Ramayanakathasandoha 29
Rāmāyaṇakathāsandoha 29
- Language
- Sanskrit
29.1
28 sītācittopalālanam
dīrghakāloṣitastāsminnirau girivarapriyaḥ
vaidehyāḥ priyamākāṅkṣansvaṃ ca cittaṃ vilobhayan
29.2
atha dāśarathiścitraṃ citrakūṭamadarśayat
bhāryāmamarasaṃkāśaḥ śacīmiva puraṃdaraḥ
29.3
paśyemamacalaṃ bhadre nānādvijagaṇāyutam
śikharaiḥ khamivodviddhairdhātumadbhirvibhūṣitam
29.4
puṣpavādriḥ phalopetaiśchāyāvadbhirmanoramaiḥ
nānātarubhirākīrṇaḥ śriyaṃ puṣyatyayaṃ giriḥ
29.5
jalaprapātairuddedairniṣpandaiśca kvacitkvacit
sravādrirbhātyayaṃ śailaḥ sravanmada iva dvipaḥ
29.6
guhāsamīraṇo gandhānnānāpuṣpabhavānbahūn
ghrāṇasaṃtarpaṇo'bhyetya kaṃ naraṃ na praharṣayet
29.7
vaidehi ramase kāccitrakūṭe mayā saha
paśyantī vividhānbhāvānmanovākkāyasaṃmatān
29.8
yadīha śarado'nekāstvayā sārdhamanindite
lakṣmaṇena ca vatsyāmi na māṃ śokaḥ pradharṣati
29.9
na rājyabhraṃśanaṃ bhadre na suhṛdbhirvinābhavaḥ
mano me bādhate dṛṣṭvā ramaṇīyamimaṃ girim
29.10
anena vanavāsena mama prāptaṃ phaladvayam
pituścānṛṇatā dharme bharatasya priyaṃ tathā
29.11
vicitrapulināṃ ramyāṃ paśya mandākinīṃ nadīm
nānāvidhaistīraruhairvṛtāṃ puṣpaphaladrumaiḥ
29.12
mṛgayūthanipītāni kaluṣāmbhāṃsi sāṃpratam
tīrthāni ramaṇīyāni ratiṃ saṃjanayanti me
29.13
jaṭājinadharāḥ kāle valkalottaravāsasaḥ
ṛṣayastvavagāhante nadīṃ mandākinīṃ priye
29.14
ādityamupātiṣṭhante niyamādrdhvabāhavaḥ
ete pare viśālākṣi munayaḥ saṃśitavratāḥ
29.15
mārutoddhūtaśikharaiḥ prannatta iva parvataḥ
pādapaiḥ puṣpapattrāṇi sṛjadbhirabhito nadīm
29.16
nirdhūtānvāyunā paśya vitatānpuṣpasaṃcayān
poyyamānānaparānpaśya tvaṃ tanumadhyame
29.17
darśanaṃ citrakūṭasya mandākinyāśca śobhane
adhikaṃ puravāsācca manye tava ca darśanāt
29.18
tvaṃ paurajanavadcālānayodhyāmiva parvatam
manyasva vanite nityaṃ sarayūvadimāṃ nadīm
29.19
lakṣmaṇaścaiva dharmātmā mannideśe vyavasthitaḥ
tvaṃ cānukūlā vaidehi prītiṃ janayatho mama
29.20
upaspṛśaṃstriṣavaṇaṃ madhumūlaphalāśanaḥ
nāyodhyāyai na rājyāya spṛhaye ca tvayā saha