Ramayanakathasandoha 15

Rāmāyaṇakathāsandoha 15

14. rāmaprayāṇam
anācarantīṃ kṛpaṇaṃ mūrdhnyupāghrāya maithilīm
tāṃ bhujābhyāṃ pariṣvajya śvaśrūrvacanamabravīt

sādhvīnāṃ niratānāṃ tu śīle satye śrute sthite
strīṇāṃ pavitraṃ paramaṃ patireko viśiṣyate

sa tvayā nāvamantavyaḥ putraḥ pravrājito vanam
tava devasamastveṣa nirdhanaḥ sadhano'pi vā

sītā- kariṣye sarvamevāhamāryā yadanuśāsti mām
abhijñāsmi yathā bharturvartitavyaṃ śrutaṃ ca me

na māmasajjanenāryā samānayitumarhati
nāpātiḥ sukhamedheta yā syādapi śatātmajā

mitaṃ dadāti hi pitā mitaṃ bhrātā mitaṃ sutaḥ
amitasya tu dātāraṃ bhartāraṃ kā na pūjayet

rāma:- amba mā duḥkhitā bhūtvā paśyestvaṃ pitaraṃ mama
suptāyāste gamiṣyanti nava varṣāṇi pañca ca

samagrāmiha saṃprāptaṃ māṃ drakṣyasi suhṛdvṛtam | iti
atha sārdhatrayaśatā māturāha kṛtāñjaliḥ

saṃvāsātparuṣaṃ kiṃcidajñānādapi yatkṛtam
tanme samupajānīta sarvāścāmantrayāmi vaḥ

iti
atha rāmaśca sītā ca lakṣmaṇaśca kṛtāñjaliḥ
upasaṃgṛhya rājānaṃ cakrurdīnāḥ pradakṣiṇam

anvakṣaṃ lakṣmaṇo bhrātuḥ kausalyāmabhyavādayat
api mātuḥ sumitrāyā jagrāha caraṇau punaḥ
taṃ vandyamānaṃ rudatī mātā saumitrimabravīt

rāmaṃ daśarathaṃ viddhi māṃ viddhi janakātmajām
ayodhyāmaṭavīṃ viddhi gaccha tāta yathāsukham

iti
sītāvṛtīyānārūḍhāndṛṣṭvā rathamacodayat
sumantraḥ saṃmatānaśvānvāyuvegasamāñjave

Linked texts (5)