The Great Epic of the Bhārata dynasty 7.202

Vulgate (Nīlakaṇṭha's text) 7.202

Language: Sanskrit

7.202.1

dhṛtarāṣṭra uvāca |
tasminnatirathe droṇe nihate pārṣatena vai |
māmakāḥ pāṇḍavāścaiva kimakurvannataḥ param ||

7.202.2

sañjaya uvāca |
tasminnatirathe droṇe nihate pārṣatena vai |
kauraveṣu ca bhagneṣu kuntīputro dhanañjayaḥ ||

7.202.3

dṛṣṭvā sumahadāścaryamātmano vijayāvaham |
yadṛcchayā''gataṃ vyāsaṃ papraccha bharatarṣabha ||

7.202.4

arjuna uvāca |
saṅgrāme nyahanaṃ śatrūñśaraughairvimalairaham |
agrato lakṣaye yāntaṃ puruṣaṃ pāvakaprabham ||

7.202.5

jvalantaṃ śūlamudyamya yāṃ diśaṃ pratipadyate |
tasyāṃ diśi vidīryante śatravo me mahāmune ||

7.202.6

tena bhagnānarīnsarvānmadbhagnānmanyate janaḥ |
tena bhagnāni sainyāni pṛṣṭhato'nuvrajāmyaham ||

7.202.7

bhagavaṃstanmamācakṣva ko vai sa puruṣottamaḥ |
śūlapāṇirmayā dṛṣṭastejasā sūryasannibhaḥ ||

7.202.8

na padbhyāṃ spṛśate bhūmiṃ na ca śūlaṃ vimuñcati |
śūlācchūlasahasrāṇi niṣpetustasya tejasā ||

7.202.9

vyāsa uvāca |
prajāpatīnāṃ prathamaṃ taijasaṃ puruṣaṃ prabhum |
bhuvanaṃ bhūrbhuvaṃ devaṃ sarvalokeśvaraṃ prabhum ||

7.202.10

īśānaṃ varadaṃ pārtha dṛṣṭavānasi śaṅkaram |
taṃ gaccha śaraṇaṃ devaṃ varadaṃ bhuvaneśvaram ||

7.202.11

mahādevaṃ mahātmānamīśānaṃ jaṭilaṃ vibhum |
tryakṣaṃ mahābhujaṃ rudraṃ śikhinaṃ cīravāsasam ||

7.202.12

mahādevaṃ haraṃ sthāṇuṃ varadaṃ bhuvaneśvaram |
jagatpradhānamajitaṃ jagatprītimadhīśvaram ||

7.202.13

jagadyoniṃ jagadbījaṃ jayinaṃ jagato gatim |
viśvātmānaṃ viśvasṛjaṃ viśvamūrtiṃ yaśasvinam ||

7.202.14

viśveśvaraṃ viśvanaraṃ karmaṇāmīśvaraṃ prabhum |
śambhuṃ svayambhuṃ bhūteśaṃ bhūtabhavyabhavodbhavam ||

7.202.15

yogaṃ yogeśvaraṃ sarvaṃ sarvalokeśvareśvaram |
sarvaśreṣṭhaṃ jagacchreṣṭhaṃ variṣṭhaṃ parameṣṭhinam ||

7.202.16

lokatrayavidhātāramekaṃ lokatrayāśrayam |
śuddhātmānaṃ bhavaṃ bhīmaṃ śaśāṅkakṛtaśekharam ||

7.202.17

śāśvataṃ bhūdharaṃ devaṃ sarvavāgīśvareśvaram |
sudurjayaṃ jagannāthaṃ janma-mṛtyu-jarātigam ||

7.202.18

jñānātmānaṃ jñānagamyaṃ jñānaśreṣṭhaṃ sudurvidam |
dātāraṃ caiva bhaktānāṃ prasādavihitānvarān ||

7.202.19

tasya pāriṣadā divyā rūpairnānāvidhairvibhoḥ |
vāmanā jaṭilā muṇḍā hrasvagrīvā mahodarāḥ ||

7.202.20

mahākāyā mahotsāhā mahākarṇāstathā'pare |
ānanairvikṛtaiḥ pādaiḥ pārtha veṣaiśca vaikṛtaiḥ ||

7.202.21

īdṛśaiḥ sa mahādevaḥ pūjyamāno maheśvaraḥ |
sa śivastāta tejasvī prasādādyāti te'grataḥ ||

7.202.22

tasminghore sadā pārtha saṅgrāme romaharṣaṇe |
drauṇi-karṇa-kṛpairguptāṃ maheṣvāsaiḥ prahāribhiḥ ||

7.202.23

kastāṃ senāṃ tadā pārtha manasā'pi pradharṣayet |
ṛte devānmaheṣvāsādbahurūpānmaheśvarāt ||

7.202.24

sthātumutsahate kaścinna tasminnagrataḥ sthite |
na hi bhūtaṃ samaṃ tena triṣu lokeṣu vidyate ||

7.202.25

gandhenāpi hi saṅgrāme tasya kruddhasya śatravaḥ |
visañjñā hatabhūyiṣṭhā vepanti ca patanti ca ||

7.202.26

tasmai namastu kurvanto devāstiṣṭhanti vai divi |
ye cānye mānavā loke ye ca svargajito narāḥ ||

7.202.27

ye bhaktā varadaṃ devaṃ śivaṃ rudramumāpatim |
ananyabhāvena sadā sarveśaṃ samupāsate ||

7.202.28

ihaloke sukhaṃ prāpya te yānti paramāṃ gatim |
namaskuruṣva kaunteya tasmai śāntāya vai sadā ||

7.202.29

rudrāya śitikaṇṭhāya kaniṣṭhāya suvarcase |
kapardine karālāya haryakṣavaradāya ca ||

7.202.30

yāmyāyāvyaktakeśāya sadvṛtte śaṅkarāya ca |
kāmyāya harinetrāya sthāṇave puruṣāya ca ||

7.202.31

harikeśāya muṇḍāya kṛśāyottāraṇāya ca |
bhāskarāya sutīrthāya devadevāya raṃhase ||

7.202.32

bahurūpāya sarvāya priyāya priyavāsase |
upṇīṣiṇe suvaktrāya sahasrākṣāya mīḍhuṣe ||

7.202.33

giriśāya praśāntāya pataye cīravāsase |
hiraṇyabāhave rājannugrāya pataye diśām ||

7.202.34

parjanyapataye caiva bhūtānāṃ pataye namaḥ |
vṛkṣāṇāṃ pataye caiva gavāṃ ca pataye namaḥ ||

7.202.35

vṛkṣairāvṛtakāyāya senānye madhyamāya ca |
sruvahastāya devāya dhanvine bhārgavāya ca ||

7.202.36

bahurūpāya viśvasya pataye muñjavāsase |
sahasraśirase caiva sahasranayanāya ca ||

7.202.37

sahasrabāhave caiva sahasracaraṇāya ca |
śaraṇaṃ gaccha kaunteya varadaṃ bhuvaneśvaram ||

7.202.38

umāpatiṃ virūpākṣaṃ dakṣayajñanibarhaṇam |
prajānāṃ patimavyagraṃ bhūtānāṃ patimavyayam ||

7.202.39

kapardinaṃ vṛṣāvartaṃ vṛṣanābhaṃ vṛṣadhvajam |
vṛṣadarpaṃ vṛṣapatiṃ vṛṣaśṛṅgaṃ vṛṣarṣabham ||

7.202.40

vṛṣāṅkaṃ vṛṣabhodāraṃ vṛṣabhaṃ vṛṣabhekṣaṇam |
vṛṣāyudhaṃ vṛṣaśaraṃ vṛṣabhūtaṃ vṛṣeśvaram ||

7.202.41

mahodaraṃ mahākāyaṃ dvīpicarmanivāsinam |
lokeśaṃ varadaṃ muṇḍaṃ brahmaṇyaṃ brāhmaṇapriyam ||

7.202.42

triśūlapāṇiṃ varadaṃ khaḍgacarmadharaṃ prabhum |
pinākinaṃ khaḍgadharaṃ lokānāṃ patimīśvaram ||

7.202.43

prapadye śaraṇaṃ devaṃ śaraṇyaṃ cīravāsasam |
namastasmai sureśāya yasya vaiśravaṇaḥ sakhā ||

7.202.44

suvāsase namastubhyaṃ suvratāya sudhanvine |
dhanurdharāya devāya priyadhanvāya dhanvine ||

7.202.45

dhanvantarāya dhanuṣe dhanvācāryāya te namaḥ |
ugrāyudhāya devāya namaḥ suravarāya ca ||

7.202.46

namo'stu bahurūpāya namo'stu bahudhanvine |
namo'stu sthāṇave nityaṃ namastasmai tapasvine ||

7.202.47

namo'stu tripuraghnāya bhagaghnāya ca vai namaḥ |
vanaspatīnāṃ pataye narāṇāṃ pataye namaḥ ||

7.202.48

mātṝṇāṃ pataye caiva gaṇānāṃ pataye namaḥ |
gavāṃ ca pataye nityaṃ yajñānāṃ pataye namaḥ ||

7.202.49

apāṃ ca pataye nityaṃ devānāṃ pataye namaḥ |
pūṣṇo dantavināśāya tryakṣāya varadāya ca ||

7.202.50

nīlakaṇṭhāya piṅgāya svarṇakeśāya vai namaḥ |
karmāṇi yāni divyāni mahādevasya dhīmataḥ ||

7.202.51

tāni te kīrtayiṣyāmi yathāprajñaṃ yathāśrutam |
na surā nāsurā loke na gandharvā na rākṣasāḥ ||

7.202.52

sukhamedhanti kupite tasminnapi guhāgatāḥ |
dakṣasya yajamānasya vidhivatsambhṛtaṃ purā ||

7.202.53

vivyādha kupito yajñaṃ nirdeyastvabhavattadā |
dhanuṣā bāṇamutsṛjya saghoṣaṃ vinanāda ca ||

7.202.54

te na śarma kutaḥ śāntiṃ lebhire sma surāstadā |
vidrute sahasā yajñe kupite ca maheśvare ||

7.202.55

tena jyātalaghoṣeṇa sarve lokāḥ samākulāḥ |
babhūvurvaśagāḥ pārtha nipetuśca surāsurāḥ ||

7.202.56

āpaścukṣubhire sarvāścakampe ca vasundharā |
parvatāśca vyaśīryanta diśo nāgāśca mohitāḥ ||

7.202.57

andhena tamasā lokā na prākāśanta saṃvṛtāḥ |
jaghnivānsaha sūryeṇa sarveṣāṃ jyotiṣāṃ prabhāḥ ||

7.202.58

cukṣubhurbhayabhītāśca śāntiṃ cakrustathaiva ca |
ṛṣayaḥ sarvabhūtānāmātmanaśca sukhaiṣiṇaḥ ||

7.202.59

pūṣāṇamabhyadravata śaṅkaraḥ prahasanniva |
puroḍāśaṃ bhakṣayato daśanān vai vyaśātayut ||

7.202.60

tato niścakramurdevā vepamānā natāḥ sma te |
punaśca sandadhe dīptāndevānāṃ niśitāñśarān ||

7.202.61

sadhūmānsasphuliṅgāṃśca vidyuttoyadasannibhān |
taṃ dṛṣṭvā tu surāḥ sarve praṇipatya maheśvaram ||

7.202.62

rudrasya yajñabhāgaṃ ca viśiṣṭaṃ te tvakalpayan |
bhayena tridaśā rājañcharaṇaṃ ca prapedire ||

7.202.63

tena caivātikopena sa yajñaḥ sandhitastadā |
bhagnāścāpi surā āsan bhītāścādyāpi taṃ prati ||

7.202.64

asurāṇāṃ purāṇyāsaṃstrīṇi vīryavatāṃ divi |
āyasaṃ rājataṃ caiva sauvarṇaṃ paramaṃ mahat ||

7.202.65

sauvarṇaṃ kamalākṣasya tārakākṣasya rājatam |
tṛtīyaṃ tu puraṃ teṣāṃ vidyunmālina āyasam ||

7.202.66

na śaktastāni maghavān bhettuṃ sarvāyudhairapi |
atha sarve surā rudraṃ jagmuḥ śaraṇamarditāḥ ||

7.202.67

te tamūcurmahātmānaṃ sarve devāḥ savāsavāḥ |
brahmadattavarā hyete ghorāstripuravāsinaḥ ||

7.202.68

pīḍayantyadhikaṃ lokaṃ yasmātte varadarpitāḥ |
tvadṛte devadeveśa nānyaḥ śaktaḥ kathañcana ||

7.202.69

hantuṃ daityānmahādeva jahi tāṃstvaṃ suradviṣaḥ |
rudra raudrā bhaviṣyanti paśavaḥ sarvakarmasu ||

7.202.70

nipātayiṣyase caitānasurān bhuvaneśvara |
sa tathoktastathetyuktvā devānāṃ hitakāmyayā ||

7.202.71

gandhamādanavindhyau ca kṛtvā vaṃśadhvajau haraḥ |
pṛthvīṃ sasāgaravanāṃ rathaṃ kṛtvā tu śaṅkaraḥ ||

7.202.72

akṣaṃ kṛtvā tu nāgendraṃ śeṣaṃ nāma trilocanaḥ |
cakre kṛtvā tu candrārkau devadevaḥ pinākadhṛk ||

7.202.73

aṇī kṛtvailapatraṃ ca puṣpadantaṃ ca tryambakaḥ |
yūpaṃ kṛtvā tu malayamavanāhaṃ ca takṣakam ||

7.202.74

yoktrāṅgāni ca sattvāni kṛtvā śarvaḥ pratāpavān |
vedān kṛtvā'tha caturaścaturaśvānmaheśvaraḥ ||

7.202.75

upavedān khalīnāṃśca kṛtvā lokatrayeśvaraḥ |
gāyatrīṃ pragrahaṃ kṛtvā sāvitrīṃ ca maheśvaraḥ ||

7.202.76

kṛtvoṅkāraṃ pratodaṃ ca brahmāṇaṃ caiva sārathim |
gāṇḍīvaṃ mandaraṃ kṛtvā guṇaṃ kṛtvā tu vāsukim ||

7.202.77

viṣṇuṃ śarottamaṃ kṛtvā śalyamagniṃ tathaiva ca |
vāyuṃ kṛtvā'tha vājābhyāṃ puṅkhe vaivasvataṃ yamam ||

7.202.78

vidyutkṛtvā'tha niśrāṇaṃ meruṃ kṛtvātha vai dhvajam |
āruhya sa rathaṃ divyaṃ sarvadevamayaṃ śivaḥ ||

7.202.79

tripurasya vadhārthāya sthāṇuḥ praharatāṃ varaḥ |
asurāṇāmantakaraḥ śrīmānatulavikramaḥ ||

7.202.80

stūyamānaḥ suraiḥ pārtha ṛṣibhiśca tapodhanaiḥ |
sthānaṃ māheśvaraṃ kṛtvā divyamapratimaṃ prabhuḥ ||

7.202.81

atiṣṭhatsthāṇubhūtaḥ sa sahasraṃ parivatsarān |
yadā trīṇi sametāni antarikṣe purāṇi ca ||

7.202.82

triparvaṇā triśalyena tadā tāni bibheda saḥ |
purāṇi na ca taṃ śekurdānavāḥ prativīkṣitum ||

7.202.83

śaraṃ kālāgnisaṃyuktaṃ viṣṇusomasamāyutam |
purāṇi dagdhavantaṃ taṃ devī yātā pravīkṣitum ||

7.202.84

bālamaṅkagataṃ kṛtvā svayaṃ pañcaśikhaṃ punaḥ |
umā jijñāsamānā vai ko'yamityabravītsurān ||

7.202.85

asūyataśca śakrasya vajreṇa prahariṣyataḥ |
bāhuṃ savajraṃ taṃ tasya kruddhasyāstambhayatprabhuḥ ||

7.202.86

prahasya bhagavāṃstūrṇaṃ sarvalokeśvaro vibhuḥ |
tataḥ sa stambhitabhujaḥ śakro devagaṇairvṛtaḥ ||

7.202.87

jagāma sasurastūrṇaṃ brahmāṇaṃ prabhumavyayam |
te taṃ praṇamya śirasā procuḥ prāñjalayastadā ||

7.202.88

kimapyaṅkagataṃ brahman pārvatyā bhūtamadbhūtam |
bālarūpadharaṃ dṛṣṭvā nāsmābhirabhilakṣitaḥ ||

7.202.89

tasmāttvāṃ praṣṭumicchāmo nirjitā yena vai vayam |
ayudhyatā hi bālena līlayā sapurandarāḥ ||

7.202.90

teṣāṃ tadvacanaṃ śrutvā brahmā brahmavidāṃ varaḥ |
dhyātvā sa śambhuṃ bhagavānbālaṃ cāmitatejasam ||

7.202.91

uvāca bhagavānbrahmā śakrādīṃśca surottamān |
carācarasya jagataḥ prabhuḥ sa bhagavānharaḥ ||

7.202.92

tasmātparataraṃ nānyatkiñcidasti maheśvarāt |
yo dṛṣṭo hyumayā sārdhaṃ yuṣmābhiramitadyutiḥ ||

7.202.93

sa pārvatyāḥ kṛte śarvaḥ kṛtavānbālarūpatām |
te mayā sahitā yūyaṃ prāpayadhvaṃ tameva hi ||

7.202.94

sa eṣa bhagavāndevaḥ sarvalokeśvaraḥ prabhuḥ |
na sambubudhire cainaṃ devāstaṃ bhuvaneśvaram ||

7.202.95

saprajāpatayaḥ sarve bālārkasadṛśaprabham |
athābhyetya tato brahmā dṛṣṭvā sa ca maheśvaram ||

7.202.96

ayaṃ śreṣṭha iti jñātvā vavande taṃ pitāmahaḥ |
brahmovāca |
tvaṃ yajño bhuvanasyāsya tvaṃ gatistvaṃ parāyaṇam ||

7.202.97

tvaṃ bhavastvaṃ mahādevastvaṃ dhāma paramaṃ padam |
tvayā sarvamidaṃ vyāptaṃ jagatsthāvarajaṅgamam ||

7.202.98

bhagavanbhūtabhavyeśa lokanātha jagatpate |
prasādaṃ kuru śakrasya tvayā krodhārditasya vai ||

7.202.99

vyāsa uvāca |
padmayonivacaḥ śrutvā tataḥ prīto maheśvaraḥ |
prasādābhimukho bhūtvā aṭṭahāsamathākarot ||

7.202.100

tataḥ prasāda‌yāmāsurumāṃ rudraṃ ca te surāḥ |
abhavacca punarbāhuryathāprakṛti vajriṇaḥ ||

7.202.101

teṣāṃ prasanno bhagavānsapatnīko vṛṣadhvajaḥ |
devānāṃ tridaśaśreṣṭho dakṣayajñavināśanaḥ ||

7.202.102

sa vai rudraḥ sa ca śivaḥ so'gniḥ sarvaśca sarvavit |
sa cendraścaiva vāyuśca so'śvinau ca sa vidyutaḥ ||

7.202.103

sa bhavaḥ sa ca parjanyo mahādevaḥ sanātanaḥ |
sa candramāḥ sa ceśānaḥ sa sūryo varuṇaśca saḥ ||

7.202.104

sa kālaḥ so'ntako mṛtyuḥ sa yamo rātryahāni tu |
māsārdhamāsā ṛtavaḥ sandhye saṃvatsaraśca saḥ ||

7.202.105

dhātā ca sa vidhātā ca viśvātmā viśvakarmakṛt |
sarvāsāṃ devatānāṃ ca dhārayatyavapurvapuḥ ||

7.202.106

sarvadevaiḥ stuto devaḥ saikadhā bahudhā ca saḥ |
śatadhā sahasradhā caiva bhūyaḥ śatasahasradhā ||

7.202.107

dve tanū tasya devasya vedajñā brāhmaṇā viduḥ |
ghorā cānyā śivā cānyā te tanū bahudhā punaḥ ||

7.202.108

ghorā tu yātudhānasya so'gnirviṣṇuḥ sa bhāskaraḥ |
saumyā tu punarevāsya āpo jyotīṃṣi candramāḥ ||

7.202.109

vedāḥ sāṅgopaniṣadaḥ purāṇādhyātmaniścayāḥ |
yatra paramaṃ guhyaṃ sa vaiḥ devo maheśvaraḥ ||

7.202.110

īdṛśaśca mahādevo bhūyāṃśca bhagavānajaḥ |
na hi sarve mayā śakyā vaktuṃ bhagavato guṇāḥ ||

7.202.111

api varṣasahasreṇa satataṃ pāṇḍunandana |
sarvairgrahairgṛhītānvai sarvapāpasamanvitān ||

7.202.112

sa mocayati suprītaḥ śaraṇyaḥ śaraṇāgatān |
āyurārogyamaiśvaryaṃ vittaṃ kāmāṃśca puṣkalān ||

7.202.113

sa dadāti manuṣyebhyaḥ sa caivākṣipate punaḥ |
sendrādiṣu ca deveṣu tasya caiśvaryamucyate ||

7.202.114

sa caiva vyāpṛto loke manuṣyāṇāṃ śubhāśubhe |
aiśvaryāccaiva kāmānāmīśvaraśca sa ucyate ||

7.202.115

maheśvaraśca mahatāṃ bhūtānāmīśvaraśca saḥ |
bahubhirbahudhā rūpairviśvaṃ vyāpnoti vai jagat ||

7.202.116

tasya devasya yadvaktraṃ samudre tadadhiṣṭhitam |
vaḍavāmukheti vikhyātaṃ pibattoyamayaṃ haviḥ ||

7.202.117

eṣa caiva śmaśāneṣu devo vasati nityaśaḥ |
yajantyenaṃ janāstatra vīrasthāna itīśvaram ||

7.202.118

asya dīptāni rūpāṇi ghorāṇi ca bahūni ca |
loke yānyasya pūjyante manuṣyāḥ pravadanti ca ||

7.202.119

nāmadheyāni lokeṣu bahūnyasya yathārthavat |
nirucyante mahattvācca vibhutvātkarmaṇastathā ||

7.202.120

vede cāsya samāmnātaṃ śatarudriyamuttamam |
nāmnā cānantarudreti hyupasthānaṃ mahātmanaḥ ||

7.202.121

sakāmānāṃ prabhurdevo ye divyā ye ca mānuṣāḥ |
sa vibhuḥ sa prabhurdevo viśvaṃ vyāpnoti vai mahat ||

7.202.122

jyeṣṭhaṃ bhūtaṃ vadantyenaṃ brāhmaṇā sunayastathā |
prathamo hyeṣa devānāṃ sukhādasthānalo'bhavat ||

7.202.123

sarvathā yatpaśūnpāti taiśca yadramate punaḥ |
teṣāmadhipatiryacca tasmātpaśupatiḥ smṛtaḥ ||

7.202.124

divyaṃ ca brahmacaryeṇa liṅgamasya yathā sthitam |
mahayatyeṣa lokāṃśca maheśvara iti smṛtaḥ ||

7.202.125

ṛṣayaścaiva devāśca gandharvāpsarasastathā |
liṅgamasyārcayanti sma taccāpyūrdhvaṃ samāsthitam ||

7.202.126

pūjyamāne tatastasminmodate sa maheśvaraḥ |
sukhī prītaśca bhavati prahṛṣṭaścaiva śaṅkaraḥ ||

7.202.127

yadasya bahudhā rūpaṃ bhūtabhavyabhavasthitam |
sthāvaraṃ jaṅgamaṃ caiva bahurūpastataḥ smṛtaḥ ||

7.202.128

ekākṣo jājvalannāste sarvato'kṣimayo'pi vā |
krodhādyaścāviśallokāṃstasmātsarva iti smṛtaḥ ||

7.202.129

dhūmrarūpaṃ ca yattasya dhūrjaṭistena cocyate |
viśvedevāśca yattasminviśvarūpastataḥ smṛtaḥ ||

7.202.130

tisro devīryadā caiva bhajate bhuvaneśvaraḥ |
dyāmapaḥ pṛthivīṃ caiva tryambakaśca tataḥ smṛtaḥ ||

7.202.131

sa medhayati yannityaṃ sarvārthānsarvakarmasu |
śivamicchanmanuṣyāṇāṃ tasmādeṣa śivaḥ smṛtaḥ ||

7.202.132

sahasrākṣo'yutākṣo vā sarvato'kṣimayo'pi vā |
yacca viśvaṃ mahat pāti mahādevastataḥ smṛtaḥ ||

7.202.133

mahatpūrvaṃ sthito yacca prāṇotpattisthitaśca yat |
sthitaliṅgaśca yannityaṃ tasmātsthāṇuriti smṛtaḥ ||

7.202.134

sūryācandramasorloke prakāśante rucaśca yāḥ |
tāḥ keśasañjñitāstryakṣe vyomakeśastataḥ smṛtaḥ ||

7.202.135

bhūtaṃ bhavyaṃ bhaviṣyaṃ ca sarvaṃ jagadaśeṣataḥ |
bhava eva tato yasmādbhūtabhavyabhavodbhavaḥ ||

7.202.136

kapiḥ śreṣṭha iti prokto dharmaśca vṛṣa ucyate |
sa devadevo bhagavānkīrtyate'to vṛṣākapiḥ ||

7.202.137

brahmāṇamindraṃ varuṇaṃ yamaṃ dhanadameva ca |
nigṛhya harate yasmāttasmāddhara iti smṛtaḥ ||

7.202.138

nimīlitābhyāṃ netrābhyāṃ balāddevo maheśvaraḥ |
lalāṭe netramasṛjattena tryakṣaḥ sa ucyate ||

7.202.139

viṣamasthaḥ śarīreṣu samaśca prāṇināmiha |
sa vāyurviṣamastheṣu prāṇopānaḥ śarīriṣu ||

7.202.140

pūjayedvigrahaṃ yastu liṅgaṃ cāpi mahātmanaḥ |
liṅgaṃ pūjayitā nityaṃ mahatīṃ śriyamaśnute ||

7.202.141

ūrubhyāmardhamāgneyaṃ somārdhaṃ ca śivā tanuḥ |
ātmano'rdhaṃ tathā cāgniḥ somo'rdhaṃ punarucyate ||

7.202.142

taijasī mahatī dīptā devebhyo'sya śivā tanuḥ |
bhāsvatī mānuṣeṣvasya tanurghorā'gnirucyate ||

7.202.143

brahmacaryaṃ caratyeṣa śivā yā'sya tanustayā |
yā'sya ghoratarā mūrtiḥ sarvānatti tayeśvaraḥ ||

7.202.144

yannirdahati yattīkṣṇo yadugro yatpratāpavān |
māṃsaśoṇitamajjādo yattato rudra ucyate ||

7.202.145

eṣa devo mahādevo yo'sau pārtha tavāgrataḥ |
saṅgrāme śātravānnighnaṃstvayā dṛṣṭaḥ pinākadhṛk ||

7.202.146

sindhurājavadhārthāya pratijñāte tvayā'nagha |
kṛṣṇena darśitaḥ svapne yastu śailendramūrdhani ||

7.202.147

eṣa vai bhagavāndevaḥ saṅgrāme yāti te'grataḥ |
yena dattāni te'strāṇi yaistvayā dānavā hatāḥ ||

7.202.148

dhanyaṃ yaśasyamāyuṣyaṃ puṇyaṃ vedaiśca sammitam |
devadevasya te pārtha vyākhyātaṃ śatarudriyam ||

7.202.149

sarvārthasādhanaṃ puṇyaṃ sarvakilviṣanāśanam |
sarvapāpapraśamanaṃ sarvaduḥkhabhayāpaham ||

7.202.150

caturvidhamidaṃ stotraṃ yaḥ śṛṇoti naraḥ sadā |
vijitya śatrūnsarvānsa rudraloke mahīyate ||

7.202.151

caritaṃ mahātmano nityaṃ sāṅgrāmikamidaṃ smṛtam |
paṭhanvai śatarudrīyaṃ śṛṇvaṃśca satatotthitaḥ ||

7.202.152

bhakto viśveśvaraṃ devaṃ mānuṣeṣu ca yaḥ sadā |
varānnkāmānsa labhate prasanne vyambake naraḥ ||

7.202.153

gaccha yuddhyasva kaunteya na tavāsti parājayaḥ |
yasya mantrī ca goptā ca pārśvastho hi janārdanaḥ ||

7.202.154

sañjaya uvāca |
evamuktvā'rjunaṃ saṅkhye parāśarasutastadā |
jagāma bharataśreṣṭha yathāgatamarindama ||

7.202.155

yuddhaṃ kṛtvā mahaddhoraṃ pañcāhāni mahābalaḥ |
brāhmaṇo nihato rājan brahmalokamavāptavān ||

7.202.156

svadhīte yatphalaṃ vede tada‌sminnapi parvaṇi |
kṣatriyāṇāmabhīrūṇāṃ yuktamatra mahadyaśaḥ ||

7.202.157

ya idaṃ paṭhate parva śṛṇuyādvāpi nityaśaḥ |
sa mucyate mahāpāpaiḥ kṛtairghoraiśca karmabhiḥ ||

7.202.158

yajñāvāptirbāhmaṇasyeha nityaṃ ghore yuddhe kṣatriyāṇāṃ yaśaśca |
śeṣau varṇau kāmamiṣṭaṃ labhete putrānpautrānnityamiṣṭāṃstathaiva ||

Other recensions (1)

Mahābhārata — Vyāsa, Sanskrit

Linked texts (2)

Ajitāgama — Sanskrit
Rauravāgama — Sanskrit