Ramayanakathasandoha 11
Rāmāyaṇakathāsandoha 11
- Language
- Sanskrit
11.1
etattu vacanaṃ śrutvā sītā rāmasya duḥkhitā
prasaktāśrumukhī mandamidaṃ vacanamabravīt
11.2
ye tvayā kīrtitā doṣā vane vastavyatāṃ prati
guṇā ityeva tānviddhi tava snehapuraskṛtā
11.3
na hi māṃ tvatsamīpasthāṃ svayaṃ śakro'pi rāghava
surāṇāmīśvaraḥ śaktaḥ pradharṣayitumojasā
11.4
kuśakāśaśareṣīkā ye ca kaṇṭakino drumāḥ
tulājinasamasparśā mārge mama saha tvayā
11.5
patraṃ mūlaṃ phalaṃ yattu alpaṃ vā yadi vā bahu
dāsyase svayamāhatya tanme'mṛtarasopamam
11.6
yadi māṃ duḥkhitāmevaṃ vanaṃ netuṃ na cecchāsi
viṣamagniṃ jalaṃ vāhamāsthāsye mṛtyukāraṇāt
11.7
iti
sāntvyamānā tu rāmeṇa maithilī janakātmajā
praṇayāccābhimānācca paricikṣepa rāghavam
11.8
kiṃ tvāmanyata vaideho pitā me mithilādhipaḥ
rāma jāmātaraṃ prāpya striyaṃ puruṣavigraham
11.9
kiṃ hi kṛtvā viṣaṇṇastvaṃ kuto vā bhayamasti te
yatparityatkkāmastvaṃ māmananyaparāyaṇām
11.10
dyumatsenasutaṃ vīraṃ satyavantamanuvratām
sāvitrīmeva māṃ viddhi tvamātmavaśavartinīm
11.11
yasya pathyaṃ ca rāmāttha yasya cārthe'varudhyase
tvaṃ tasya bhava vaśyaśca vidheyaśca sadānagha
11.12
tvayā ca saha gantavyaṃ mayā gurujanājñayā
pretyabhāve'pi kalyāṇaḥ saṃgamo me sadā tvayā
11.13
śrutirhi śrūyate puṇyā brāhmaṇānāṃ yaśasvinām
ihaloke ca pitṛbhiryā strī yasya mahābala
adbhirdattā svadharmeṇa pretyabhāve'pi tasya sā
11.14
matkṛte na ca te śoko na bhaviṣyāmi durbharā
phalamūlāśanā nityaṃ bhaviṣyāmi na saṃśayaḥ
11.15
mahāvātasamuddhūtaṃ yanmāmavakariṣyati
rajo ramaṇa tanmanye parārghyamiva candanam
11.16
na māturna pitustatra smariṣyāmi na veśmanaḥ
yastvayā saha sa svargo nirayo yastvayā vinā
11.17
ananyabhāvāmanuraktacetasaṃ tvayā viyuktāṃ maraṇāya niścitām
nayasva māṃ sādhu kuruṣva yācanāṃ nāto mayā te gurutā bhaviṣyati
11.18
iti sā śokasaṃtaptā vilapya karuṇaṃ bahu
cukrośa patimāyastā bhṛśamāliṅgya svaram
11.19
tatsitāmalacandrābhaṃ mukhamāyatalocanam
paryaśuṣyata bāṣpeṇa jaloddhṛtamivāmbujam
11.20
tāṃ pariṣvajya bāhubhyāṃ visaṃjñāmiva duḥkhitām
uvāca vacanaṃ rāmaḥ pariviśvāsayaṃstadā
11.21
na devi tava duḥkhena svargamapyabhirocaye
na hi me'sti bhayaṃ kiṃcitsvayaṃbhoriva sarvataḥ
11.22
tava sarvamabhiprāyamāvijñāya śubhānane
trāsaṃ na rocaye'raṇye śaktimānapi rakṣaṇe
11.23
sarvathā sadṛśaṃ sīte mama svasya kulasya ca
vyavasāyamanukrāntā kānte tvamatiśobhanam
11.24
ārabhasva śubhācāre vanavāsakṣamāḥ kriyāḥ
nedānīṃ tvadaṛte sīte svargo'pi mama rocate
Linked texts (8)
- Gita Press edition (southern vulgate) — Sanskrit
- Śākuntalopākhyāna — Sanskrit
- Rāmakathāmañjarī — Sanskrit
- Vulgate (Nīlakaṇṭha's text) — Sanskrit
- Āryacarita — Sanskrit
- Laghurāmāyaṇa (Govindanātha Guha) — Govindanātha Guha, Sanskrit
- Indische Sprüche — Otto von Böhtlingk 1863, Sanskrit
- Vālmīkiratna — Vālmīki, Sanskrit