The Great Epic of the Bhārata dynasty 6.8
Vulgate (Nīlakaṇṭha's text) 6.8
- Language
- Sanskrit
6.8.1
dhṛtarāṣṭra uvāca |
varṣāṇāṃ caiva nāmāni parvatānāṃ ca sañjaya |
ācakṣva me yathātattvaṃ ye ca parvatavāsinaḥ ||
6.8.2
sañjaya uvāca |
dakṣiṇena tu śvetasya nīlasyaivottareṇa tu |
varṣaṃ ramaṇakaṃ nāma jāyante tatra mānavāḥ ||
6.8.3
śuklābhijanasampannāḥ sarve supriyadarśanāḥ |
niḥsapatnāśca te sarve jāyante tatra mānavāḥ ||
6.8.4
daśa varṣasahasrāṇi śatāni daśa pañca ca |
jīvanti te mahārāja nityaṃ muditamānasāḥ ||
6.8.5
dakṣiṇena tu nīlasya niṣadhasyottareṇa tu |
varṣaṃ hiraṇmayaṃ nāma yatra hairaṇvatī nadī ||
6.8.6
yatra cāyaṃ mahārāja pakṣirāṭ patagottamaḥ |
yakṣānugā mahārāja dhaninaḥ priyadarśanāḥ ||
6.8.7
mahābalāstatra janā rājanmuditamānasāḥ |
ekādaśasahasrāṇi varṣāṇāṃ te janādhipa ||
6.8.8
āyuḥpramāṇaṃ jīvanti śatāni daśa pañca ca |
śrṛṅgāṇi ca vicitrāṇi trīṇyeva manujādhipa ||
6.8.9
ekaṃ maṇimayaṃ tatra tathaikaṃ raukmamadbhutam |
sarvaratnamayaṃ caikaṃ bhavanairupaśobhitam ||
6.8.10
tatra svayamprabhā devī nityaṃ vasati śāṇḍilī |
uttareṇa tu śrṛṅgasya samudrānte janādhipa ||
6.8.11
varṣamairāvataṃ nāma tasmācchṛṅgamataḥ param |
na tatra sūryastapati na jīryante ca mānavāḥ ||
6.8.12
candramāśca sanakṣatro jyotirbhūta ivāvṛtaḥ |
padmaprabhāḥ padmavarṇāḥ padmapatranibhekṣaṇāḥ ||
6.8.13
padmapatrasugandhāśca jāyante tatra mānavāḥ |
aniṣpandā iṣṭagandhā nirāhārā jitendriyāḥ ||
6.8.14
devalokacyutāḥ sarve tathā virajaso nṛpa |
trayodaśasahasrāṇi varṣāṇāṃ te janādhipa ||
6.8.15
āyuḥpramāṇaṃ jīvanti narā bharatasattama |
kṣīrodasya samudrasya tathaivottarataḥ prabhuḥ |
harirvasati vaikuṇṭhaḥ śakaṭe kanakāmaye ||
6.8.16
aṣṭacakraṃ hi tadyānaṃ bhūtayuktaṃ manojavam |
agnivarṇaṃ mahātejo jāmbūnadavibhūṣitam ||
6.8.17
sa prabhuḥ sarvabhūtānāṃ vibhuśca bharatarṣabha |
saṅkṣepo vistaraścaiva kartā kārayitā tathā ||
6.8.18
pṛthivyāpastathā''kāśaṃ vāyustejaśca pārthiva |
sa yajñaḥ sarvabhūtanāmāsyaṃ tasya hutāśanaḥ ||
6.8.19
vaiśampāyana uvāca |
evamuktaḥ sañjayena dhṛtarāṣṭro mahāmanāḥ |
dhyānamanvagamadrājan putrānprati janādhipa ||
6.8.20
sa vicintya mahātejāḥ punarevābravīdvacaḥ |
asaṃśayaṃ sūtaputra kālaḥ saṅkṣipate jagat ||
6.8.21
sṛjate ca punaḥ sarvaṃ neha vidyati śāśvatam |
naro nārāyaṇaścaiva sarvajñaḥ sarvabhūtahṛt ||
6.8.22
devā vaikuṇṭhamityāhurnarā viṣṇumiti prabhum ||
Other recensions (1)
- Mahābhārata — Vyāsa, Sanskrit
Linked texts (1)
- Padmapurāṇa — Vyāsa, Sanskrit