Ramayanakathasandoha 30

Rāmāyaṇakathāsandoha 30

(sa0 14, 15.
29 bharatasainyadarśanena lakṣmaṇasaṃrambhaḥ
teṣu tatropaviṣṭeṣu bharatasyopayāyinaḥ
sainyareṇuśca śabdaśca prādurāstāṃ nabhaḥspṛśau

sa taṃ sainyasamudbhūtaṃ śrutvā rāmo mahāsvanam
uvāca vacanaṃ dhīro lakṣmaṇaṃ dīptatejasam

hanta lakṣmaṇa paśyeha sumitrā suprajāstvayā
bhīmastanitagambhīraṃ tumulaḥ śrūyate svanaḥ

iti
sa lakṣmaṇaḥ saṃtvaritaḥ sālamāruhya puṣpitam
prekṣamāṇo diśaḥ sarvā idaṃ vacanamabravīt

gajāśvarathasaṃbādhā yattairyuktā padātibhiḥ
ita eva samāyāntī dṛśyate mahatī camūḥ

agniṃ saṃśamayatvāryaḥ sītā ca bhajatāṃ guhām
sajjaṃ kuruṣva cāpaṃ ca śarāṃśca kavacaṃ tathā

iti
taṃ rāmaḥ puruṣavyāghro lakṣmaṇaṃ pratyuvāca ha
aṅgavekṣasva saumitre kasyemāṃ manyase camūm

evamuktastu rāmeṇa lakṣmaṇo vākyamabravīt
didhakṣanniva tāṃ senāṃ ruṣitaḥ pāvako yathā

akaṇṭakaṃ rājyamicchan vyaktaṃ prāpyābhiṣecanam
āvāṃ hantuṃ samabhyeti kaikeyyā bharataḥ sutaḥ

gṛhītadhanuṣāvāvāṃ giriṃ vīra śrayāvahe
atha vehaiva tiṣṭhāvaḥ saṃnaddhāvudyatāyudhau

api drakṣyāmi bharataṃ yatkṛte vyasanaṃ mahat
tvayā rāghava saṃprāptaṃ sītayā ca mayā tathā

bharatasya vadhe doṣaṃ nāhaṃ paśyāmi rāghava
pūrvāpakāriṇaṃ hatvā na hyadharmeṇa yujyate

etasminnihate kṛtsnāmanuśādhi vasuṃdharām
kaluṣeṇādya mahatā medinī parimucyatām

adyemaṃ saṃyataṃ krodhamasatkāraṃ ca mānada
mokṣyāmi śatrusainyeṣu kakṣeṣviva hutāśanam

adyaiva citrakūṭasya kānanaṃ niśitaiḥ śaraiḥ
chindañśatruśarīrāṇi kariṣye śoṇitokṣitam

śarāṇāṃ dhanuṣaścāhamanṛṇo'sminmahāvane
sasainyaṃ bharataṃ hatvā bhaviṣyāmi na saṃśayaḥ

Linked texts (3)