Pramāṇa · Search · About · API

The Great Epic of the Bhārata dynasty 9.7

Vulgate (Nīlakaṇṭha's text) 9.7

Language
Sanskrit

9.7.1

sañjaya uvāca |
etacchrutvā vaco rājño madrarājaḥ pratāpavān |
duryodhanaṃ tadā rājan vākyametaduvāca ha ||

9.7.2

duryodhana mahābāho śṛṇu vākyavidāṃ vara |
yāvatau manyase kṛṣṇau rathasthau rathināṃ varau ||

9.7.3

na me tulyāvubhāvetau bāhuvīrye kathañcana |
udyatāṃ pṛthivīṃ sarvāṃ sasurāsuramānavām ||

9.7.4

yodhayeyaṃ raṇamukhe saṅkruddhaḥ kimu pāṇḍavān |
vijeṣyāmi raṇe pārthan somakāṃśca samāgatān ||

9.7.5

ahaṃ senāpraṇetā te bhaviṣyāmi na saṃśayaḥ |
taṃ ca vyūhaṃ vidhāsyāmi na tariṣyanti yaṃ pare ||

9.7.6

iti satyaṃ bravīmyeṣa duryodhana na saṃśayaḥ |
evamuktastato rājā madrādhipatimañjasā ||

9.7.7

abhyaṣiñcata senāyā madhye bharatasattama |
vidhinā śāstradṛṣṭena kliṣṭarūpo viśāmpate ||

9.7.8

abhiṣikte tatastasminsiṃhanādo mahānabhūt |
tava sainye'bhyavādyanta vāditrāṇi ca bhārata ||

9.7.9

kuṣṭāścāsaṃstathā yodhā madrakāśca mahārathāḥ |
tuṣṭuvuścaiva rājānaṃ śalyamāhavaśobhinam ||

9.7.10

jaya rājaṃścirañjīva jahi śatrūnsamāgatān |
tava bāhubalaṃ prāpya dhārtarāṣṭrā mahābalāḥ ||

9.7.11

nikhilāḥ pṛthivīṃ sarvā praśāsantu hatadviṣaḥ |
tvaṃ hi śakto raṇe jetuṃ sasurāsuramānavān ||

9.7.12

martyadharmāṇa iha tu kimu sṛñjayasomakān |
evaṃ sampūjyamānastu madrāṇāmadhipo balī ||

9.7.13

harṣaṃ prāpa tadā vīro durāpamakṛtātmabhiḥ |
śalya uvāca |
adya cāhaṃ raṇe sarvān pañcālānsaha pāṇḍavaiḥ ||

9.7.14

nihaniṣyāmi vā rājan svargaṃ yāsyāmi vā hataḥ |
adya paśyantu māṃ lokā vicarantamabhītavat ||

9.7.15

adya pāṇḍusutāḥ sarve vāsudevaḥ sasātyakiḥ |
pañcālāścedayaścaiva draupadeyāśca sarvaśaḥ ||

9.7.16

dhṛṣṭadyumnaḥ śikhaṇḍī ca sarve cāpi prabhadrakāḥ |
vikramaṃ mama paśyantu dhanuṣaśca mahadbalam ||

9.7.17

lāghavaṃ cāstravīryaṃ ca bhujayośca balaṃ yudhi |
adya paśyantu me pārthāḥ siddhāśca saha cāraṇaiḥ ||

9.7.18

yādṛśaṃ me balaṃ bāhvoḥ sampadastreṣu yā ca me |
adya me vikramaṃ dṛṣṭvā pāṇḍavānāṃ mahārathāḥ ||

9.7.19

pratīkāraparā bhūtvā ceṣṭantāṃ vividhāḥ kriyāḥ |
adya sainyāni pāṇḍūnāṃ drāvayiṣye samantataḥ ||

9.7.20

droṇabhīṣmāvati vibho sūtaputraṃ ca saṃyuge |
vicariṣye raṇe yudhyanpriyārthaṃ tava kaurava ||

9.7.21

sañjaya uvāca |
abhiṣikte tathā śalye tava sainyeṣu mānada |
na karṇaṃ vyasanaṃ kiñcinmenire tatra bhārata ||

9.7.22

hṛṣṭāḥ sumanasaścaiva babhūvustatra sainikāḥ |
menire nihatānpārthānmadrarājavaśaṃ gatān ||

9.7.23

praharṣaṃ prāpya senā tu tāvakī bharatarṣabha |
tāṃ rātrimuṣitā suptā harṣacittā ca sābhavat ||

9.7.24

sainyasya tava taṃ śabdaṃ śrutvā rājā yudhiṣṭhiraḥ |
vārṣṇeyamabravīdvākyaṃ sarvakṣatrasya paśyataḥ ||

9.7.25

madrarājaḥ kṛtaḥ śalyo dhārtarāṣṭreṇa mādhava |
senāpatirmaheṣvāsaḥ sarvasainyeṣu pūjitaḥ ||

9.7.26

etajjñātvā yathābhūtaṃ kuru mādhava yatkṣamam |
bhavānnetā ca goptā ca vidhatsva yadanantaram ||

9.7.27

tamabravīnmahārāja vāsudevo janādhipam |
ārtāyanimahaṃ jāne yathā tattvena bhārata ||

9.7.28

vīryavāṃśca mahātejā mahātmā ca viśeṣataḥ |
kṛtī ca citrayodhī ca saṃyukto lāghavena ca ||

9.7.29

yādṛgbhīṣmastathā droṇo yādṛkkarṇaśca saṃyuge |
tādṛśastadviśiṣṭo vā madrarājo mato mama ||

9.7.30

yuddhyamānasya tasyāhaṃ cintayānaśca bhārata |
yoddhāraṃ nādhigacchāmi tulyarūpaṃ janādhipa ||

9.7.31

śikhaṇḍyarjunabhīmānāṃ sātvatasya ca bhārata |
dhṛṣṭadyumnasya ca tathā balenābhyadhiko raṇe ||

9.7.32

madrarājo mahārājaḥ siṃhadviradavikramaḥ |
vicariṣyatyabhīḥ kāle kālaḥ kruddhaḥ prajāsviva ||

9.7.33

tasyādya na prapaśyāmi pratiyoddhāramāhave |
tvāmṛte puruṣavyāghra śārdūlasamavikramam ||

9.7.34

sa devaloke kṛtsne'sminnānyastvattaḥ pumān bhavet |
madrarājaṃ raṇe kruddhaṃ yo hanyāt kurunandana ||

9.7.35

ahanyahani yudhyantaṃ kṣobhayantaṃ balaṃ tava |
tasmājjahi raṇe śalyaṃ maghavāniva śambaram ||

9.7.36

ajeyaścāpyasau vīro dhārtarāṣṭreṇa satkṛtaḥ |
tavaiva hi jayo nūnaṃ hate madreśvare yudhi ||

9.7.37

tasminhate hataṃ sarvaṃ dhārtarāṣṭrabalaṃ mahat |
etacchrutvā mahārāja vacanaṃ mama sāmpratam ||

9.7.38

pratyudyāhi raṇe pārtha madrarājaṃ mahāratham |
jahi cainaṃ mahābāho vāsavo namuciṃ yathā ||

9.7.39

na caivātra dayā kāryā mātulo'yaṃ mameti vai |
kṣatradharmaṃ puraskṛtya jahi madrajaneśvaram ||

9.7.40

droṇabhīṣmārṇavaṃ tīrtvā karṇapātālasambhavam |
mā nimajjasva sagaṇaḥ śalyamāsādya goṣpadam ||

9.7.41

yacca te tapaso vīryaṃ yacca kṣātraṃ balaṃ tava |
taddarśaya raṇe sarvaṃ jahi cainaṃ mahāratham ||

9.7.42

etāvaduktvā vacanaṃ keśavaḥ paravīrahā |
jagāma śibiraṃ sāyaṃ pūjyamāno'tha pāṇḍavaiḥ ||

9.7.43

keśave tu tadā yāte dharmaputro yudhiṣṭhiraḥ |
visṛjya sarvān bhrātṝṃśca pañcālānatha somakān ||

9.7.44

suṣvāpa rajanīṃ tāṃ tu viśalya iva kuñjaraḥ |
te ca sarve maheṣvāsāḥ pañcālāḥ pāṇḍavāstathā ||

9.7.45

karṇasya nidhane hṛṣṭāḥ suṣupustāṃ niśāṃ tadā |
gatajvaraṃ maheṣvāsaṃ tīrṇapāraṃ mahāratham ||

9.7.46

babhūva pāṇḍaveyānāṃ sainyaṃ ca muditaṃ nṛpa |
sūtaputrasya nidhane jayaṃ labdhvā ca māriṣa ||

Other recensions (1)