The Great Epic of the Bhārata dynasty 8.75

Vulgate (Nīlakaṇṭha's text) 8.75

dhṛtarāṣṭra uvāca |
samāgame pāṇḍavasṛñjayānāṃ mahābhaye māmakānāmagādhe |
dhanañjaye tāta raṇāya yāte karṇena tadyuddhamatho'tra kīdṛk ||

sañjaya uvāca |
teṣāmanīkāni bṛhaddhvajāni raṇe samṛddhāni samāgatāni |
garjanti bherīninadonmukhāni nādairyathā meghagaṇāstapānte ||

mahāgajābhrākulamastratoyaṃ vāditranemītalaśabdavacca |
hiraṇyacitrāyudhavidyutaṃ ca śarāsinārācamahāstradhāram ||

tadbhīmavegaṃ rudhiraughavāhi khaḍgākulaṃ kṣatriyajīvaghāti |
anārtavaṃ krūramaniṣṭavarṣaṃ babhūva tatsaṃharaṇaṃ prajānām ||

ekaṃ rathaṃ samparivārya mṛtyuṃ nayantyaneke ca rathāḥ sametāḥ |
ekastathaikaṃ rathinaṃ rathāgryāṃstathā rathaścāpi rathānanekān ||

rathaṃ sasūtaṃ sahayaṃ ca kañcitkaścidrathī mṛtyuvaśaṃ nināya |
nināya cāpyekagajena kaścidrathānbahūn mṛtyuvaśe tathā'śvān ||

rathānsasūtān sahayāngajāṃśca sarvānarīnmṛtyuvaśaṃ śaraughaiḥ |
ninye hayāṃścaiva tathā sasādīn padātisaṅghāṃśca tathaiva pārthaḥ ||

kṛpaḥ śikhaṇḍī ca raṇe sametau duryodhanaṃ sātyakiradhyagacchat |
śrutastathā droṇaputreṇa sārdhaṃ yudhāmanyuścitrasenena sārdham ||

karṇasya putraṃ tu rathī suṣeṇaṃ samāgataṃ sṛñjayaścottamaujāḥ |
gāndhārarājaṃ sahadevaḥ kṣudhārto maharṣabhaṃ siṃha ivābhyadhāvat ||

śatānīko nākuliḥ karṇaputraṃ yuvā yuvānaṃ vṛṣasenaṃ śaraughaiḥ |
samārpayatkarṇaputraśca śūraḥ pāñcāleyaṃ śaravarṣairanekaiḥ ||

ratharṣabhaḥ kṛtavarmāṇamārchanmādrīputro nakulaścitrayodhī |
pañcālānāmadhipo yājñaseniḥ senāpatiḥ karṇamārchatsasainyam ||

duḥśāsano bhārata bhāratī ca saṃśaptakānāṃ pṛtanā samṛddhā |
bhīmaṃ raṇe śastrabhṛtāṃ variṣṭhaṃ bhīmaṃ samārchattamasahyavegam ||

karṇātmajaṃ tatra jaghāna vīrastathā'cchinaccottamaujāḥ prasahya |
tasyottamāṅgaṃ nipapāta bhūmau ninādayadgāṃ ninadena khaṃ ca ||

suṣeṇaśīrṣaṃ patitaṃ pṛthivyāṃ vilokya karṇo'tha tadārtarūpaḥ |
krodhāddhayāṃstasya rathaṃ dhvajaṃ ca bāṇaiḥ sudhārairniśitairakṛntat ||

sa tūttamaujā niśitaiḥ pṛṣatkairvivyādha khaḍgena ca bhāsvareṇa |
pārṣṇigrahāṃścaiva kṛpasya hatvā śikhaṇḍivāhaṃ sa tato'dhyarohat ||

kṛpaṃ tu dṛṣṭvā virathaṃ rathastho naicchaccharaistāḍayituṃ śikhaṇḍī |
taṃ drauṇirāvārya rathaṃ kṛpasya samujjahre paṅkagatāṃ yathā gām ||

hiraṇyavarmā niśitaiḥ pṛṣatkaistavātmajānāmanilātmajo vai |
atāpayatsainyamatīva bhīmaḥ kāle śucau madhyagato yathā'rkaḥ ||

Other recensions (1)