[Pramāṇa](https://indike.org/pramana/) › [Indian literature](https://indike.org/pramana/in) › [Epic, Poetry, Drama & Narrative](https://indike.org/pramana/in.lit) › [Drama (rūpaka)](https://indike.org/pramana/in.lit.plays) › [Kṛṣṇa plays](https://indike.org/pramana/in.lit.plays.krsna) › [Caitanyacandrodaya](https://indike.org/pramana/in.lit.plays.krsna.caitanyacandrodaya) › 8.7 # Caitanyacandrodaya 8.7 Caitanyacandrodaya 8.7 - **Language:** Sanskrit ### [8.7](https://indike.org/pramana/in.lit.plays.krsna.caitanyacandrodaya.8.7) sārvabhaumaḥ—satyamevāttha| tasyaivameva prakṛtiḥ vipraḥ—tato godāvarītīramāsādya vihitaviśrāme jagajjanamanobhirāme nirupamakṛpābhirāme premasaubhagavati bhagavati kanakaketakopavana iva parimalāmoditadigvalaye sakalaguṇanilaye svayaṃprakāśikayā tatprathayā ko'yaṃ ko'yamiti kṛtasamūhaḥ samūhaḥ kṣauṇisurāṇāṃ tatra militavān| nimantritaśca kenāpi| samanantaramanantarahasye sarvataḥ saṃcarati janacayaśravaṇakānte tadudante mantrākṛṣṭa iva grahagṛhīta iva vismayacamatkāravikāravisaṃṣṭhula iva rāmānandarāyaḥ samupeyivān rājā—rāmānanda, dhanyo'si dhanyo'si| yasya te nayanaviṣayībhūtāste śrīcaraṇāḥ vipraḥ—samanantaramāgatyaiva caraṇakamalaparisare sarerīyamāṇāśru nipatati sma svayameva| aye, tvameva rāmānando'sīti bhagavatā sānugrahamukte atha kimiti ca pratyūce| tadanu bhagavatāpi sārvabhaumānurodhena bhavadālokanamabhīṣṭaṃ mameti mayātra kṣaṇamavasthitam| tatsuvihitameva vihitaṃ bhavatā yatsvayameva samupasede taducyatāṃ kiṃcidityabhāṇi| tato yadyapi rāmānando hi ko'yaṃ kiṃvāmā kiṃmahimā kimāśayaḥ kiṃ tattva iti kimapi bhagavadviṣayakajñānaviśeṣānabhijñastathāpi cirakālakalitasatatasakhyasukhasubhagāṃbhāvuka iva niḥsādhvasa eva kimapi paṭhitumupacakrame mano yadi na nirjitaṃ kimamunā tapasyādinā kathaṃ sa manaso jayo yadi na cintyate mādhavaḥ kimasya ca vicintanaṃ yadi na hanta cetodravaḥ sa vā kathamaho bhavedyadi na vāsanākṣālanam - [Previous: 8.6](https://indike.org/pramana/in.lit.plays.krsna.caitanyacandrodaya.8.6) - [Next: 8.8](https://indike.org/pramana/in.lit.plays.krsna.caitanyacandrodaya.8.8) - [Up: 8](https://indike.org/pramana/in.lit.plays.krsna.caitanyacandrodaya.8) --- Source: [https://indike.org/pramana/in.lit.plays.krsna.caitanyacandrodaya.8.7](https://indike.org/pramana/in.lit.plays.krsna.caitanyacandrodaya.8.7) · Pramāṇa