<!-- Pramāṇa, a library of Indian primary sources · https://indike.org/pramana/in.lit.plays.allegorical.jivananda.3.3.p1 -->

[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Drama (rūpaka)](https://indike.org/pramana/in.lit.plays) › [Allegorical plays](https://indike.org/pramana/in.lit.plays.allegorical) › [Jivananda](https://indike.org/pramana/in.lit.plays.allegorical.jivananda) › 3.3.p1

# Jivananda 3.3.p1

Jīvānanda 3.3.p1

- **Language:** Sanskrit

### [3.3.p1](https://indike.org/pramana/in.lit.plays.allegorical.jivananda.3.3.p1)

puruṣaḥ—astvidaṃ rājamandiraṃ tathāpi supraveśamasmatsadṛśāmiti śrutamasti  
nāgarikaḥ—supraveśamiti kasmāttvayā śrutam  
puruṣaḥ—āryamiśrebhya eva  
nāgarikaḥ—hanta, kimasmābhiridaṃ kathitam  
puruṣaḥ—nahi nahi | anyajanaiḥ  
nāgarikaḥ—kaiste kathitam | yadidaṃ paricitajanasyāpi rājaśāsanamantareṇa duṣpraveśam, kiṃ punaraparicitasya te  
kiṃkaraḥ—visaṃsthulevāsya vacanavyaktiḥ gṛhīta iva corastarakatārakavilocanaḥ paśyannayaṃ vaktuṃ na śaktaḥ pratyuttaraṃ tataścara iva lakṣyate  
nāgarikaḥ—tarhi śikṣayatu bhavānimam  
kiṃkaraḥ—are, kathaya tathyam | mṛṣāvādinastava vaidikatā rājaśāsanasya na virodhinī | (iti kaśāmudyacchati |)  
puruṣaḥ—mā tāḍaya | tathyaṃ vadāmi  
nāgarikaḥ—yadi tathyaṃ vadasi tadā vijñānamantriṇaṃ darśayitvā saṃbhāvayiṣyāmi  
kiṃkaraḥ—pratīhāryā dhāraṇayā saha prāsādamadhirūḍho mantrī | tatsaṃnidhau tvamapi neṣyase  
puruṣaḥ—(svagatam |) tathā cenmama durlabhameva jīvitam | (prakāśaṃ bhītimabhinīya |) abhayaṃ me dīyatāṃ yadi tathyameva śrotavyam | (iti praṇamati |)  
nāgarikaḥ—dattabhayo'si | kathayātmānam  
puruṣaḥ—(utthāya prāñjaliḥ |) hṛdrogo'smi | visṛja māṃ dayayā  
nāgarikaḥ—cāra evāyaṃ vaidikaveṣamavalambyāgato dattābhayaśca  
kiṃkaraḥ—tarhi kiṃ kartavyam  
nāgarikaḥ—'sarvamidaṃ rājakāryaṃ tvayā kasmaicidapi na kathanīyam'  
iti śapathaṃ gṛhītvā purādbahirvisṛjyatām | athavā kimanena varākeṇa  
kathanīyam | dattābhayo'yamiti mantriṇe nivedya kathaṃcinmocayitavyaḥ  
kiṃkaraḥ—tathā karomi | (iti niṣkrāntaḥ |)

- [Previous: 3.3](https://indike.org/pramana/in.lit.plays.allegorical.jivananda.3.3)
- [Next: 3.3.p2](https://indike.org/pramana/in.lit.plays.allegorical.jivananda.3.3.p2)
- [Up: 3.3](https://indike.org/pramana/in.lit.plays.allegorical.jivananda.3.3)

## Linked texts (1)

- [Śrīkaṇṭhacarita](https://indike.org/pramana/in.lit.kavya.mahakavya.saiva.sivavijaya.srikanthacarita.29.3.p1) — Maṅkha, Sanskrit

---
Source: [https://indike.org/pramana/in.lit.plays.allegorical.jivananda.3.3.p1](https://indike.org/pramana/in.lit.plays.allegorical.jivananda.3.3.p1) · Pramāṇa
