Ramayanakathasandoha 25

Rāmāyaṇakathāsandoha 25

24 jīvitāntakāle daśarathasyoktayaḥ
daśarathaḥ – dūtā vaivasvatasyaite kausalye tvarayanti mām
cakṣuṣā tvāṃ na paśyāmi smṛtirmama vilupyate

yadi māṃ saṃspṛśedrāmaḥ sakṛdapyālabheta vā
dhanaṃ vā yauvarājyaṃ vā jīveyamiti me matiḥ

na tanme sadṛśaṃ devi yanmayā rāghave kṛtam
sadṛśaṃ tattu tasyaiva yadanena kṛtaṃ mayi

durvṛttamapi kaḥ putraṃ tyajedbhuvi vicakṣaṇaḥ
kaśca pravrājyamāno vā nāsūyetpitaraṃ sutaḥ

atastu kiṃ duḥkhakaraṃ yadahaṃ jīvitakṣaye
na hi paśyāmi dharmajñaṃ rāmaṃ satyaparākramam

tasyādarśanajaḥ śokaḥ sutasyāpratikarmaṇaḥ
ucchoṣayati vai prāṇānvāristokamivātapaḥ

na te manuṣyā devāste ye cāruśubhakuṇḍalam
mukhaṃ drakṣyanti rāmasya varṣe pañcadaśe punaḥ

kausalye cittamohena hṛdayaṃ sīdatītarām
vedaye naca saṃyuktāñchabdasparśarasānaham

cittanāśādvipadyante sarvāṇyevendriyāṇi hi
kṣīṇasnehasya dīpasya saṃraktā raśmayo yathā

ayamātmabhavaḥ śoko māmanāthamacetanam
saṃsādhayati vegena yathā kūlaṃ nadīrayaḥ

hā rāghava mahābāho hā mamāyāsanāśana
hā pitṛpriya me nātha hā mamāsi gataḥ suta

hā kausalye na paśyāmi hā sumitre tapasvini
hā nṛśaṃse mamāmitre kaikeyi kulapāṃsani

iti mātuśca rāmasya sumitrāyāśca saṃnidhau
rājā daśarathaḥ śokajīvitāntamupāgamat

Linked texts (3)