[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [The Mahābhārata and its versions](https://indike.org/pramana/in.lit.mahabharata) › [The Great Epic of the Bhārata dynasty](https://indike.org/pramana/in.lit.mahabharata.vyasa) › 12.352 # The Great Epic of the Bhārata dynasty 12.352: dvipañcāśadadhikatriśatatamo'dhyāyaḥ Mahābhārata 12.352 - **Language:** Sanskrit ### dvipañcāśadadhikatriśatatamo'dhyāyaḥ ### [12.352.1](https://indike.org/pramana/in.lit.mahabharata.vyasa.12.352.1) brāhmaṇa uvāca | āścaryaṃ nātra saṃdehaḥ suprīto'smi bhujaṃgama | anvarthopagatairvākyaiḥ panthānaṃ cāsmi darśitaḥ || 1 || ### [12.352.2](https://indike.org/pramana/in.lit.mahabharata.vyasa.12.352.2) svasti te'stu gamiṣyāmi sādho bhujagasattama | smaraṇīyo'smi bhavatā saṃpreṣaṇaniyojanaiḥ || 2 || ### [12.352.3](https://indike.org/pramana/in.lit.mahabharata.vyasa.12.352.3) nāga uvāca | anuktvā madgataṃ kāryaṃ kvedānīṃ prasthito bhavān | ucyatāṃ dvija yatkāryaṃ yadarthaṃ tvamihāgataḥ || 3 || ### [12.352.4](https://indike.org/pramana/in.lit.mahabharata.vyasa.12.352.4) uktānukte kṛte kārye māmāmantrya dvijarṣabha | mayā pratyabhyanujñātastato yāsyasi brāhmaṇa || 4 || ### [12.352.5](https://indike.org/pramana/in.lit.mahabharata.vyasa.12.352.5) na hi māṃ kevalaṃ dṛṣṭvā tyaktvā praṇayavāniha | gantumarhasi viprarṣe vṛkṣamūlagato yathā || 5 || ### [12.352.6](https://indike.org/pramana/in.lit.mahabharata.vyasa.12.352.6) tvayi cāhaṃ dvijaśreṣṭha bhavānmayi na saṃśayaḥ | loko'yaṃ bhavataḥ sarvaḥ kā cintā mayi te'nagha || 6 || ### [12.352.7](https://indike.org/pramana/in.lit.mahabharata.vyasa.12.352.7) brāhmaṇa uvāca | evametanmahāprājña vijñātārtha bhujaṃgama | nātiriktāstvayā devāḥ sarvathaiva yathātatham || 7 || ### [12.352.8](https://indike.org/pramana/in.lit.mahabharata.vyasa.12.352.8) ya evāhaṃ sa eva tvamevametadbhujaṃgama | ahaṃ bhavāṃśca bhūtāni sarve sarvatragāḥ sadā || 8 || ### [12.352.9](https://indike.org/pramana/in.lit.mahabharata.vyasa.12.352.9) āsīttu me bhogapate saṃśayaḥ puṇyasaṃcaye | so'hamuñchavrataṃ sādho cariṣyāmyarthadarśanam || 9 || ### [12.352.10](https://indike.org/pramana/in.lit.mahabharata.vyasa.12.352.10) eṣa me niścayaḥ sādho kṛtaḥ kāraṇavattaraḥ | āmantrayāmi bhadraṃ te kṛtārtho'smi bhujaṃgama || 10 || ## Other recensions (2) - [Southern recension](https://indike.org/pramana/in.lit.mahabharata.vyasa*southern.12.374.1) — Sanskrit - [Vulgate (Nīlakaṇṭha's text)](https://indike.org/pramana/in.lit.mahabharata.vyasa*vulgate.12.364.1) — Sanskrit --- Source: [https://indike.org/pramana/in.lit.mahabharata.vyasa.12.352](https://indike.org/pramana/in.lit.mahabharata.vyasa.12.352) · Pramāṇa