Ramayanakathasandoha 23
Rāmāyaṇakathāsandoha 23
- Language
- Sanskrit
23.1
22 vane'pi parihṛṣṭamānasā sītā
bāṣpavegopahatayā sa vācā sajjamānayā
idamāśvāsayandevīṃ sūtaḥ prāñjalirabravīt
23.2
vijane'pi vane sītā vāsaṃ prāpya gṛheṣviva
visrambhaṃ labhate'bhītā rāme vinyastamānasā
23.3
nāsyā dainyaṃ kṛtaṃ kiṃcitsusūkṣmamapi lakṣyate
uciteva pravāsānāṃ vaidehī pratibhāti me
23.4
nagaropavanaṃ gatvā yathā sma ramate purā
tathaiva ramate sītā nirjaneṣu vaneṣvapi
23.5
bāleva ramate sītā'bālacandranibhānanā
rāmārāme hyadīnātmā vijane'pi vane satī
23.6
adhvanā vātavegena saṃbhrameṇātapena ca
na vigacchati vaidehyāścandrāṃśusadṛśī prabhā
23.7
sadṛśaṃ śatapatrasya pūrṇacandropamaprabham
vadanaṃ tadvadānyāyā vaidehyā na vikampate
23.8
alaktarasaraktābhāvalaktarasavarjitau
adyāpi caraṇau tasyāḥ padmakośasamaprabhau
23.9
nūpurotkuṣṭalīleva khelaṃ gacchati bhāminī
idānīmapi vaidehī tadgāgānyastabhūṣaṇā
23.10
gajaṃ vā vīkṣya siṃhaṃ vā vyāghraṃ vā vanamāśritā
nāhārayati saṃtrāsaṃ bāhū rāmasya saṃśritā
Linked texts (1)
- Critical edition (Baroda) — Sanskrit