase pīte na jarā bādhate ca tān ||

6.7.26

tatra jāmbūnadaṃ nāma kanakaṃ devabhūṣaṇam |
indragopakasaṅkāśaṃ jāyate bhāsvaraṃ tu tat ||

6.7.27

taruṇādityavarṇāśca jāyante tatra mānavāḥ |
tathā mālyavataḥ śrṛṅge dṛśyate havyavāṭ sadā ||

6.7.28

nāmnā saṃvartako nāma kālāgnirbharatarṣabha |
tathā mālyavataḥ śrṛṅge pūrvapūrvānugaṇḍikā ||

6.7.29

yojanānāṃ sahasrāṇi pañcaṣaṇmālyavānatha |
mahārajatasaṅkāśā jāyante tatra mānavāḥ ||

6.7.30

brahmalokacyutāḥ sarve sarve sarveṣu sādhavaḥ |
tapastapyanti te tīvraṃ bhavanti hyūrdhvaretasaḥ |
rakṣaṇārthaṃ tu bhūtānāṃ praviśyante divākaram ||

6.7.31

ṣaṣṭistāni sahasrāṇi ṣaṣṭireva śatāni ca |
aruṇasyāgrato yānti parivārya divākaram ||

6.7.32

ṣaṣṭiṃ varṣasahasrāṇi ṣaṣṭimeva śatāni ca |
ādityatāpataptāste viśanti śaśimaṇḍalam ||

Other recensions (1)

Linked texts (4)