[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Drama (rūpaka)](https://indike.org/pramana/in.lit.plays) › [Kṛṣṇa plays](https://indike.org/pramana/in.lit.plays.krsna) › [Caitanyacandrodaya](https://indike.org/pramana/in.lit.plays.krsna.caitanyacandrodaya) › 8.2 # Caitanyacandrodaya 8.2 Caitanyacandrodaya 8.2 - **Language:** Sanskrit ### [8.2](https://indike.org/pramana/in.lit.plays.krsna.caitanyacandrodaya.8.2) tathāpi kati na vihitaṃ stotraṃ kākuḥ katīha na kalpitā kati na racitaṃ prāṇatyāgādikaṃ bhayadarśanam kati na ruditaṃ dhṛtvā pādau tathāpi sa jagmivānprakṛtimahatāṃ tulyau syātāmanugrahanigrahau ### [8.2.p1](https://indike.org/pramana/in.lit.plays.krsna.caitanyacandrodaya.8.2.p1) rājā—(sotkaṇṭham |) punaratrāgamiṣyanti bhaṭṭācāryaḥ—atha kim | saṅginastvatra vartante rājā—kathamekākī calitaḥ bhaṭṭācāryaḥ—tādṛśaḥ kathamekākī | tathāpi mayā samīcīnā viprāḥ saṅge niyuktāḥ santi rājā—kiyaddūraṃ tāvat bhaṭṭācāryaḥ—godāvarīṃ yāvatte yāsyanti | bhagavāṃstu setubandhaparyantaṃ gamiṣyatītyanumīyate rājā—brāhmaṇāstāvaddūraṃ kimu na preṣitāḥ bhaṭṭācāryaḥ—tasyānanumateḥ | godāvarīparyantaṃ tu rāmānandānurodhātteṣāṃ saṅgo'ṅgīkṛtaḥ rājā—kastāvattasyānurodhaḥ bhaṭṭācāryaḥ—gantavyamiti niścaye kṛte mayoktaṃ godāvarītīre rāmānando vartate, so'vaśyamevānugrāhyaḥ rājā—kathaṃ tasyedaṃ saubhāgyam bhaṭṭācāryaḥ—mahārāja, sa khalu sahajavaiṣṇavo bhavati | pūrvamayamasmākamupahāsapātramāsīt | saṃprati bhagavadanugrahe jāte tanmahimajñatā no jātā rājā—śruto'sti mayā tvayi yādṛśastasyānugraho jātaḥ bhaṭṭācāryaḥ—bhagavatprabhāvo hi svataḥ prakāśau ### [8.2.p2](https://indike.org/pramana/in.lit.plays.krsna.caitanyacandrodaya.8.2.p2) praviśya ### [8.2.p3](https://indike.org/pramana/in.lit.plays.krsna.caitanyacandrodaya.8.2.p3) dauvārikaḥ—bhaṭṭācārya, bhavatpreṣitā viprā godāvarīto nivartitā bhavantaṃ pratīkṣante bhaṭṭācāryaḥ—utkaṇṭhate rājā | praveśyantāmihaiva dauvārikaḥ—yathājñāpayasi | (iti punastānādāya praviśati |) bhaṭṭācāryaḥ—aho, āgacchatāgacchata ### [8.2.p4](https://indike.org/pramana/in.lit.plays.krsna.caitanyacandrodaya.8.2.p4) viprā upasṛtya rājānamāśīrbhirabhyarcya sārvabhaumaṃ praṇamanti ### [8.2.p5](https://indike.org/pramana/in.lit.plays.krsna.caitanyacandrodaya.8.2.p5) rājā—upaviśyāmūlaṃ kathayata ### [8.2.p6](https://indike.org/pramana/in.lit.plays.krsna.caitanyacandrodaya.8.2.p6) sarve upaviśanti --- Source: [https://indike.org/pramana/in.lit.plays.krsna.caitanyacandrodaya.8.2](https://indike.org/pramana/in.lit.plays.krsna.caitanyacandrodaya.8.2) · Pramāṇa